Зеленски: Украина досега добила околу 100 милијарди долари помош од САД

Украинскиот претседател Володимир Зеленски изјави дека САД ѝ обезбедиле на Украина помош во вредност од околу 100 милијарди долари, при што околу две третини од тие средства директно пристигнале во земјата, а останатиот дел останал во Европа, во рамки на американски програми и канцеларии.

„Од тие 100 милијарди, околу 65 до 67 милијарди директно влегоа во Украина, главно во форма на оружје и финансиска поддршка“, изјави Зеленски во интервју за американската телевизија CBS News.

Тој додаде дека околу 35 милијарди долари се искористени како поддршка на украинскиот буџет.

„Од почетокот верувавме дека ова е заедничка борба – Украина ги брани нашите заеднички вредности, ја брани цела Европа. Затоа и Европа значително помогна“, истакна Зеленски, прецизирајќи дека европската поддршка финансиски речиси се изедначува со американската.

Украинскиот лидер се заблагодари на американскиот народ за, како што рече, „сериозната и константна поддршка“ во борбата против руската агресија.

Од друга страна, американскиот претседател Доналд Трамп претходно изјави дека САД потрошиле 350 милијарди долари за Украина – бројка која значително се разликува од податоците кои ги наведува украинската страна.

Најмалку 47 загинати во два вооружени напади во централна Нигерија

Во два одделни напади што се случиле во неделата вечерта во централниот дел на Нигерија, животот го загубиле најмалку 47 лица, а уште 22 се повредени, соопштија претставници на Црвениот крст и локалните власти.

„Можам да потврдам дека 47 лица се убиени, 22 се повредени и пренесени во болница, а пет куќи се запалени“, изјави за АФП претставник на Црвениот крст кој побарал да остане анонимен.

Нападите се случиле околу 20 часот во селата Зике и Кимакпа, во регион кој често е погоден од меѓуетнички и верски конфликти. Локалните власти ја потврдија бројката на жртви и додадоа дека има голем број ранети.

Инцидентите доаѓаат само десет дена по слични напади во истата област, кога беа убиени над 40 луѓе. Регионот е познат по тензиите меѓу муслиманските и христијанските заедници.

Си Џинпинг од Виетнам: Протекционизмот не води никаде

Кинескиот претседател Си Џинпинг порача дека трговските и царинските војни „не носат победник“, нагласувајќи дека протекционизмот не нуди решение и не води никаде. Оваа изјава ја даде на почетокот на својата официјална посета на Виетнам, која е и негово прво патување во странство во 2025 година.

Изјавата доаѓа во време на ескалација на трговскиот конфликт меѓу Кина и САД – двете водечки светски економии. Американската администрација предводена од Доналд Трамп воведе царини од 145 отсто на увозот на кинески производи, на што Пекинг возврати со сопствени давачки од 125 отсто, сигнализирајќи дека нема да воведе дополнителни мерки, барем засега.

САД воведоа и царини од 46 отсто на увозот од Виетнам, што дополнително ја заострува трговската клима во регионот.

Кина останува најголем трговски партнер на Виетнам веќе повеќе од две децении, а билатералната размена на стоки минатата година ја надмина вредноста од 260 милијарди долари.

Си ја започна својата регионална турнеја од Ханој, главниот град на Виетнам, а по дводневната посета ќе продолжи кон Малезија, по покана на кралот Султан Ибрахим. Завршната дестинација ќе биде Камбоџа, каде ќе се сретне со кралот Нородом Сихамони.

Ова е четврта официјална посета на Си Џинпинг на Виетнам откако стана генерален секретар на Комунистичката партија на Кина во 2012 година.

Во изјава пред пристигнувањето во Виетнам, Си ја потенцираше важноста на дипломатските односи и регионалната соработка, посочувајќи дека дијалогот и партнерствата се клучни за стабилноста и економскиот развој во Југоисточна Азија.