Трамп ја пречекува Мелони во Белата куќа – царините, одбраната и геополитиката во фокусот

Американскиот претседател Доналд Трамп денеска во Белата куќа ќе ја пречека италијанската премиерка Џорџа Мелони, во рамки на работна посета чиј фокус ќе бидат економските и безбедносните прашања меѓу САД и Европската унија.

Според најавите, централна тема на разговорите ќе биде можното зголемување на царините на увозот на европска стока во САД – потег кој би можел значително да ги засили тензиите во трансатлантските трговски односи.

Покрај економските теми, Трамп и Мелони ќе разговараат и за трошењето на средства за одбрана, со посебен акцент на исполнувањето на обврските кон НАТО, како и за актуелните конфликти во Украина и на Блискиот Исток. На агендата се очекува да се најдат и прашања поврзани со енергетската безбедност, како и пошироките односи меѓу САД и Европската Унија.

Посетата се смета за значаен дипломатски момент, особено во контекст на растечките предизвици на глобалната сцена и засилените апели за координиран пристап меѓу западните сојузници.

Администрацијата на американскиот претседател Доналд Трамп вчера му се закани на Универзитетот Харвард со забрана за прием на странски студенти, доколку институцијата не прифати целосна контрола врз политиките за прием, вработување и политичка ориентација.

„Ако Харвард не може да докаже дека целосно ги почитува своите обврски, ќе ја изгуби привилегијата за запишување странски студенти“, стои во соопштението на Министерството за внатрешна безбедност на САД.

Само неколку дена претходно, Министерството за образование веќе замрзна федерални субвенции во износ од 2,2 милијарди долари наменети за Харвард, откако универзитетот одби да ги исполни барањата од Белата куќа. Дополнително, администрацијата најави можност за укинување на даночните олеснувања што ги има универзитетот.

Белата куќа доставила барања до раководството на Харвард, меѓу кои се и укинување на политиките за различност и промена на програми што наводно „поттикнуваат антисемитско вознемирување“.

Претседателот Трамп, преку својата социјална мрежа „Трут Соушал“, изјави дека Харвард подучува „омраза и глупост“ и не треба повеќе да добива државни средства.

Истовремено, медиумите CNN и Вашингтон Пост јавуваат дека Трамп официјално поднел барање до даночните власти за укинување на даночните ослободувања на Харвард.

Универзитетот, кој се наоѓа во Бостон и брои околу 30.000 студенти, е на врвот на Шангајската листа на најдобри светски универзитети и досега има 162 добитници на Нобелова награда.

Конфликтот меѓу Трамп и водечките американски универзитети ескалираше по протестите на студентите кои изразија поддршка за Палестина за време на воените дејствија на Израел во Газа во пролетта 2024 година. Републиканците тогаш обвинија повеќе универзитети, меѓу кои и Харвард, дека не ги заштитиле еврејските студенти.

Неколку ректорки, вклучително и од Харвард и Колумбија, поднесоа оставки. За разлика од Колумбија, која прифати длабински реформи, Харвард остана цврст во својата позиција.

Ректорот Алан Гарбер изјави дека Харвард веќе има иницирано активности против антисемитизмот и дека нема да отстапи од својата независност и уставно загарантираната слобода на изразување, со што, според него, се штити Првиот амандман.

Трамп одби да ја поддржи израелската воена акција против Иран – предност му даде на дијалогот

Американскиот претседател Доналд Трамп одлучи да не ја поддржи израелската иницијатива за напад врз иранските нуклеарни постројки, одлучувајќи се наместо тоа за дипломатски преговори со Техеран, пренесуваат американски официјални лица и извори блиски до администрацијата.

Како што објави Њујорк Тајмс, Израел планирал воени удари уште во мај, со цел значително да го забави иранскиот нуклеарен програм. Но, речиси сите сценарија за успешно изведување на акцијата подразбирале американска воена поддршка.

По долги месеци внатрешни консултации во Белата куќа, надвладеало мислењето дека треба да се даде предност на дипломатијата, особено бидејќи Иран наводно изразил подготвеност за дијалог.

Јасна порака до Нетанјаху: без напад додека траат преговорите

На средбата со израелскиот премиер Бенјамин Нетанјаху, која се одржа на почетокот од април во Вашингтон, Трамп го известил својот сојузник дека САД нема да учествуваат ниту ќе поддржат воени активности додека траат преговорите со Техеран.

Нетанјаху, пак, остана на ставот дека секој договор со Иран мора да вклучува можност за целосен американски надзор, уништување на постројките и демонтажа на опремата за збогатување ураниум.

Оваа одлука на Трамп претставува значаен пресврт во американската надворешна политика на Блискиот Исток и сигнал дека Вашингтон е подготвен да бара политичко решение за едно од најтешките безбедносни прашања во регионот.