Откриени можни траги на живот надвор од Сончевиот систем – планета оддалечена 124 светлосни години носи најсилен доказ досега

Планета оддалечена 124 светлосни години од Земјата би можела да биде клучот за одговорот на едно од најголемите прашања на човештвото – дали сме навистина сами во вселената? Според новите податоци добиени од вселенскиот телескоп „Џејмс Веб“, научниците откриле хемиски траги кои на Земјата се поврзуваат исклучиво со живи организми.

Станува збор за егзопланетата „K2-18 b“, која орбитира околу ѕвезда-црвенo џуџе во соѕвездието Лав. Таа е речиси девет пати помасивна од Земјата и се наоѓа во таканаречената „создавачка зона“ – регион околу ѕвезда каде што условите би можеле да дозволат постоење на течна вода.

Според објавените наоди во научното списание The Astrophysical Journal Letters, во атмосферата на оваа планета се идентификувани траги на диметил-сулфид (DMS) и диметил-дисулфид (DMDS) – молекули што на Земјата се создаваат исклучиво преку биолошки процеси.

– Ова е најсилниот доказ досега за можна биолошка активност надвор од нашиот Сончев систем. Сепак, остануваме крајно претпазливи – мора детално да ги провериме и автентичноста на сигналите и нивното значење – изјави проф. Нику Мадусудан од Универзитетот во Кембриџ.

Претходни набљудувања на „K2-18 b“ открија присуство на водена пареа, а понови анализи потврдија и метан во нејзината атмосфера – уште еден индикатор што потенцијално укажува на биолошки процеси.

Сепак, дел од научната заедница останува воздржана, предупредувајќи дека присуството на овие соединенија би можело да се објасни и со други – небиолошки – хемиски или геолошки процеси.

Иако резултатите имаат мала статистичка веројатност за грешка од само 0,3 проценти, тие сè уште не го исполнуваат стандардот за потврдени научни откритија во областа на физиката. Но, ако се потврди дека овие молекули потекнуваат од живот, тоа би бил навистина историски момент за науката и човештвото.

Емирот на Катар во официјална посета на Москва – средба со Путин за регионални и билатерални прашања

Емирот на Катар, Тамим бин Хамад Ал Тани, пристигна во официјална посета на Москва, каде што ќе оствари средба со рускиот претседател Владимир Путин, јавува катарската новинска агенција КНА.

Според најавите, двајцата лидери ќе разговараат за билатералните односи помеѓу Катар и Русија, со акцент на можностите за нивно продлабочување во различни области. Покрај тоа, на дневен ред ќе бидат и клучни регионални и меѓународни прашања од заеднички интерес.

Во катарската делегација се наоѓа и премиерот и министер за надворешни работи, шеик Мохамед бин Абдулрахман бин Јасим Ал Тани.

Средбата меѓу Путин и Ал Тани е закажана за четврток, а нејзиното одржување беше официјално потврдено од прес-службата на Кремљ уште еден ден претходно.

Болтон: Трамп сака да донесе мир во Украина за да ја добие Нобеловата награда за мир

Поранешниот советник за национална безбедност на САД, Џон Болтон, во коментар за британскиот весник The Sun изјави дека поранешниот американски претседател Доналд Трамп има лична мотивација да посредува во мировниот процес во Украина – желбата да ја добие Нобеловата награда за мир.

Според Болтон, Трамп со години наназад е фрустриран од фактот дека неговиот претходник, Барак Обама, ја доби оваа престижна награда во 2009 година, и тоа, како што вели, без реална основа.

– Од секогаш го нервираше тоа што Обама ја доби наградата. И со право – бидејќи Обама не ја заслужи. Но Трамп размислува вака: „Ако Обама доби, зошто да не добијам и јас?“ – вели Болтон. – Затоа сака да ги искористи мировните преговори за Украина како основа за номинација.

Обама ја доби Нобеловата награда во првата година од својот мандат, „за неговите напори во зајакнување на меѓународната дипломатија и соработката меѓу народите“. Претходно, истата награда од американските претседатели ја добиле Теодор Рузвелт, Вудро Вилсон и Џими Картер.

Сѐ поголема поддршка за номинацијата на Трамп

Трамп и претходно, во февруари годинава, изјави дека ја заслужува Нобеловата награда за мир. Неговата потенцијална номинација добива поддршка од различни делови на светот.

Според пишувањето на јужнокорејскиот весник Чунганг Чосон, заменик-претседателот на парламентарниот Комитет за разузнавање на Република Кореја, Пак Сон Вон, официјално го предложил Трамп за добитник на наградата.

Дополнително, претседателот на Источен Тимор, Жозе Рамош-Орта, изјави дека би бил подготвен да го номинира Трамп доколку успее да придонесе за мирно решавање на конфликтот во Украина, како и за конфликтот во Појасот Газа.

Поддршка за неговата номинација даде и претседателот на Белорусија, Александар Лукашенко, кој изјави дека Трамп би можел да биде номиниран ако навистина стане „миротворец“. Сепак, Лукашенко иронично додаде дека денес „Нобеловата награда веќе не значи ништо“.