Трамп предложи мировен план: Путин да задржи најголем дел од освоената територија во Украина

Според нов предлог за мировен договор што го поддржува американскиот претседател Доналд Трамп, рускиот претседател Владимир Путин би можел да ја задржи речиси целата територија која ја зазеде во Украина, пишува Daily Mail. Планот предвидува замрзнување на моменталната линија на фронтот, со што би се овозможило на Русија да ги задржи најголем дел од окупираните области. Сепак, Москва би морала да се повлече од две помали зони под руска контрола.

Украина, според предложениот план, би добила неограничен пристап до устието на реката Днепар, а Русија би морала да се повлече и од дел од Херсонската област.

Мировни разговори во Лондон

Денеска во Лондон се одржуваат состаноци помеѓу претставници на САД, Велика Британија, неколку европски земји и Украина, со цел да се поттикне напредок во мировните преговори меѓу Киев и Москва. Американскиот специјален пратеник, генерал Кит Келог, ќе учествува во разговорите и ќе се обиде да ја добие поддршката на Украина за планот.

Сепак, државниот секретар на САД, Марко Рубио, кој минатата недела учествуваше во разговорите во Париз, нема да биде присутен поради „обврски во агендата“, што покрена сомнежи дали Вашингтон ги намалува очекувањата од преговорите.

Иако Трамп изјави дека се надева оти договор ќе се постигне уште оваа недела, многу дипломати остануваат скептични, укажувајќи на големите разлики што сè уште постојат меѓу двете страни. Очекувањата за пробив се умерени, и покрај притисокот од страна на Трамп ова да биде клучен момент за решавање на конфликтот.

Следните чекори и спорни прашања

Ако денешните разговори донесат напредок, специјалниот пратеник на Трамп, Стив Виткоф ќе го претстави планот пред Путин. Но, нејаснотиите околу безбедносните гаранции за Украина и потенцијалната неподготвеност на Русија да отстапи територии можат да бидат сериозна пречка.

Според информации на The Telegraph, мировниот план содржи три клучни точки: првата е моментално примирје – нешто што украинскиот претседател Володимир Зеленски веќе го прифатил во принцип. Втората точка се однесува на контролата на територијата, а третата – најконтроверзна – предвидува Украина да се откаже од настојувањата за членство во НАТО, иако би ѝ било дозволено да се приклучи на Европската Унија.

Илон Маск најавува повлекување од американската администрација поради „неетички напади“

Илон Маск би можел наскоро да се повлече од функцијата во американската администрација, наведувајќи како причина, според негови зборови, „злобни и неетички напади од левиот политички спектар“. Иако официјална потврда за негова оставка сè уште нема, неговиот специјален статус како државен службеник истекува кон крајот на наредниот месец, пренесува The Washington Post.

Извори блиски до Маск велат дека тој е уверен оти неговото евентуално заминување нема да го загрози функционирањето на Одделот за ефикасност на владините системи (DOGE), бидејќи тимот веќе има воспоставено силна соработка со федералните агенции.

Се зголемуваат шпекулациите за неговото повлекување

Шпекулациите за повлекување на Маск добија на тежина по серија случувања кои укажуваат на негово ослабено влијание во администрацијата. The New York Times објави дека вршителот на должност на шефот на федералната Пореска управа (IRS) бил сменет откако министерот за финансии Скот Бесент изразил незадоволство од едностраната одлука на Маск да назначи нов кандидат без претходна консултација.

Дополнително, медиумите пренесуваат дека Маск предизвикал незадоволство кај други членови на владата поради спроведување мерки за штедење без координација со другите институции.

Стручњаците предупредуваат: Тесла е во критичен момент

Аналитичарот Ден Ајвс од Wedbush Securities јавно го повика Маск да ја напушти функцијата во владата и целосно да се врати на чело на Tesla, оценувајќи дека компанијата се наоѓа во „критична фаза“.

„Маск мора да се повлече од DOGE и повторно целосно да се посвети на Tesla. Тоа е клучно за иднината на брендот“, истакна Ајвс, додавајќи дека „Tesla е Маск, и Маск е Tesla“. Тој предупреди дека името на компанијата станало политички симбол поврзан со администрацијата на Трамп и со DOGE, што може да резултира со долгорочен пад на побарувачката од 15 до 20 отсто поради нарушениот имиџ.

Незадоволство и внатре во администрацијата

Според The Washington Post, Маск се соочил и со отпор внатре во администрацијата. Тој наводно им наредил на сите федерални службеници секој петок да испраќаат е-пошта со пет работи што ги имаат сработено во текот на неделата. Непочитување на оваа обврска, според Маск, би значело – оставка.

Но, само два дена подоцна, Канцеларијата за управување со човечки ресурси (OPM) соопшти дека оваа пракса е доброволна и не може да се користи како основа за отказ. Некои агенции ја отфрлиле оваа обврска, други ја применуваат без надзор, а трети бараат редовно известување, но не ги проверуваат извештаите.

Како што пишува Post, дел од вработените испраќаат речиси идентични извештаи секоја недела – или пишуваат извештаи со шеговит тон, што укажува на општо отсуство на мотивација да се следат Масковите директиви.

Светскиот економски форум покренува истрага против основачот Клаус Шваб

Управниот одбор на Светскиот економски форум (СЕФ) отвори официјална истрага против основачот и поранешен претседател Клаус Шваб, поради сомнежи за финансиски нерегуларности и етички прекршоци. Според Wall Street Journal, истрагата започнала откако до управата пристигнало анонимно писмо од укажувач на неправилности, во кое се изнесуваат сериозни обвинувања на сметка на Шваб и неговата сопруга Хилда.

Изворите на американскиот весник откриваат дека одлуката за итно отворање на постапка била донесена на вонреден состанок, одржан на денот на Велигден.

Во писмото, меѓу другото, се наведува дека Шваб и неговата сопруга со години ги мешале приватните и професионалните интереси, користејќи ресурси на Форумот за лични цели. Наводно, Клаус Шваб давал наредби на вработени да му подигнуваат готовина од банкомати, а парите од организацијата ги користел за лични услуги, вклучително и масажи во хотелски соби. Се тврди и дека Хилда Шваб организирала „симболични настани“ во рамките на форумот, само за да оправда раскошни патувања и луксузни одмори.

Загриженост за управувањето и организациската култура

Анонимниот укажувач посочува и на подлабоки структурни проблеми во раководењето со СЕФ. Според него, долги години изостанувал соодветен надзор врз трошењето средства, а семејството Шваб уживало практично неограниченo влијание во организацијата.

Како одговор на новонастанатата криза, СЕФ објави дека Клаус Шваб официјално се повлекол од раководната функција, а за вршител на должност е назначен потпретседателот Петер Брабек-Летмат. Шваб, кој има 88 години, како формална причина за повлекувањето ја наведе својата возраст.

Да потсетиме, во мај 2024 година беше најавено дека Шваб ќе се повлече од функцијата претседател и ќе стане неизвршен директор. Сепак, само еден месец подоцна, Wall Street Journal објави уште еден вознемирувачки извештај, повикувајќи се на сведоштва од вработени, кои раководството – вклучувајќи го и Шваб – го обвинија за системска дискриминација и вознемирување на жени и припадници на афроамериканската заедница.

Новата истрага дополнително го нарушува угледот на човекот што стоеше зад една од највлијателните меѓународни организации. Како што пренесуваат западните медиуми, последиците по репутацијата на СЕФ би можеле да бидат сериозни и долгорочни.