Без струја утре ќе останат делови од општините Аеродром, Кисела Вода и Студеничани, информираат денеска од Регионалниот центар за управување со кризи – Скопје, по информација добиена од „ЕВН Македонија“ АД.

Во периодот од девет до 12 часот, без електрична енергија ќе останат дел од корисниците во населба Морани, Општина Студеничани.

Во општина Аеродром, од девет до 13 часот, дел од улицата „Архитект Сотир Томовски“. Во истиот период и дел околу улицата „Ѓорѓи Андреевски Кун“.

Исто така од девет до 13 часот, без струја ќе биде и дел од улицата „Ѓоро Малешевец“ во Општина Кисела Вода.

Градоначалникот на Општина Кисела Вода, Орце Ѓорѓиевски, заедно со заменик-министерот за труд и социјална политика, Ѓоко Велковски, денеска изврши увид во градежните активности на новата детска градинка „Верверичка“, која е во завршна фаза.

Оваа модерна градинка, лоцирана во населбата 11 Октомври Згради, ќе има капацитет за над 110 деца и ќе се простира на 525 квадратни метри. Во објектот ќе бидат сместени четири занимални, како и поголема сала за приредби и свечености. Според динамиката на градба, градинката треба да биде завршена до мај оваа година.

„Кога започнавме со работа, во Кисела Вода имавме над 400 деца кои чекаа за упис во градинка. Денес, речиси и да нема, благодарение на новите градинки што ги отворивме и проширувањето на постојните капацитети“, изјави Ѓорѓиевски.

Во изминатите три години, во општината се направени интервенции во вкупно девет објекти. Со изградбата на градинката „Верверичка“, како и со новите капацитети во Расадник и Потстаница, Кисела Вода е на пат целосно да ја елиминира листата на чекање за упис во градинка.

„Мојата визија е јасна – за секое дете во општината да има место во градинка. Овие проекти, заедно со инвестициите во опремувањето на градинките, ќе овозможат квалитетни услови за креативен и стимулативен развој на најмладите“, истакна Ѓорѓиевски.

Градоначалникот на Кисела Вода и претседател на ЗЕЛС, Орце Ѓорѓиевски, денес во Владата на Република Македонија оствари работна средба со министерот задолжен за интеграција и имплементација на Стратегијата за инклузија на Ромите 2022-2030, Шабан Салиу.

Фокусот на средбата бил ставен на досегашните мерки и проекти, како и идните инфраструктурни зафати насочени кон подобрување на условите за живот, особено во средините каде што живее ромско население.

„Ги истакнавме нашите заеднички заложби за унапредување на човековите права и подобрување на секојдневието на сите граѓани, со посебен акцент на Ромите“, истакна Ѓорѓиевски.

Тој додаде дека во наредниот период ќе се следи имплементацијата на активностите што ќе ги спроведуваат локалните самоуправи, со цел натамошно унапредување на квалитетот на животот на сите граѓани во Македонија.