Претседателот на Собранието на Република Македонија, Африм Гаши, за време на својата посета на Гостивар, оствари средба со истакнатиот ветеран на образованието, Хазби Фејзин.

Фејзин, кој 41 година од својот живот посветил на образованието, оставил длабока трага врз бројни генерации ученици, влијаејќи на нивното оформување и пренесувајќи скапоцено знаење и вредности.

„Имав чест и задоволство да се сретнам со г. Хазби Фејзин, човек кој со својата долгогодишна работа остави трајно наследство во областа на образованието. Оваа средба беше можност да изразам благодарност за неговиот исклучителен придонес,“ изјави Гаши.

На средбата беше истакнато значењето на образованието како темел на општествениот развој, како и улогата на просветните работници кои со својата посветеност ги обликуваат идните генерации.

Средбата со ветеранот Хазби Фејзин е дел од напорите на Гаши за афирмација на важноста на образованието и вреднување на оние кои го граделе неговиот развој низ годините.

Заменик-претседателот на Владата на Република Северна Македонија, Изет Меџити, во интервју за Радио Телевизија Албанија зборуваше за позитивните промени во демократските процеси и приоритетите на новата влада, вклучувајќи ја борбата против казината и брзите кредити.

Меџити истакна дека промените во владеењето се здрави за демократијата и претставуваат нејзина вредност. Тој нагласи дека, за прв пат, лидерите на албанските партии преземаат извршна одговорност, активно учествувајќи во донесувањето одлуки.

„За разлика од минатото, кога лидерите делегираа други лица и се дистанцираа од одговорноста, денес тие се на чело на извршната власт. Во минатото, ако една одлука беше успешна, лидерите го присвојуваа успехот, а неуспесите паѓаа врз делегираните лица. Последиците на крајот ги плаќаше електоратот. Денес, оваа ситуација е променета,“ изјави Меџити.

Заменик-претседателот истакна дека во овие четири месеци владеење не е забележан ниту еден корупциски скандал. „Објавивме дека ќе има одговорност, но за прашањата од минатото, последниот збор го препуштивме на судските институции и обвинителството,“ додаде тој.

Во продолжение, Меџити зборуваше за активностите против казината и брзите кредити, кои, според него, беа карактеристика на претходната власт. „Сè што се затвораше во Косово, се префрлаше во Македонија. Укинати се неколку големи концесии за онлајн казина и формирана е владина група за борба против дивото работење на казината – глобален проблем. Работиме на носење нов, поригорозен закон, бидејќи сегашниот го сметаме за штетен за граѓаните. Македонија постепено се закануваше да се претвори во ‘Лас Вегас на Балканот’,“ заклучи Меџити.

Според него, овие активности се пример за нов и поодговорен пристап во владеењето, со фокус на благосостојбата на граѓаните и одржливиот развој на државата.

Премиерот Христијан Мицкоски рече дека утрово заедно со министерот за надворешни работи Тимчо Муцунски ги информирале стратешките партнери и меѓународната заедница за синоќешните настани и им доставиле докази за тоа што се случуваше и за тоа што очекуваме да се случува.

Нашите стратешки партнери и меѓународната заедница беа предупредени дека ќе има инциденти токму за вчера, а утрово заедно со министерот за надворешни работи Тимчо Муцунски ги информиравме за настаните и им доставивме докази за тоа што се случуваше и за тоа што очекуваме да се случува, рече денеска премиерот Христијан Мицкоски, во врска со палењето и кинењето на македонското знаме и другите инциденти за време на синоќешната прослава на денот на албанското знаме. Премиерот Мицкоски рече дека допрва ќе има слични инциденти.

– Бидете сигурни дека македонската влада ќе одговори жестоко на сите обиди да се дестабилизира државата – рече тој.

Премиерот Мицкоски најостро го осуди сквернавењето на македонското знаме.

– Тоа е чин на агресија, нешто за кое ние предупредувавме дека ќе се случува и дека ќе има обиди за ескалација и за креирање на меѓуетнички тензии, а ќе има и во иднина. Ова нема да е изолиран случај, очекувајте дека ќе и во иднина. Како правдата пополека, но сигурно се доближува до криминалците, така тие ќе стануваат понервозни, понетрпеливи и единствениот начин да го одбранат криминално стекнатиот капитал е токму вака, со манипулирање и со предизвикување на ваков тип на инциденти. Им честитам на навремената, трезвена и државничка акција на МВР, БЈБ СВР Скопје и на полицајците кои не дозволија ескалирање и реагираа во насока на приведување на лицата кои го сквернавеа македонското државно знаме – рече Мицкоски.

Засега 8 предизвикувачи на инцидентите се приведени ќе бидат изведени пред суд, додаде премиерот.

– Јас апелирам до македонските граѓани на трезвеност, да не дозволиме овие инциденти да предизвикаат негативни чувства, бидејќи ова е мала, изолирана и манипулираа група од оние кои ги штитат своите милиони. А тие кои се потенцијални жртви на овие политички криминалци и насилници, сакам да ги предупредам дека нема да има милост кон никого. Секој кој ќе го прекрши законот ќе одговара и ако мислат дека се недопирливи и дека ова што го зборуваме не е вистина, силно ќе се разочараат. Уште во првиот обид ќе бидат приведени. Апелирам до граѓаните без разлика на етничката припадност, да не дозволиме овие криминални групи, кои се длабоко во своето политичкото мочуриште, а беа 7 години власт, да ја дестабилизираат нашата заедничка татковина – рече премиерот.

Ние како Влада гарантираме безбедност, трезвена акција на полицијата и државничко однесување, изјави премиерот Христијан Мицкоски.

ЕДИТ 14.50: Извршена е промена на првичниот наслов, поради погрешна интерпретација на дел од изјавата на премиерот Мицкоски.