Министерот за надворешни работи, Тимчо Муцунски, денеска во Брисел, на маргините на состанокот на министрите за надворешни работи на НАТО, оствари кратка, но продуктивна средба со американскиот државен секретар, Марко Рубио. Станува збор за нивна прва средба по неодамнешното именување на Рубио на оваа функција.

На средбата беа разменети мислења за актуелни прашања од заеднички интерес, како и за соработката на билатерално ниво и во рамките на НАТО Алијансата.

„Се согласивме за важноста од натамошно интензивирање на политичкиот дијалог на високо ниво. Следуваат многу заеднички иницијативи“, напиша министерот Муцунски во своите објави на социјалните мрежи.

Со договор за формирање на работни групи заврши 100 минутната средба меѓу лидерите на двете најголеми партии. Првиот човек во опозицијата средбата ја оцени како добра и конструктивна коментирајќи дека Премиерот го прифатил барањето на граѓаните реформската агенда да се турка со заеднички сили.

Беше истакната потребата да се работи на заедничката иднина за граѓаните, како и да се работи на консензус меѓу различните страни за клучните прашања за државата и добробит на сите граѓани, информираше Владата во писмено соопштение по средбата.

„Неопходно е да се мобилизираат сите напредни поединци и структури кој можат да дадат придонес на патот за развој на земјата.

Македонските државни интереси треба да бидат појдовната точка во разговорите за секое прашање, при што Мицкоски побара од Филипче да се потруди да биде конструктивен фактор во определбата за промени, реформи и напредок.“ – се вели во соопштението од Владата.

Филипче рече дека очекува во процесот да бидат вклучени и останатите политички лидери кои преку експерти во работните групи ќе можат да предлагаат свои решенија кои би ги забрзале реформските процеси.

Коалицијата на ДУИ уште пред да почне средбата ја оцени како погубна за Албанците.

„На јавна сцена денес ќе ни биде демонстрирана моноетничката коалиција чија основна цел е да го преобликува политичкиот модел на државата од мултиетничка, во моноетничка демократија.“ – се вели во нивното партиско соопштение.

Во фаза на доказна постапка денеска во Основниот суд Тетово повеќе од пет часа траеше главната расправа во судскиот процес за обвинетите Флорин Бесими и Артан Етеми како и правното лице ЈЗУ Клиничка болница за кривично дело „тешки дела против општата сигурност“, во врска со пожарот во модуларната болница во која животите ги загубија 14 лица.

Пред Судот искази дадоа и беа сослушани вешти лица кои во текот на истрагата изработиле вештачења.

Прво овластениот судски вештак по електротехника Ирфан Шаќири пред Судот образложи дека по наредба на Јавно Обвинителство извршил вешт наод за можните индиции за појава на пожар во објектот на модуларната болница за првото судење и останува на фактите изнесени во тој извештај.

При поставените прашања од Обвинителството тој рече дека целокупната постапка за доведување на електрична енергија од трафостаница до модифицираниот објект наречен модуларна болница е направен од две неквалификувани лица, вработени во Клиничка болница.

– Во комуникација со нив во врска со определување на тип на проводник тие не понудија документ. Рекоа дека се направени пресметки врз основа на разговор со повозрасни електричари кои им кажале каков кабел да користат од трафостаница за да има струја во објектот, рече Шаќири.

На прашање на одбраната, дали се согласува со прашањето дека инсталацијата е изведена во спротивно од стандардите, вештото лица одговори со „да“.

Рубин Бошковски од Министерството за внатрешени работи кој изврши форензичко испитување истакна дека при вештиот наод утврдиле настанување на механичко оштетување на продолжителниот кабел поради нагмечувања или превиткување, на кој бил приклучен дефибрилатор.

– Високата температура довела до согорување на изолацијата од кабелот и создавање на пламен, посочи Бошковски.

На прашање дали при увидот биле забележани противпожарни апарати, Бошковски рече дека не биле евидентирани во самата болница.

Сведочеше и професорката Анита Грозданова од Технолошко-металуршкиот факултет која ги испитувала материјалите од кои е составена модуларната болница.

– Материјалите за изработка на префабрикуваниот контејнер ги задоволуваат барањата според спецификацијата на Министерството за здравство и истите се анализирани според процедури за соодветни својства за што гарантирам, рече професорката Анита Грозданова.

Од Технолошко-металуршкиот факултет, сведочеше и Свето Цветковски, кој ги испитувал металите кои се користени при изведба на привремените објекти познати како модуларни болници. И тој потврди дека металните материјали се според спецификацијата наложена од Министерството за здравство.

Универзитетските професори Влатко Стоилков и Владимир Димчев од Факултетот за електротехника и информациски технологии при Универзитетот „Свети Кирил и Методиј“ во Скопје, изработиле вешт наод и мислење во писмена форма за тоа дали модуларните болница биле изградени според проектната задача согласно барањата на договорниот орган.

– Според препораките на Светска Банка во Македонија имало четири типски објекти, а во Тетово бил изграден типски објект со ознака ЦЕ (латинско C). Во просториите на овие објекти, на еден кревет имало по една приклучница за електрична енергија (штекер) за еден и еден приклучок за кислород, рече Стоилков.

За професорот Владимир Димчев немаше други прашања, а тој рече дека останува на ставовите дадени во писмениот вешт наод и мислење.

По сослушувањето на вештите лица одбраната побара да се сослушаат и вештите лица од Германија кои имаат изработен извештај. Судијата Реџеп Муса истакна дека според насоките на повисокиот Апелациски суд предлогот на одбраната се одбива.

– Постојат доволно докази за околности на настанот, посочи судијата.

Судијата ја прекина главната расправа поради истекување на работното време и ја закажа за 8 април во 9 часот и 30 минути кога се предвидува да се читаат писмените докази од одбраната. Закажани беа и уште два термини на 22 и на 28 април исто така во 9 часот и 30 минути.