Двајца од повредените во пожарот во Пулс сè уште во тешка состојба – 45 лица на лекување во странство

Двајца од повредените во пожарот што се случи на 16 март во дискотеката „Пулс“ во Кочани, кои моментално се лекуваат во странство, се наоѓаат во релативно тешка здравствена состојба. Ова попладнево го соопшти заменик-министерот за здравство, Јовица Андовски, на прес-конференција.

Во моментов, вкупно 45 пациенти се лекуваат надвор од земјата.

Во текот на денешниот ден, се очекува транспорт на пациент од Солун, кој ќе го продолжи лекувањето на Клиниката за пластична хирургија во Скопје, каде веќе се наоѓа една пациентка.

Утре, од Ниш треба да пристигне уште еден пациент, кој ќе биде хоспитализиран во болницата „Стара градска“, каде што веќе се лекуваат две лица. Дополнително, уште двајца пациенти се згрижени во приватна болница во Скопје.

Црвениот крст исплати над 86 милиони денари помош за семејствата настрадани во пожарот во Кочани

Заклучно со 17 април 2025 година, преку апелот на Црвениот крст на РСМ собрани се вкупно 128.011.651 денар наменети за поддршка на настраданите од трагичниот пожар во Кочани.

Денес, Црвениот крст изврши трансфер на средства кон 62 семејства на починатите лица. Со оваа исплата, досега се распределени вкупно 86.100.000 денари.

Организацијата, во соработка со своите партнери, продолжува со обезбедување психосоцијална и друга неопходна поддршка за погоденото население, стои во соопштението.

Градоначалникот на општина Кисела Вода, Орце Ѓорѓиевски, денеска учествуваше на работна средба во просториите на ЗЕЛС, каде што се разговараше за идните еколошки проекти и начини на поддршка за општините во нивната реализација. Средбата беше одржана со министерот за животна средина и просторно планирање, Изет Меџити, а присуствуваа и потпретседателот на ЗЕЛС, Висар Ганиу, како и извршната директорка на ЗЕЛС, Душица Перишиќ.

Министерот Меџити ги презентираше критериумите од Конкурсот за распределување средства за финансирање на проекти од областа на животната средина за 2025 година. Средствата се наменети за инфраструктурни проекти, како што се изградба и реконструкција на канализациони и водоводни системи, системи за одведување и прочистување на отпадни води, како и за изработка на техничка документација за ваквите зафати.

Градоначалникот Ѓорѓиевски ја потенцираше важноста од ваквиот тип поддршка за општините, нагласувајќи дека вложувањата во еколошката инфраструктура се директна инвестиција во здравјето на граѓаните и во долгорочниот развој на заедниците. Тој ги повика сите градоначалници да ја искористат оваа можност и да аплицираат со конкретни и добро подготвени проекти.

На средбата се разговараше и за пошироки прашања, како што се процесот на децентрализација, потребата од зголемување на дотациите за општините и зајакнување на нивната финансиска самостојност. Ѓорѓиевски подвлече дека за унапредување на локалната самоуправа е неопходна и зголемена експедитивност во институционалните постапки.

„Грижата за чиста вода, заштитени природни ресурси и здрава животна средина не е прашање на избор – туку обврска која сите заедно мораме одговорно да ја носиме,“ изјави Ѓорѓиевски. Тој додаде дека ЗЕЛС останува силен партнер на сите општини во поддршката за зелени проекти и градење на поодржлива иднина за граѓаните.