Македонија

Пендаровски на вежба изведена од 3. вод на Прва пешадиска чета под команда на поручник Неда Волчева

Претседателот Стево Пендаровски денеска престојуваше во посета на Штип во рамки на проектот „Лице в лице со Претседателот”.

Претседателот Пендаровски ја посети касарната „Јане Сандански” каде присуствуваше на презентација на показна вежба: Tактики, техники и процедури на движење на пешадиско одделение во населено место, изведена од 3. вод на 1. пешадиска чета под команда на поручник Неда Волчева.

Во Касарната, претседателот Пендаровски имаше можност да поразговара и со претпоставените старешини коишто го информираа за условите за работа на припадниците на Армијата и нивните тековни активности. На средбата, на која присуствуваа и командирите на одделенија од единицата на армијата на САД за советување и поддршка во обуката на нашата НАТО декларирана единица, стана збор и за нејзиното оценување кое треба да се случи во месец април 2022 година.

Претседателот Пендаровски поразговара и со поручник Неда Волчева, командир на 3. вод на 1. пешадиска чета. Говорејќи за нејзините професионални ангажмани и одговорности, како и за предизвиците како жена, Волчева истакна дека преку својот личен пример докажува дека и жените се подеднакво подготвени да бидат дел од Армијата.

За време на посетата на касарната „Јане Сандански” во Штип, претседателот Пендаровски беше придружуван од Началникот на Генералштабот на Армијата, генерал-потполковник Васко Ѓурчиновски.

Претседателот Пендаровски, во рамки на посетата на Штип го посети и подрачното одделение на Државниот архив на Република Северна Македонија, кое има надлежност врз повеќе општини од тој регион. Вработените го запознаа Претседателот за содржината на материјалите во ова одделение кое располага со 523 фонда и 22 збирки и притоа информираа дека најстарите документи датираат од 1895 година, а како главен дел, го посочија материјалот создаден по 1944 година.

Во депото на подрачното одделение во Штип, на претседателот Пендаровски му беа презентирани неколку оригинални документи меѓу кои беа две свидетелства потпишани од Гоце Делчев во училиштето во Ново Село – Штип, молба за упис на филозофски факултет на народниот херој Ванчо Прќе, првата радио вест за ослободување на Штип, диплома на првиот лекар-хирург во Штип, како и документи – тапии за имот од Османлискиот период.

Претседателот Пендаровски во спортската сала „Јордан Мијалков” – Штип, се сретна и со македонскиот каратист Емил Павлов, кој освои сребрен медал на светското првенство одржано во Дубаи. Честитајќи му го на Павлов извонредното постигнување, претседателот Пендаровски рече дека со посветеност и континуирано вложување, нема недостижни цели.

Емил Павлов е двократен европски првак, во Тампере, Финска – 2014 година и во Нови Сад, Србија – 2018 година. Државен првак во Македонија бил 11 пати.

Македонија

Германски воен авион наместо во Приштина – принудно слета во Скопје

Германски воен авион денеска не успеал да слета на аеродромот „Адем Јашари“ во Приштина поради недостиг на сертифициран персонал за слетување во услови на намалена видливост.

Од Агенцијата за воздушна навигација информираа дека другите летови функционираат нормално, а проблемот се однесувал конкретно на воениот лет.

Податоците од платформата Flightradar24 покажуваат дека авионот полетал од Берлин во 8:40 часот наутро и бил пренасочен кон Скопје, каде безбедно слетал.

Инцидентот повторно го отвори прашањето за техничката подготвеност на аеродромот во Приштина за слетувања во комплексни метеоролошки услови.

Македонија

Инспекциите откриваат неправилности кај матичните гинеколози

09.12.2025 – Засилени контроли од страна на Управата за јавни приходи (УЈП) и Фондот за здравствено осигурување (ФЗОМ) открија дека дел од матичните гинеколози не издаваат фискални сметки за услугите кои ги наплаќаат.

Според неофицијални информации на „Слободен печат“, мерките следат по мониторингот на невладините организации од октомври 2024 година, кој покажал дека жените често плаќале за услуги кои би требало да бидат бесплатни, а без да добијат фискална сметка.

ФЗОМ истовремено ја проширил контролата и на други сектори, вклучувајќи ја службата за итна помош, како и проверка на реалноста на боледувањата и начинот на исплата на платите. Резултатите од сите инспекции се очекуваат да бидат објавени следната недела.

Директорот на ФЗОМ, Сашо Клековски, на прес-конференцијата се осврна и на проблемот со Клиниката за онкологија при Клиничкиот центар „Мајка Тереза“, каде не се изработуваат анализи за тумор маркери.

Македонија

Мицкоски: Додека јас сум премиер, нема да никне ниту еден шатор со илегални мигранти

Премиерот Христијан Мицкоски денеска јасно го потенцираше ставот на Владата дека Македонија нема да прифати илегални мигранти и нема да дозволи поставување шатори за нив на територијата на земјата.

Повод за изјавата беа објавите на британските медиуми дека Велика Британија разгледува можност за депортирање на одбиени баратели на азил во Северна Македонија, при што секој депортиран мигрант би бил платен од британската страна. Мицкоски изјави дека со британските власти оваа тема не е разговарана и дека, доколку биде, Владата ќе ја одбие таквата опција.

„Во објавите се наведува ‘неуспешни апликанти за азил да ги праќаат во трети земји’. Да потенцирам пред македонската јавност – таква тема не е предмет на разговор, а и да биде, ќе биде одбиена од наша страна. Нашата цел е заеднички да се бориме против илегалната миграција и да ја браниме Европа“, рече Мицкоски.

Премиерот додаде дека опозицијата се обидува да го користи прашањето за мигрантите за политичка кампања, но нагласи дека борбата против илегалната миграција е фундаментална политика на ВМРО-ДПМНЕ.

Тој најави и нов проект „Безбедна држава“, инспириран од концептот „Безбеден град“, кој ќе овозможи мониторинг на македонските граници и ќе го спречи илегалниот влез, шверцот и трговијата со луѓе.