Македонија

Поскапувањето на струјата е 38,7 %, а не 9,48% – Граѓанин илустрира со пример

Јосиф Џолев активист на социјалните мрежи, преку личен пример објаснува дека поскапувањето на струјата не е само 9,48%, туку 38,7%.

Целата негова објава гласи:

Не сакам недоразбирања, а уште помалку сакам кога некој е ограничен и има можност да грее една соба 6 часа дневно сега не му преостанува ништо друго освен да се пребаци на 3 часа!,.. на сметка на, ајде за пример ќе ја спомнеме фабриката за соларни панели на идниот ви премиер Луј Таче I, на кој му е сеедно дали сметката за струја на фабриката ќе му е 600.000 или 750.000 денари тој месец.

Велат, “благодарение на нас, владата, поскапувањето на електричната енергија (трето поскапување во нивното владение последните 3 години) ќе е САМО 9.48%”.

Ќе се потрудам да не ги навредам ниту прогресивните, начукани по шупци, ниту пак тие со школо од Харвард,.. јас ќе си направам математика за мене, за мојата сметка и дали поскапувањето (за кое се уште нема стотици пресуди на доживотна робија) ми е САМО 9.48%.

Изминативе денови, бидејќи и онака сум со дечиња по дома, пресметав кога имаме потреба од струја, колку струја, т.е. како сум трошел, трошам и како (по пресметките) нема да трошам понатаму електрична енергија.

1360.2000 kWh – Ниска тарифа = 4.570 денари

700.5000 kWh – Висока тарифа = 4.690 денари

50% од потрошената струја претворена во кеш ми е во евтина тарифа.

50% ги тргаме на страна.

50% од потрошената струја претворена во кеш во евтина тарифа ми е за време на дневната евтина тарифа.

50% од потрошената струја претворена во кеш ги оставаме на кристално чиста вечерна евтина тарифа.

Па идеме вака, пример…

Минатиот месец сметката за струја да заокружиме, со ддв, ми беше 10.000 денари.

Да не сметаме во потрошени киловати, ќе се послужиме со процентите од горе, бидејќи од сметката ги препишав како претворени во кеш, но се има увид и во потрошени киловати, дека 65% од вкупната потрошувачка ми е во евтина тарифа.

Имаме чисти:

– 5.000 денари на кои ќе нема промена пред поскапување

– 2.500 денари на кои ќе нема промена пред поскапување

Со укинување на дневната евтина тарифа:

– 2.500 денари сега ќе се претворат во 5.000 денари пред поскапување

Вкупно сега имаме:

-12.500 денари пред поскапување

Благодарение на главучот од Харвард, Заев, Анѓушев, Петрит, Неџо, Никољче на Рада, ама не и на Бобо, како и останати неписмени кои ги лајкаат горенаведените, сега по благословот од САМО 9.48%, имаме:

– 12.500 × 9.48% = 13.685 денари

Кога ќе додадеме данок на новите благословени денари, само благодарение на стручниот тим на Нивната земја, имаме:

– 3.685 × 5% = 3.870 денари

Вкупно:

– 13.870 денари

Ова значи дека АКО овие одлуки беа за месец декември, поскапувањето од САМО 9.48%, тогаш мојата сметка за месец декември од:

– 10.000 денари

ќе беше:

– 13.870 денари

или во превод:

– поскапување од точно САМО 38,7 %

Имав и текст посветен на ова поскапување и злосторот и злосторниците зад ова, за претходните поскапувања, па за она што ни се случуваше со таканаречената “ангажирана моќност”, итн итн,.. но околу 10 страни во ворд е и не би ве гњавел, но едно знам, и 138,7%, ма и 538,7% да ни ја покачат струјата, освен на ФБ и движење на средниот прст за скролање и показалецот за клик, не очекувам некои други тектонски придвижувања на македонскиот народ.

Бислимовски, струјата што ја поскапе во јуни 2021 – за 12,36% и не се сеќавам колку беше во 2019, и сега оваа цифра,.. е за мене ова не е 9,48%, туку со укинување на дневната тарифа, барем за мене, поскапувањето е точно 38,7%,… а требаше да е намалена, бидејќи Македонија има резерви за бесплатна електрична енергија!!

Поскапувањето требаше/ТРЕБА да падне на терет на огромните потрошувачи, на оние кои заработуваат милиони на база на таа потрошувачка, поради кои и увезуваме струја, оти да е до народот, ние тој капацитет, потребниот капацитет за потребите на народот ќе го произведуваме со една воденичка.

Едит: п.с. И да не дојде до недоразбирање, ова е сметка за струја со греење само на 2 соби, 24 часа греење на двете соби, ама САМО 2 соби,… во кујна и купатило пристапуваме исклучиво со капа и шал. А има, ќе ми кажат дека сметката за декември им била 1500 денари, тажно е да ја слушнете приказната како успеале и преживеале, пишува Џолев.

Македонија

Се што треба да знаете за „Safe City“

Казнувањето на сообраќајните прекршоци преку системот „Безбеден град“ официјално ќе започне на 1 февруари, наместо на првично најавениот датум 1 јануари. Одложувањето е потврдено за ТВ21 од помошник-заменик министерот во МВР, Мухамет Исмаили, кој објасни дека причина за пролонгирањето е потребата од дополнителни технички проверки и усогласување на правните процедури.

„Од 01.02.2026 системот SafeCity целосно ќе биде ставен во функција во Скопје, Куманово и Тетово, како и на Коридорите 10 и 8, додека во другите градови се предвидува да започне во текот на 2026 година“, изјави Исмаили.

Од Министерството за внатрешни работи најавуваат и можност за одредена толеранција кај ограничувањата на брзината. „Треба да ги почитуваме ограничувањата – 50 км/ч за урбани подрачја значи 50 км/ч. Секако дека и ние ќе внимаваме, исто како што прават и сите европски градови каде што имаат свои параметри за толеранција – таква толеранција ќе има и кај нас“, изјави Сашо Топаловски, началник на СВР Скопје.

Системот „Безбеден град“ ќе работи со фиксни камери кои ќе регистрираат пречекорување на брзината, поминување на црвено светло, нерегистрирани возила и други прекршоци. Дополнително, специјализирани полициски возила ќе идентификуваат неправилно паркирање и останати нарушувања на сообраќајните правила.

Целта на новиот систем е до 2030 година да се преполови бројот на сообраќајни несреќи во државата.

Македонија

Витаминка со Стоби Флипс и купувачите донираат 1.000.000 денари за СОС Детско село

Кампањата „Заедно за топол дом, љубов и грижа за секое дете“ што Витаминка ја реализираше преку Стоби Флипс, успешно заврши и резултираше со донација од 1.000.000 денари за СОС Детско село. Средствата ќе бидат искористени за Советувалиште за психолошка поддршка и специјална едукација со рехабилитација на СОС Детско село. Благодарение на поддршката од граѓаните за акцијата со која од секој купен Стоби Флипс се издвојуваше дел, со собраните средства ќе се овозможи континуирана експертска едукација за шеесет деца и млади на возраст од 6 до 18 години кои растат без родителска грижа и се соочуваат со последици од трауматски искуства, емоционални и развојни предизвици, како и различни когнитивни потешкотии.

Средствата ќе бидат насочени кон проектот „Менталното здравје пред сè“, преку кој децата ќе добијат индивидуални сесии со психолози и специјални едукатори, како и терапевтски третмани во сензорна соба за оние кои имаат потреба од дополнителна поддршка во емоционалниот и когнитивниот развој. Овие услуги се од суштинско значење за нивното зајакнување, подобро справување со кризи и градење основа за здрав личен раст.

Од СОС Детско село Македонија истакнуваат дека поддршката е од огромно значење за континуитетот на нивната мисија. „Од срце им благодариме на Витаминка и на сите граѓани кои ја поддржаа кампањата. Витаминка уште еднаш покажа што значи вистинска општествена одговорност и посветеност кон децата. Благодарение на ова партнерство, можеме непречено да продолжиме да обезбедуваме стручна грижа и поддршка за секое дете, со верба во нивната подобра иднина,“ велат од организацијата.

За што поуспешно спроведување на кампањата за Стоби Флипс беше изработена и специјална амбалажа со што купувачите беа информирани за своето учество во донацијата и придонесе за подигнување на јавната свест и обезбедување поголема поддршка за децата без родителска грижа.

Од Витаминка додаваат дека се горди што кампањата успеала да ја мобилизира јавноста и да создаде реална промена. „Нашата цел беше да потсетиме дека секој мал гест на солидарност може да донесе голема разлика. Благодарни сме што потрошувачите ја препознаа важноста на оваа приказна и ни помогнаа заедно да донесеме надеж, грижа и поддршка таму каде што е најпотребно“, истакна Симона Симоновска, одговорна за маркетинг во Витаминка.

Со оваа кампања, Витаминка и Стоби Флипс уште еднаш ја потврдуваат својата посветеност кон најмладите и даваат силен пример за тоа како компаниите, заедно со граѓаните, можат да создадат поподобно, похумано и посреќно општество за секое дете.

Македонија

Рекордна година за Скопје – аеродромот со 3 милиони патници, растот продолжува до 3,2 милиони

Меѓународниот аеродром Скопје денес го дочека својот тримилионити патник во една календарска година. Среќничката, Милена Таскова, беше изненадена на нејзиниот лет Скопје – Бари.

Раководството на аеродромскиот оператор ТАВ Македонија, заедно со вицепремиерот и министер за транспорт, Александар Николоски, приредија емотивно изненадување за госпоѓа Таскова.

Милена Таскова беше облеана во подароци: бесплатни аеродромски услуги од сестринските компании на ТАВ и два бесплатни авионски билета од авиокомпанијата Виз Ер (Wizz Air).

Неџат Курт, генералниот директор на ТАВ Македонија, не ја криеше својата возбуда:

„Го достигнавме тримилионитиот патник во една година! Првпат лета за Бари, и посакав среќа на неа и нејзиното семејство.“

Курт најави дека ова е само почеток. Според оптимистичките прогнози на ТАВ, Скопскиот аеродром до крајот на годината ќе заврши со 3,2 милиони патници, додека аеродромот во Охрид се очекува да достигне 262.000 патници.

Овој успех не само што го потврдува растот на авиосообраќајот во земјата, туку и ја зацврстува позицијата на Скопје како значаен регионален воздушен центар.