Град Скопје и ЈП Комунална хигиена повторно потфрлија со одржувањето на хигиената на територија на Центар. Утрово, дебармаалци се соочија со идентична глетка како од пред два месеци – преполни контејнери со смет и лоша миризба кои не само што се закана по здравјето на центарци, туку, исто така и го нагрдува изгледот на централното градско подрачје кадешто циркулираат голем број на граѓани.

„И ова утро, нашите општински служби го подигнаа сметот од подземните контејнери во Дебар маало кадешто надлежност имаат Комунална хигиена и Град Скопје. Одржувањето на хигиената во Центар мора да биде приоритет, затоа што секојдневно се движат голем број граѓани. Како локална самоуправа, веќе неколку пати имаме испратено допис до надлежните институции со барање за поажурно и поефикасно извршување на нивните обврски. Граѓаните заслужуваат чиста и уредна средина, а ние ќе продолжиме да инсистираме на решавање на овој проблем”, изјави Герасимовски.

Општина Центар ги повикува граѓаните да пријават проблеми со јавната чистота на територија на општината со цел брза интервенција на службите. Граѓаните можат да пријават смет и диви депонии на следните телефонски броеви: 076/350-767 и 02/3203-693.

Градоначалникот на Кисела Вода, Орце Ѓорѓиевски, заедно со своите колеги, градоначалниците на Студеничани и Аеродром, остана на терен до раните утрински часови за да помогне на граѓаните погодени од надојдените води на Маркова Река.

Иако санацијата на коритото на реката е надлежност на Град Скопје, Ѓорѓиевски истакна дека во моменти на несреќа не смее да има бирократски препреки, туку единствен приоритет треба да биде заштитата на човечките животи.

„Не чекавме уште една трагедија, туку веднаш презедовме активности. Лично учествувавме во евакуацијата на загрозените граѓани, кои сега се безбедни и со своите семејства“, истакна градоначалникот.

Тој упати благодарност до премиерот Христијан Мицкоски за поддршката, како и до сите граѓани, волонтери и институции кои се вклучија во спасувањето.

„Политичар се покажува кога е најтешко – кога не се штедиш, кога не глумиш статуси, туку си таму, со луѓето, во првите редови“, порача Ѓорѓиевски, додавајќи дека времето ќе покаже кој навистина работи за граѓаните, а кој само критикува од далечина.

ВИДЕО

По добивањето на информацијата за излевањето на Маркова Река во соседната општина Студеничани, градоначалникот на Општина Кисела Вода, Орце Ѓорѓиевски, веднаш се упати кон најпогодените подрачја со цел да им се помогне на жителите од поплавените области. Mу се приклучи на градоначалникот на општина Студеничани, Азем Садику, за ситуацијата што побрзо да се стави под контрола и нагласи дека Општина Кисела Вода останува подготвена да мобилизира сите свои ресурси за помош при ублажување на штетите, како и тоа дека постојано се координира со институциите на централно и локално ниво.

„Веднаш по добиената информација за излевање на Маркова Река поради обилните врнежи во општина Студеничани, од гостување на телевизија се упатив на најкритичните места да помогнеме на нашите соседи.

Сакам да нагласам дека во постојана комуникација сме со Премиерот Христијан Мицкоски кој веднаш се понуди доколку е потребно да ги мобилизира сите расположливи ресурси за што јас, а и сите жители на Студеничани му се заблагодаруваме.

Механизацијата е на терен и нема опасност по населението, силно се работи на враќање на реката во своето корито. Со колегата градоначалник на Студеничани Азем Садику сме на тука и будно ќе ја следиме ситуацијата да биде под контрола, во текот на целата ноќ.

Спремни сме со сите расположливи сили да помогнеме. Во постојана комуникација сме и со колегата Дејан Митески од Аеродром, така што и тој е подготвен да помогне во случај да тоа е потребно.

Она што вистински загрижува е што сите институции не си ја вршат својата работа – со акцент на градот Скопје од кој лично имаме побарано во неколку наврати да се среди речното корито но, од страна на градоначалничката во заминување ни беше одговорено дека немаат предвидено средства за тоа. Замислете…

Временските непогоди не можеме да ги спречиме, но можеме да делуваме да нема големи последици.
Материјалното ќе го поправиме заеднички – Бог нека нѐ чува сите, тоа е најважно“, напиша Ѓорѓиевски на социјалните мрежи.