На 21.04.2025 во Скопје, на различни локации, полициски службеници од СВР Скопје ги лишиле од слобода М.Д.(19), Ф.Т.(24), М.К.(24), Н.С.(45), Б.С.(20) и А.Б.(21), сите од Скопје, затоа што кај нив биле пронајдени и одземени марихуана и бела прашкаста материја.

По целосно документирање на случаите ќе следуваат соодветни поднесоци.

Градоначалникот на Општина Кисела Вода, Орце Ѓорѓиевски, ја најави реконструкцијата на улицата „Ѓорѓи Димитров“ како еден од најголемите инфраструктурни зафати во општината. По цели пет децении запоставеност, оваа важна сообраќајна артерија конечно ќе добие нов изглед.

Станува збор за улица долга 1,2 километри и широка 12 метри, која секојдневно ја користат стотици граѓани. Со реконструкцијата се предвидени нов коловоз, широки тротоари, паркинг простори и уреден зелен појас.

„Создаваме целосно ново урбано решение кое ќе го унапреди квалитетот на живот, ќе ја зголеми безбедноста и ќе придонесе за поуредено секојдневие“, изјави Ѓорѓиевски.

Проектот е вреден 51 милион денари и се реализира со поддршка од Владата на Република Македонија, преку Програмата за капитални инвестиции. Ѓорѓиевски се заблагодари на премиерот Христијан Мицкоски за, како што рече, исклучително значајната поддршка.

Во тек е и вториот повик за капитални инвестиции, на кој Општина Кисела Вода повторно аплицира. „Ова е можност што ние, како градоначалници, мора да ја искористиме за да обезбедиме подобри услови за нашите сограѓани“, истакна Ѓорѓиевски, повикувајќи и останатите општини да подготват квалитетни проекти.

На најголемиот христијански празник Велигден, градоначалникот на Општина Кисела Вода, Орце Ѓорѓиевски, заедно со хуманитарната организација „Св. Спас“, предводена од отец Оливер, како и со дел од својот тим, организираше и подели велигденски ручек за сограѓаните од социјален ризик. Во духот на празникот, со благослов, љубов и искрена грижа за секого, се испрати порака за хуманост, солидарност и заедништво.

– Христос Воскресе! Сите на овој свет сме со некоја мисија, а мојата е да има што повеќе среќни луѓе. Впрочем, тоа е големината на нашата вера и тоа е она на што нè учи Христос. Велигден е празник над празниците, на победата на животот над смртта, ден на благослов, благодарност, на подадена рака и најрадосен ден. И бидејќи радоста треба да се сподели со сите, денес поделивме велигденски ручек за нашите сограѓани од социјален ризик, а во соработка со хуманитарната организација „Св. Спас” и нејзиниот предводник – мојот драг пријател отец Оливер, како и дел од мојот тим – истакна Ѓорѓиевски, честитајќи го празникот и посакувајќи им на сите неизмерна љубов во семејството, среќа, мир и бериќет.

-Да правиме што повеќе добрини и да не очекуваме ништо за возврат бидејќи Бог ќе нè награди. Да го славиме животот и да сме благодарни за секој нов ден – потенцираше Ѓорѓиевски.