Првиот заменик на претседателот на Владата и министер за животна средина и просторно планирање, Изет Меџити, соопшти дека оваа година општините ќе добијат финансиска поддршка во вредност од 229 милиони денари за конкретни проекти во областа на животната средина.

„Општините се нашите најважни партнери на терен, тие најдобро ја познаваат реалноста и еколошките предизвици на локално ниво“, изјави Меџити, додавајќи дека средствата ќе се користат за инвестиции во водовод, канализација, управување со отпад и едукација на граѓаните.

На работна средба со раководството на ЗЕЛС, Меџити го претстави Конкурсот за финансирање на еколошки проекти за 2025 година и ги охрабри општините да аплицираат за да станат двигатели на позитивни промени во своите заедници.

„Време е за акција!“, потенцираше тој.

Реконструкцијата на улицата „Стив Наумов“ во Битола влегува во својата завршна фаза, информираат од Општината. Работите се одвиваат на последната делница од вкупно 2200 метри колку што изнесува должината на улицата, а целокупната инвестиција изнесува 51.218.181 денари.

При увидот во градежните активности, градоначалникот Тони Коњановски истакна дека со овој проект се решаваат децениски проблеми на граѓаните, особено преку замената на старите водоводни и канализациони цевки и изградбата на нов коловоз.

„Ова не е само асфалт – ова е инфраструктура што носи квалитет, безбедност и сигурност во секојдневието. Денес градиме подобра утре, затоа што секој метар е чекор напред,“ изјави Коњановски.

Жителите на оваа улица позитивно реагираат на промените, потенцирајќи дека комплетната реконструкција значително ќе го подобри квалитетот на живот и условите за движење низ овој дел на градот.

Градоначалникот нагласи дека општината останува фокусирана на реализација на крупни инфраструктурни проекти, кои директно го подобруваат секојдневието на граѓаните.

Поранешниот градоначалник на Кочани, Љупчо Папазов, кој поднесе оставка по трагичниот пожар во дискотеката „Пулс“, оди во куќен притвор. Истата мерка е изречена и за уште тројца осомничени, по барање на обвинителството за замена на притворот. Меѓу нив се и поранешниот директор на Државниот пазарен инспекторат Горан Трајковски, еден инспектор и член на обезбедувањето.

Во куќен притвор се и неговите претходници на функцијата градоначалник – Ратко Димитриевски и Николчо Илијев. На поранешниот министер за економија, Крешник Бектеши, му е продолжен притворот за нови 30 дена.

Другите поранешни министри за економија, Ваљон Сарачини и Беким Незири, се исто така во куќен притвор, додека за Дритон Кучи се изречени мерки на претпазливост. Во меѓувреме, судот во Кочани ги разгледува жалбите на 12 осомничени.

Јавното обвинителство денеска демантираше дека обвинител се повлекол од случајот