Основниот кривичен суд Скопје, денеска ја објави пресудата за предметот против Стевчо Јакимовски, кого го прогласи за виновен заедно со уште едно обвинето лице кое е поранешен вработен во Општина Карпош, пренесе Скопје1.

„Двајцата обвинети ги огласи за виновни за кривичните дела кои им се ставаат на товар и ги осуди на начин што: С.Ј. се осудува на единствена казна затвор во траење од 3 години 6 месеци, додека Т.Ѓ. му изрече алтернативна мерка – Условна осуда во траење од 2 години затвор која нема да се изврши доколку во следните 5 години не стори ново кривично дело“, велат од Кривичен суд.

При денешната објава на пресудата судијата ја изрази својата загрижност што оваа постапка трае повеќе од 6 години, како и дека за истото нема разумно оправдување.

Целиот текст на Скопје 1 со клик ТУКА.

По долги години без вистински саемски простор, Владата на Република Македонија ја разгледува можноста за изградба на нов, модерен саемски комплекс во главниот град.

На вчерашната средба меѓу директорот на Службата за општи и заеднички работи на Владата, Ивица Томовски, и претставници на компанијата „Скопски саем“, се дискутирале можни локации, инфраструктурни решенија и идните чекори кон реализација на овој значаен проект.

„Враќањето на ‘Скопски саем’ во сопствен објект не само што ќе ја оживее економската активност, туку и ќе го зајакне регионалниот и меѓународниот профил на Македонија како важен трговски и деловен центар“, изјави Томовски по средбата.

Од страна на „Скопски саем“ беше изразена подготвеност за соработка со државните институции во процесот на подготовка и реализација на проектот.

„Саемите се многу повеќе од обични изложби. Тие се двигатели на економијата, алатки за промоција на домашните производи, но и средби каде се отвораат нови бизнис можности и соработки. Недостигот од соодветен простор последниве години е сериозен хендикеп за нашата земја“, нагласи директорката на „Скопски саем“, Даниела Глигоровска.

Таа додаде дека со изградбата на модерен саемски објект, Македонија ќе може повторно да се позиционира како важен играч на балканската саемска мапа.

Жителите на Скопје се израдуваа на најавата од Владата.

Жителите сметаат дека ова ќе биде добра инвестиција.

„Конечно! Главен град без саем, единствен во регионот. Само ние трампавме саем за застарен концепт на мол-лименка и станбени згради! – гласи еден од коментарите на темава.

Некои сметаат дека овој комплекс треба да биде надвор од Скопје.

И покрај зголемените напори за подигнување на еколошката свест, Северна Македонија продолжува да се справува со алармантни количини на комунален отпад. Според најновите податоци на Државниот завод за статистика, во 2024 година секој граѓанин во просек создал 438 килограми отпад – што значи дека вкупното количество создаден комунален отпад изнесува 790.866 тони. Иако ова претставува намалување од 12,9% во однос на 2023 година, еколошката состојба останува загрижувачка.

Најмногу отпад се собрало во Скопскиот регион – 180.729 тони или речиси 30% од вкупниот отпад. Градот Скопје, како најголем урбан центар, логично доминира со најголеми количини, но и со најголеми предизвици во управувањето со отпадот.

Од вкупно собраните 637.471 тон отпад, дури 84% потекнува од домаќинствата, што го нагласува потребниот фокус на решенија на ниво на индивидуална и семејна практика. Останатите 16% се отпад од правни и физички лица, односно комерцијален отпад.

Кога станува збор за видови отпад, речиси целосно доминира мешаниот комунален отпад, кој изнесува 546.866 тони или 85,8% од вкупниот собран отпад. На спротивниот крај од спектарот се наоѓа отпадот од гума, со едвај 1.136 тони или 0,2%.

Но, можеби најзагрижувачки е фактот дека 99,8% од целиот собран отпад завршува на депонии – најголем дел од нив несанитарни и без систем за селекција или рециклирање. Ова го поставува прашањето: дали навистина еволуираме кон циркуларна економија или едноставно го одложуваме проблемот под земја?

„Трендот на мало намалување на создадениот отпад не треба да нè задоволува. Сè додека отпадот речиси целосно се складира, без да се рециклира или повторно искористи, Македонија останува далеку од современите европски практики“, велат од еколошките организации.

Време е прашањето за отпадот да стане не само тема на јавни политики туку и на колективна одговорност. Инаку, ќе продолжиме да тонеме – не само во отпад, туку и во еколошка неодржливост.

Извор: Рацин.мк