Денеска претпладне подлегна на повредите Стојанче Стефанов од Кочани кој се лекуваше во Белград по пожарот во дискотеката „Пулс“, потврди министерот за здравство Арбен Таравари за ТВ21.

Пациентот е роден 2001 година.

Станува збор за пациент, кој од првиот ден, согласно извршената првична тријажа од медицинските тимови е веднаш упатен на лекување во Воено Медицинската Академија во Белград и кој беше интубиран и во критична состојба во изминатиот месец.

Станува збор за пациент со 27 отсто зафатеност со изгореници и сериозни повреди од вдишување на чад. 

Во ВМА е опериран на 4 април и поставен на ЕКМО апарат, преку кој се оксигенира крвта преку машина, заради вдишаниот чад. Но, заради сериозноста на повредите, тој поголем дел од хоспитализацијата бил нестабилен и во тешка општа состојба.

Министерството за здравство изразува најдлабоко сочувство до фамилијата и до сите засегнати од трагедијата во Кочани.

Извор: ТВ21

Претседателот на Движење Беса Биљал Касами оцени дека нема да има криза во владината коалиција по одлуката на Алијанса на Албанците на Таравари самостојно да оди на изборите за совети на општините. Од друга страна дефинитивно нема да има соработка на коалицијата „Вреди“ со АА на Таравари на локалните избори за градоначалници.

– Тоа поглавје е затворено, а ние како коалиција „Вреди“ одлучивме да одиме заедно со градоначалници и со членови на советот и советници, а што се однесува до владина криза, нема таква можност, Владата има стабилно мнозинство. И самиот Таравари кажа дека не е подготвен да излезе од владината коалиција – изјави денеска од Тетово, Биљал Касами.

Според него, владиното мнозинство може и да се зголеми.

– Од друга страна веќе има понуди и барања разговори со други политички фактори во делот на опозицијата кои се подготвени да бидат дел од владиното мнозинство, така да ценам дека оваа ситуација нема да ја разниша и Владата, напротив, владиното мнозинство ќе биде уште поголемо – одговори Касами.

Тој  присуствуваше на отворањето на „Инфо центар” во близина на градскиот плоштад.

Пензионираниот полицаец С.Д. од Штип, кој вчера не беше достапен на органите на прогонот, денеска се пријави во Обвинителството за гонење организиран криминал и корупција, потврдија од институцијата. Според нив, С.Д. во моментов е изведен пред судија на претходна постапка, каде се одлучува за натамошниот тек на случајот.

С.Д. е еден од десетте полициски службеници опфатени со истрагата за пожарот во дискотеката „Пулс“ во Кочани, кој се случи пред неколку дена.

Од Министерството за внатрешни работи вчера информираа дека меѓу седум полициски службеници што требаше да бидат приведени е и С.Д., кој тогаш не беше најден. Станува збор за поранешен началник на униформирана полиција во Штип, со долгогодишна кариера во СВР Штип, каде што и неколку членови на неговото семејство се активни припадници на полицијата.

Според податоците од МВР, во времето кога се случил настанот во Кочани, С.Д. ја извршувал функцијата главен инспектор за сообраќај во Одделението за полиција при СВР Штип.

Обвинителството досега определи мерки за претпазливост за шест полициски службеници, додека тројца веќе беа претходно приведени. Случајот се води во насока на утврдување на институционални пропусти и евентуална одговорност за пожарот, кој предизвика значителен јавен интерес.