Најдобрите фудбалски репрезентации наскоро ќе ги дознаат противниците за Светското првенство кое следната година ќе се одржи во САД, Канада и Мексико, а Македонија сè уште има шанса преку европскиот бараж да обезбеди пласман.

Глобалната фудбалска смотра ќе се одржи од 11 јуни до 19 јули 2026 година во 16 градови домаќини. Ова ќе биде прво Светско првенство во проширен формат со 48 репрезентации, распоредени во 16 групи од по три селекции, од кои првите две ќе продолжат во осминафиналето.

Свечената церемонија беше отворена од легендарниот италијански тенор Андреа Бочели, по што на сцената се појавија водителите Хајди Клум и Кевин Харт. По нив се обрати претседателот на ФИФА, Џани Инфантино, кој ја искористи приликата официјално да му ја додели на американскиот претседател Доналд Трамп нововоспоставената Награда за мир.

Во образложението беше наведено дека Трамп одиграл значајна улога во процесите за наводно помирување меѓу Израел и Палестина, како и меѓу Србија и Косово.

Соединетите Американски Држави (САД) објавија нова и контроверзна Стратегија која сигнализира драматична промена во односот кон Европа, пренесува „Фајненшл тајмс“. Документот, кој повикува на јакнење на актуелните политики на Европската Унија (ЕУ), предизвика сериозна нервоза кај европските лидери, оценувајќи дека Европа се наоѓа на пат кон „цивилизациско исчезнување“ поради високите стапки на миграција и нискиот наталитет.

Стратегијата, која е на 33 страници, ги обвинува европските влади за поткопување на демократијата и ги прозива европските челници за „блокирање на американските напори“ за ставање крај на војната во Украина. Документот тврди дека европските лидери го игнорираат „големото европско мнозинство кое сака мир“.

Во однос на конфликтот, Стратегијата нагласува дека „брз прекин на непријателствата е клучен, со цел да се стабилизираат европските економии, да се спречи ескалација и ширење на војната и повторно да се воспостави стратешка стабилност со Русија“.

Објавувањето на Стратегијата се совпаѓа со напорите на американскиот претседател Доналд Трамп да го протурка мировниот договор за Украина, иако Киев и европските престолнини стравуваат дека ваков потег оди во прилог на Москва и рускиот претседател Владимир Путин.

„Фајненшл тајмс“ истакнува дека документот предизвикал голема загриженост поради стравувањата дека Вашингтон е подготвен да го принуди Киев да направи отстапки кои ги надминуваат досегашните „црвени линии“.

Стратегијата ја потврдува радикалната промена на американската надворешна политика под водство на Трамп, ставајќи ја доминацијата на САД над западната хемисфера како главна цел – ажурирана верзија на доктрината на Монро.

„Деновите во кои САД го носеа целиот светски поредок како Атлас се завршени“, стои во документот, нагласувајќи го продлабочениот идеолошки јаз меѓу Вашингтон и традиционалните европски сојузници.

Европа е опишана како континент каде „економскиот пад го засенува уште посериозна закана – цивилизациско исчезнување“.

Новата американска политика отворено ја предизвикува ЕУ со „култивирање на отпорот на сегашната европска траекторија во рамки на европските нации“.

Документот ја поздравува засилената улога на евроскептичните крајнодесничарски партии, чие доаѓање на власт во европските земји би можело да ја доведе во прашање иднината на Унијата.

„Американската дипломатија треба да брани вистинска демократија, слобода на изразување и несрамежливо славење на националните идентитети“, се наведува во стратегијата, „Соединетите Американски држави ги охрабруваат своите политички сојузници во Европа да поддржат таква преродба на духот, а растот на влијание на татковинските европски партии дава причина за оптимизам“, заклучува документот.

Извор: National Security Strategy | PDF | China | World Politics

Коалицијата „Продолжуваме со промените – Демократска Бугарија“ (ПП–ДБ) поднесе барање за гласање недоверба на Владата на премиерот Росен Жељазков, повикувајќи се на неуспеси во економската политика. Ова е шесто гласање за недоверба насочено кон актуелниот кабинет и доаѓа по серијата масовни протести низ Бугарија. Иницијативата беше регистрирана во Народното собрание со поддршка од „Алијансата за права и слободи“ (ДПС) и МЕХ (БСП за Бугарија).

Претседателот на ПП–ДБ, Асен Василев, на брифинг во Парламентот изјави: „Очигледно, Владата не ги слушна масовните протести и не поднесе оставка. Денеска, како што ветивме, поднесовме гласање за недоверба на Владата“.

Василев истакна дека ова гласање за недоверба е прво што се одвива со активно учество на најмладата генерација во земјата. „Иднината им припаѓа ним и ние сме должни да ја обезбедиме“, рече Василев, цитиран од БТА. Тој исто така најави дека доколку Владата не поднесе оставка, ќе организираат „уште поголем протест“ од оној на 1 декември, кој ќе се совпадне со денот на расправа за гласањето, најверојатно вторник или среда, повикувајќи ги сите граѓани да се приклучат.

Пратеникот Божидар Божанов од ПП–ДБ изрази очекување за брзи предвремени избори со поголема излезност, со цел купените гласови да бидат „удавени“, а политичкиот противник Делјан Пеевски да остане „изборно џуџе“. Тој нагласи дека следните избори мора да бидат масовни и фер, а Делјан Пеевски мора да биде изолиран од политичкиот систем.

Ивајло Мирчев апелираше до Пеевски да престане да ја користи „етничката карта“ и да не ги злоупотребува бугарските Роми и Турци како „човечки штит“. Мирчев тврди дека Пеевски во сабота ги собира регионалните координатори за да им даде квоти за организирање на контрапротест следната недела.

Во врска со поднесеното гласање за недоверба, лидерот на ГЕРБ, Бојко Борисов, изјави дека секоја партија има право да го побара тоа и дека треба да се разгледаат мотивите.

Премиерот Росен Жељазков, претходно во текот на денот во Парламентот, категорично изјави дека Владата нема да поднесе оставка. Тој го оправда ова со фактот што Владата е посветена на управувањето, а економијата на земјата бележи брз раст.