Изет Меџити, вицепремиерот и лидер на Демократското движење, од коалицијата Вреди вели дека премиерот Христијан Мицкоски ќе одлучува за продолжување на учеството на Алијансата за Албанците на Арбен Таравари во владата. Но, Меџити смета дека не е во ред Алијансата за Албанците и да соработува со ДУИ и да остане во Владата. Ова го објави ТВ 21.

Натаму телевизијата истакнува: „За ова ќе побарате мислење од Мицкоски. Но јас зборувам во име на коалицијата Вреди. Вреди е јасна: не е можно и со Вреди и со ДУИ. Не оди да се биде и со ДУИ и во владата.“ – нагласи Изет Меџити.

Меџити е убеден дека постои соработка меѓу ДУИ и АА, нагласувајќи дека Таравари не треба да ја крие оваа соработка. „Тоа е проблем на Таравари. Тој треба да појасни, да не ја крие соработката со ДУИ. Легитимно е да соработуваат, не можеме да им го забраниме тоа, но не треба да заборавиме дека тие 107 илјади гласови на парламентарните избори лани ги добивме поради нашето ветување пред граѓаните.“ – истакна Меџити.

Лишени од слобода две лица во Демир Хисар, предизвикале пожар на градската депонија

На 22.04.2025 во 13.30 часот полициски службеници од ОВР Демир Хисар ги лишиле од слобода С.Ф.(28) и А.С.(48), двајцата од Прилеп, поради сомнение за сторено кривично дело „предизвикување општа опасност” по член 288 од Кривичниот законик. Тие се сомничат дека предизвикале пожар на градската депонија во Демир Хисар, а при преглед кај нив се пронајдени предмети со кои го предизвикале пожарот. По документирање на настанот, против нив ќе следува соодветна пријава.

Повредени пациенти од трагедијата во Кочани се враќаат од лекување во странство

Министерството за здравство соопшти дека денеска петмина од повредените во несреќата во Кочани се враќаат од лекување во Клиничкиот центар во Србија. Согласно утврдениот протокол, тројца од нив ќе бидат сместени на Клиниката за пулмологија, еден пациент ќе продолжи под надзор на Клиниката за пластична хирургија, а уште еден ќе биде хоспитализиран во Хируршката клиника „Св. Наум Охридски“.

Вчера, уште еден пациент се врати од лекување во Хрватска и е под опсервација на Клиниката за пластична хирургија. Со ова, бројот на пациенти што сè уште се лекуваат во странство се сведува на 38.

Во земјава, во моментот се лекуваат седум пациенти: четворица се хоспитализирани во Хируршката клиника „Св. Наум Охридски“, еден на Клиниката за пластична хирургија и двајца во приватната болница „Систина“.

Министерството нагласува дека внимателно ја следи состојбата на повредените и дека приоритет останува обезбедување квалитетен третман и успешна рехабилитација за секој пациент.