Полски министер за надворешни работи жестоко го критикува Путин: „Дали немате доволно земја?“

Полскиот министер за надворешни работи, Радек Сикорски, го искористи своето годишно обраќање во парламентот за жестоко да го критикува рускиот претседател Владимир Путин. Во својот говор, Сикорски го праша Путин: „Дали немате доволно земја?“

Оваа изјава следува по извештајот во медиумите дека Путин наводно понудил прекин на агресијата против Украина на постоечките борбени линии како дел од можното мировно решение, што го наговести потпретседателот на САД, Џеј Ди Ванс.

Полска е еден од најсилните сојузници на Украина, а Сикорски во својот говор директно го напаѓа Кремљ, велејќи: „Единаесет временски зони, а вие тоа не го сметате за доволно?“

Тој додава: „Посветете се на подобро управување со она што веќе го имате внатре во вашите граници, согласно со меѓународното право.“

Олга Љубимова ќе ја претставува Русија на погребот на папата Франциск.

Русија на погребот на поглаварот на Римокатоличката црква, папата Франциск, кој ќе се одржи во сабота, ќе ја претставува министерката за култура Олга Љубимова. Веста ја потврди денеска Кремљ, откако претходно беше објавено дека претседателот Владимир Путин нема да присуствува на церемонијата.

Портпаролот на Кремљ, Дмитриј Песков, изјави дека Љубимова ќе отпатува во Ватикан по одлука на претседателот Путин.

Рускиот претседател од почетокот на инвазијата врз Украина во февруари 2022 година нема остварено ниту една посета на западна земја.

Путин во понеделникот оддаде почит на починатиот папа Франциск, кој почина на 89-годишна возраст, опишувајќи го како „мудар водач и постојан бранител на високи човечки вредности и правда“.

Тие двајцата се сретнаа три пати – за време на кусите посети на Путин на Ватикан во 2013, 2015 и 2019 година.

Силен земјотрес во Истанбул: Повредени 236 лица, регистрирани 127 последователни потреси

Во Истанбул денеска, нешто по пладне, беше почувствуван силен земјотрес со јачина од 6,2 степени според Рихтеровата скала, со епицентар во Мраморното Море, во близина на округот Силиври. Според податоците од Управата за справување со катастрофи и вонредни состојби на Турција (АФАД), по главниот потрес следеле дури 127 последователни земјотреси, од кои најсилниот бил со јачина од 5,9 степени.

Министерот за внатрешни работи, Али Јерликаја, потврди дека иако нема загинати, една зграда е срушена во централната општина Фатих, а девет куќи се евакуирани како мерка на претпазливост.

Министерот за здравство, проф. д-р Кемал Мемишоглу, информираше дека 236 лица се повредени, од кои 173 во Истанбул, 24 во Текјрдаг и Сакарија, две во Јалова и три во Бурса. Поголемиот дел од повредите настанале како резултат на скокање од повисоки места поради паника.

„Во град со 16 милиони жители, како што е Истанбул – поголем од 131 држава во светот – добивме нешто над 10.000 повици, што е релативно мал број“, рече Јерликаја, додавајќи дека поголемиот дел од повиците биле информативни или поврзани со загриженост за безбедноста на објектите.

Канцеларијата на гувернерот објави дека за граѓаните кои не се чувствуваат безбедно да се вратат во своите домови, се отворени училишни дворови, спортски сали и џамии како привремени засолништа.

Турската црвена полумесечина активно се вклучи во помошта, обезбедувајќи храна, топли и ладни пијалаци и вода на граѓаните. Претседателката на организацијата, Фатма Мерич Јилмаз, изјави дека над 1.000 вработени и волонтери, како и 65 мобилни кујни, веќе се распоредени низ Истанбул, а план е тој број да се зголеми на 3.000.