Семејство од селото Нови Комар во Донбас, на територијата на самопрогласената Донецка Народна Република (ДНР), два месеца го криела ранетиот руски војник во подрумот на својот дом, бегајќи од украинските сили кои ја контролираа околината, јави телевизискиот канал RT.

Според сведочењето на 34-годишниот доброволец Артем Књазјев, по ранувањето за време на неуспешен обид за евакуација, повеќе од две недели поминал криејќи се на отворено, избегнувајќи украински дронови.

Конечно, одлучил да се скрие во зграда на периферијата на селото. Кога влегол во подрумот, го затекнал брачниот пар – 60-годишниот Јуриј и 56-годишната Наталија Алако, кои веќе се криле таму откако им била бомбардирана куќата.

Во тој момент се облекувавме. Одеднаш се помести завесата и се слушна глас: „Има ли некој?“ Гледаме – руски војник со ранета нога. Секако, го нахранивме, но се уплашивме – во соседната куќа беа војници на Вооружените сили на Украина. Мислевме: ако го видат, ќе има три мртви веднаш – раскажала Наталија.

Следните два месеца, семејството се грижело за ранетиот војник, разговарале заедно, славеле Нова година и чекале спас. Књазјев бил евакуиран на 1 февруари 2025 година, кога руските сили влегле во селото. Потоа се слушал со семејството од болницата, кое во меѓувреме било преселено во Донецк.

Во февруари, двајца руски војници за време на евакуацијата во местото Богојевленка (Добровољје) исто така спасиле цивили од украински дронови. Еден од евакуираните, Олег Гиманов, сведочел дека операторите на дроновите сигурно знаеле дека гаѓаат колона со цивили.

Руската војска изврши напад со прецизни ракети во петокот на локација во украинскиот град Криви Рих (или Кровој Рог, според рускиот назив), каде што се одржувал состанок на командантите на украинските вооружени сили и западни воени инструктори, соопшти руското Министерство за одбрана.

Претходно, во петокот вечерта, украинскиот претседател Володимир Зеленски изјави дека рускиот ракетен напад врз Криви Рих, во југоисточниот дел на земјата, при што загинале 19 лица, јасно покажува дека Москва „не сака прекин на огнот“.

„Секој ракетен напад и напад со беспилотно летало покажуваат дека Русија сака само војна. Само со меѓународен притисок на Русија и сите можни напори за зајакнување на Украина, нашата воздушна одбрана и вооружени сили, ќе се одреди кога ќе заврши оваа војна“, напиша Зеленски на платформата Telegram.

Од Москва, пак, првично одговорија дека руските напади „исклучително“ се насочени кон воени цели во Украина и претставуваат одговор на украинското непочитување на договорот што бил издејствуван од САД, а кој ја задолжува Украина да не напаѓа енергетските и цивилни објекти во Русија.

„На 4-ти април, во 18:49 часот по локално време, ракета со висока прецизност и високоексплозивно полнење беше истрелана врз местото на кое се одржуваше состанок на командантите на украинските единици и западните инструктори во еден ресторан во градот Криви Рих“, се наведува во извештајот на руското Министерство за одбрана.

Според извори од руската страна, загубите на украинската војска при овој напад изнесувале 85 воени лица и офицери од странски земји, како и 20 возила.

Овој удар врз странските воени лица се случи на денот кога Зеленски одржуваше „длабински разговори“ со мала група странски земји за учество на нивните сили во контингент што би дејствувал како безбедносна гаранција за Украина. Зеленски пред состанокот изјави дека очекува „поконкретни“ одговори од сојузниците на Киев за нивната подготвеност да учествуваат во такви сили, иницијатива на која Русија силно се спротивставува и се заканува со жесток одговор.

Подоцна во ноќта, властите именувани од Москва во источната украинска област Дњепропетровск преку Telegram канали известија дека во Криви Рих повторно се слушале детонации. Според овие извори, во овој регион и во повеќе други области низ Украина, во текот на ноќта била прогласена тревога за воздушен напад.

Украинската Национална канцеларија за борба против корупција (НБУ) и Канцеларијата на специјализираните обвинители за борба против корупција (САПО) разоткриле присвојување на 733 милиони украински хривни (16,5 милиони евра) за време на набавка на храна за украинската армија.

Во оваа афера се осомничени поранешен началник во Министерството за одбрана, сопственик на фирми за снабдување, двајца директори на компании и уште една личност. Тие се товарат за присвојување државни средства во време на руската инвазија, пренесува Украинска Правда.

Истражителите откриле дека за време на 2022. и 2023. година, залихите на храна за армијата биле распределени преку однапред составени „комплети храна“ избрани од каталог од 409 артикли. Меѓутоа, само 10% од тие производи – како што се зеленчук, житарки, месо и вода – редовно биле нарачувани. Останатите, вклучувајќи зачини, желатин или шумско овошје, ретко или никогаш не се нарачувале поради нивната сезонска природа, пренесува Index.hr.

Јајца чинеле 0,37 евра по парче

Овој систем им овозможил на добавувачите да манипулираат со цените – вештачки зголемувајќи ги трошоците за производи со голема побарувачка, додека ги намалувале цените на непопуларни или сезонски производи. На прв поглед не било забележано кршење на правилата, бидејќи вкупната цена на комплетите останала непроменета. Сепак, компирот, кој бил испорачан во илјадници тони, чинел цело богатство, додека сезонското овошје, кое ретко се нарачувало, имало многу ниска цена – се вели во соопштението на НБУ.

Стручната анализа потврдила дека две фирми под ист сопственик на оваа нелегална шема заработиле 16,5 милиони евра. Дел од средствата потоа биле пренасочени под изговор на дивиденди и финансиска помош на поврзани фирми. Истражителите сомничат дека парите биле искористени за купување хотели во Хрватска и друг имот.

По медиумските извештаи, вклучувајќи ги и оние за јајцата кои чинеле 17 украински хривни (0,37 евра) по парче, осомничените ги намалиле цените на 11 најпобаруваните производи.