Поранешниот главен командант во Украина, генерал Сергеј Суровикин, сериозно размислувал за употреба на нуклеарно оружје за да ја спречи Украина да напредува кон Крим во есента 2022 година, се наведува во извештајот на Њујорк Тајмс, кој го пренесе Њузвик.

Нуклеарната реторика во голема мера го карактеризираше и влијаеше на текот на целокупната инвазија на Русија во Украина, која трае повеќе од три години.

Акциите на САД под претседателството на Џо Бајден често биле ублажени токму поради стравот од нуклеарна ескалација на најголемиот копнен конфликт во Европа од Втората светска војна.

Рускиот лидер Владимир Путин ги стави руските сили за нуклеарно одвраќање во состојба на висока подготвеност кога руските сили влегоа во Украина во февруари 2022 година, а рускиот министер за надворешни работи Сергеј Лавров изјави неколку месеци подоцна дека ризиците од нуклеарен конфликт станале „значителни“.

Генерал Суровикин, кој кратко време ги водеше руските операции во Украина помеѓу октомври 2022 и јануари 2023, размислувал за употреба на тактичко нуклеарно оружје за да се спротивстави на украинското напредување – за време на блескавата контраофанзива кон крајот на летото и есента 2022 година – на југот на Украина кон Крим, кој беше окупиран и анектиран од страна на Русија во 2014 година, како што објави NYT во саботата.

За разлика од стратешкото нуклеарно оружје, тактичкото нуклеарно оружје е дизајнирано за употреба на бојното поле. Ова оружје е далеку помалку моќно и е дизајнирано да се користи против различни цели од стратешкото нуклеарно оружје, кое може да уништи цели градови.

Американските проценки за руските залихи на тактичко нуклеарно оружје се околу 2.000 активни боеви глави.

Шансите се зголемиле до 50 отсто

Во тој период, американските разузнавачки агенции процениле дека шансите Москва да го употреби своето нуклеарно оружје во Украина биле помеѓу пет и десет проценти, според извештајот на NYT. Во случај Украина успешно да напредуваше на југ во својата контраофанзива, што можеше да ја загрози руската окупација на Крим, проценката била дека шансите би се зголемиле на 50 проценти.

Во тој период, украинските сили се спротивставуваа на руската моќ и предност на територијата која руските сили на Владимир Путин брзо ја зазеле во текот на првите недели од својата инвазија, фокусирајќи се на североистокот и југот на Украина, додека Русија очајнички се обидуваше да се одржи на истокот. Од 29 август 2022 година, Киев започна нова офанзива за да ги потисне Русите од градот Херсон и да се врати на источниот брег на реката Днепар. До ноември, руските сили се повлекоа преку реката, а Украина повторно го зазеде градот Херсон. Пошироката област Херсон, заедно со соседните региони Запорожје и Донбас (региони од Донецк и Луганск), беа анектирани од Русија кон крајот на септември истата година, иако Кремљ сè уште не ја контролира целосно оваа територија, а анексијата беше меѓународно отфрлена како незаконска.

Киев ветил дека ќе го врати анектираниот полуостров Крим, а доколку украинските сили го заземат поголемиот дел од Херсон или целиот регион, тоа би го загрозило рускиот „копнен коридор“ што Москва го контролира и кој ги поврзува руските сили.

Суровикин го доби прекарот „Генерал Армагедон“ поради бруталноста која ја покажал за време на руските операции во поддршка на режимот на Башар ал Асад во Сирија, кој беше тргнат од власт во блескавата контраофанзива на сириските исламски побуненици кон крајот на минатата година.

Отпуштањето и исчезнувањето од јавноста

На местото на врховен руски командант во Украина во јануари 2023 година, го замени генерал Валериј Герасимов, началник на Генералштабот на руската армија.

Руските државни медиуми известија во август 2023 дека Суровикин е сменет од функцијата шеф на Воздухопловно-космичките сили на Русија. Тој беше видливо отсутен од јавноста откако руските платеници од Вагнер групата, предводени од поранешниот сојузник на Путин и шеф на оваа приватна војска Евгениј Пригожин, се побунија против Кремљ во јуни и тргнаа на „марш кон Москва“, кој Пригожин го прекина, а два месеци подоцна загина во авионска несреќа под неразјаснети околности.

Некои независни руски и западни медиуми шпекулирале дека Суровикин имал блиски врски со оваа група и нејзиниот шеф. Генералот Валериј Залужни, поранешен главен командант на украинската војска, кој сега е амбасадор на Украина во Велика Британија, во коментари објавени од украинските медиуми, изјавил дека „постојат директни закани за употреба на тактичко нуклеарно оружје од страна на руските вооружени сили под одредени околности“.

Францускиот претседател Емануел Макрон денеска ќе одржи средба во Елисејската палата со претставници на сите економски сектори погодени од новите американски царини.

Американскиот претседател Доналд Трамп објави воведување на основна царинска стапка од 10 отсто за сите увозни производи, со дополнителна стапка од 20 проценти за Европската Унија. Ова отвори нова трговска војна, со потенцијално сериозни последици за глобалната економија, инфлацијата и економскиот раст.

Француските производители на вино и жестоки пијалаци веќе предупредија дека нивниот извоз во САД ќе се намали за најмалку 20 отсто, откако новите тарифи беа објавени.

Макрон ќе се обиде да утврди заеднички пристап кон ситуацијата и можни одговори за заштита на европските компании од овие мерки.

Претставникот за инвестиции на Владимир Путин, Кирил Дмитриев, се состана вчера со американски официјални претставници во Вашингтон, додека администрацијата на Трамп ги разгледува деловните зделки со Москва, иако Русија продолжува да води војна против Украина. САД мораа да ги укинат санкциите против Дмитриев се со цел тој да може да присуствува на состанокот.

Дмитриев е највисокиот руски функционер што отпатува во САД за државен бизнис по започнувањето на војната во 2022 година. Не е познато што разговарал со американските официјални лица, но има блиски односи со тимот на Трамп од изборите во 2016 година, кога беше откриено руско мешање во корист на Трамп.

Иако вчера администрацијата на Трамп не ја вклучи Русија во списокот на земји со нови царини, Украина доби царина од 10%. Сепак, американски сенатори предлагаат секундарни санкции за земјите што ја поддржуваат Русија, доколку Москва продолжи да ги нарушува мировните преговори.

Предлог-законот предлага царини од 500% на увозот од земји што купуваат гориво и ураниум од Русија. Ова законодавство, што предвидува високи царини на клучните руски извозни производи, се смета за значаен чекор во обидите да се стави крај на агресијата на Путин.

Сенаторите Линдзи Греам и Ричард Блументал се главни спонзори на нацрт-законот што ќе воведе санкции против Русија и земјите кои ја поддржуваат. Романко од „Разом ние стоиме“ изјави дека законот може да го намали приходот на Кремљ од фосилни горива, но исто така смета дека САД мора да забранат на американските компании како Шлумбергер да работат во рускиот сектор за фосилни горива. Само целосното затворање на приходите од нафта и гас може да го ослаби Путин и да донесе мир во Украина.