Американскиот претседател Доналд Трамп повторно се закани на Иран со воена интервенција, ако Техеран не го потпише договорот за нуклеарната програма. Во интервју за Ен-Би-Си, Трамп изјави: „Ако тие (Иранците) не го потпишат договорот, ќе има бомбардирање“.

Трамп потврди дека се водат разговори меѓу американски и ирански претставници, но не прецизираше за што точно се дискутира.

На 7 март, Трамп испрати писмо до иранските власти, предлагајќи преговори со цел да го спречи развојот на иранското нуклеарно оружје, предупредувајќи на можноста од воена интервенција. Иранските власти одговорија дека се против директни преговори под „максимален притисок и закани“, но исто така изразија подготвеност за индиректни контакти.

Иран и САД немаат дипломатски односи од 1980 година, а интересите на САД во Иран ги претставува Амбасадата на Шведска.

Според Меѓународната агенција за атомска енергија (МААЕ), иранската нуклеарна програма напредуваше значително во последните четири години, при што Иран е поблиску од кога било до производство на нуклеарно оружје. Сегашните резерви на Иран се на ниво од 60% збогатен ураниум, што е доволно за производство на шест нуклеарни бомби доколку се збогатат до 90%.

Во 2015 година, Иран склучи договор со Франција, Германија, Велика Британија, Кина, Русија и САД за регулирање на својата нуклеарна програма, во замена за ублажување на меѓународните санкции. Меѓутоа, во 2018 година, за време на првиот мандат на Трамп, САД се повлекоа од договорот и повторно воведоа санкции против Иран. Како одговор, Иран зголеми своите резерви на збогатен ураниум на 60%.

Иран негира дека сака да развие нуклеарно оружје и тврди дека нуклеарната енергија ја користи за цивилни цели, додека западните земји остануваат сомнителни во врска со овие тврдења.

Пробна ракета, која имала за цел да почнат да се лансираат сателити од Европа, денеска се урна на земјата и експлодира 40 секунди по полетувањето од Норвешкиот вселенски центар.

Ракетата „Спектрум“ беше најавена како прв обид за орбитален лет од Европа, каде неколку земји, вклучувајќи ги Шведска и Велика Британија, изразија желба да заземат дел од растечкиот пазар за комерцијални мисии во вселената.

Германскиот стартап „Исар Аероспејс“, кој предупреди дека првичното лансирање може да заврши предвреме, рече дека тестот обезбедил „обемни податоци од кои нивниот тим може да учи“.

Американскиот претседател Доналд Трамп изјави дека е подготвен да воведе секундарни царини од 25 до 50 проценти на целата руска нафта, ако почувствува дека Москва ги попречува неговите напори за ставање крај на војната во Украина. Овие царини може да стапат на сила во рок од еден месец, доколку не дојде до прекин на огнот.

Во интервју за „Ен Би Си Њуз“, Трамп изрази незадоволство и гнев кога рускиот претседател Владимир Путин го критикувал кредибилитетот на украинскиот претседател Володимир Зеленски. Трамп истакна дека планира да разговара со Путин оваа недела.

Трамп, кој во текот на својата претседателска кампања за 2024 година постојано ветуваше дека ќе стави крај на, како што ја нарекува, “смешната војна” во Украина, беше силно фокусиран на ова прашање по неговото преземање на функцијата на 20 јануари. Тој повеќе пати побара нови избори во Украина и во еден момент го нарече Зеленски диктатор.

Во петокот, Путин предложи Украина да биде ставена под привремена администрација за да се овозможат нови избори и потпишување важни договори.

„Ако Русија и ние не можеме да постигнеме договор за прекин на крвопролевањето во Украина, и ако верувам дека Русија е виновна за тоа, ќе воведам секундарни царини за руската нафта“, изјави Трамп. „Тоа значи дека ако купувате нафта од Русија, нема да можете да работите во САД“, додаде тој.

Трамп напомена дека царините ќе стапат на сила во рок од еден месец доколку не се постигне договор за прекин на огнот. Тој исто така нагласи дека иако е лут на Путин, имаат добри односи и дека неговата лутината ќе се смири ако Путин ја направи „правилната работа“.