Инфо +

Шилегов: Би ги укинал инспекциите, да не постои државен инспекторат

Тој се осврна на неколку проблеми со кои се соочуваат општинските инспекторати, како и на потребата од итно менување на постојната регулатива.

– Недавањето на градоначалниците моќ или оставањето можност за институционален пинг-понг е причина поради која се наоѓаме во ваква состојба на терен. На пример, јас сакам да спроведам акција на Битпазар. Треба да се молам со Пазарна. Да не бидам лошо разбран, не велам дека е лоша соработката. Но, мојата правна позиција е дека треба да се молам со пазарната инспекција. Понатаму, во Железара има улица која ги дели општините Гази Баба и Бутел. Инспектор за животна средина од Бутел фаќа на лице место сторител како исфрла шут, човекот се легитимира, но шутот го исфрла десно, во Гази Баба. И инспекторот не му може ништо,посочи Шилегов.

Скопје, според него, е многу поспецифично од другите единици на локална самоуправа имајќи го предвид, како што рече, дуализмот во локалната самоуправа. Затоа, посочува, одлучивме дека е паметно ова што го имаме како концепт.

– Еве да го отвориме предизвикот – да ги укинеме државните инспекции, имаме најкатастрофален Државен инспекторат за животна средина, со многу субјективни слабости, јас така ги дефинирам некои појави за кои сме сите свесни дека постојат. Па, Градскиот инспекторат излегува да мери ниво на загаденост на реки, па градски инспекторат фаќа криминал со медицински отпад. Медиумите се тука, прашајте ги обвинителите до каде се со тој предмет. Знаете дека стои? По прес-конференцијата тогаш, пред пандемијата, се крена малку фама, почнаа некои дописи, дојдоа некои истражители, фати пандемијата и се е под радар. Затоа системот за кој ние воочуваме дека е нефункционален треба да се исправи, со законски измени, рече Шилегов.

Затоа, се надоврза тој, и се предлага регионален пристап во инспекторирањето, имајќи предвид дека не сите општини имаат капацитет да издржат инспекторат на свој грб, ниту пак имаат толкав човечки потенцијал.

– Сакам чекор по чекор да ги реализирам работите – ќе го направиме унифицирањето на инспекциските служби во општините од територијата на Град Скопје, ќе инсистирам до крај за носење на закон за комунална полиција која што не е само скопска, туку напротив, предвидува можност за регионализација, па ќе дојдеме до тоа дека треба да се укинат лиценците за инспекции, па ќе го предизвикаме државниот инспекторат, рече Шилегов.

Додаде дека категоријата на морална и човечка одговорност, надвор од политичката одговорност, за носителите на јавна функција е сериозен недостаток на нашето општество.

– Треба поодговорно да ја сфатиме функцијата која што ја имаме и да овозможиме да се формира систем кој што е функционален. Добриот дел од работата е што во СДСМ тоа го имаме увидено. И во програмата на Владата, ако видите, добар дел од овие работи за кои зборувам, а за кои сме се бореле внатре во партијата да влезат во приоритети, влегоа во приоритети и се во Програмата на Владата како измени на законски текстови или носење закони, рече Шилегов.

Преговорите со Европската Унија, додаде тој, не ни ги носат вредностите на Европската Унија, туку, како што посочи, нашето менување во категоријата одговорност во работата што ја работиме ќе не однесе во квалитетно функционирање на институциите, како што впрочем сите посакуваме.

– Ама, никако да се централизира, не! Да се дисперзира, да се знае кој е крив. Ние сега имаме позиција дека градоначалниците можеби се добар чадор, политички гледано. Пример, паркирање на кеј. Логично е како граѓанин да викате „што прави градоначалникот”? Логично е. Затоа треба да внимаваме кога посакуваме централизација. Не, ние треба да дисперзираме, да унифицираме во смисла на лиценци и тогаш ќе може слободно да кажеме „е, сега, не е толку лесно и едноставно да ни се случуваат некои работи, како што ни се случуваат, нагласи Шилегов. мс/ац/

Балкан

Човек држен две години во заложништво без струја и вода во приколка во Горски Котар

По две години терор, полицијата конечно им стави крај на двајца осомничени кои експлоатирале 42-годишен хрватски државјанин.

Осомничените се приведени под сомнение дека, користејќи закани, измами и психолошка манипулација, го довеле несреќниот маж во подредена положба на апсолутна зависност.

Жртвата била држена во нехумани услови и систематски злоупотребувана. Не само што бил принудуван да врши тешка физичка работа БЕЗ НИКАКОВ НАДОМЕСТ, туку експлоататорите оделе дотаму што целосно му го присвојувале имотот, претворајќи го неговиот живот во вистински пекол.

Оваа сурова приказна за злоупотреба и трудова експлоатација во срцето на Хрватска предизвика шок во јавноста. Полициската истрага продолжува со цел да се расветлат сите детали од ова стравично дело.

Балкан

Нова трагедија во Никшиќ: Пукање на улица, неколку лица ранети

Пресметка со огнено оружје го потресе Никшиќ, кога во локален ресторан дошло до пукање, при што се повредени А.М. и М.Ј., потврди Полициската управа (УП). Иако поврзаноста на жртвите со организираниот криминал фрла тешка сенка врз инцидентот, полицијата засега е претпазлива, не можејќи експлицитно да потврди дека станува збор за класична пресметка на криминалните кланови.

Повредените, кои се познати како членови на организирана криминална група, веднаш биле пренесени во Медицинскиот центар во Никшиќ. За инцидентот е информиран и надлежниот обвинител во Вишото државно обвинителство во Подгорица.

Полицијата веднаш реагираше со полна сила. Блокирана е пошироката и непосредната област околу местото на злосторството. Воспоставена е блокада на градот со цел да се спречи бегството на сторителот.

Се преземаат интензивни активности за идентификување на напаѓачот и утврдување на сите околности под кои е употребено оружјето.

И покрај тоа што имињата на повредените се поврзани со подземјето, Управата на полицијата истакнува дека не сака да шпекулира:

„Нагласуваме дека, иако оштетените се членови на организирана криминална група, во овој момент не можеме да потврдиме дека овој настан е поврзан со активностите на организираните криминални групи, сè додека не се соберат повеќе информации и не се утврдат сите факти и околности.“

Јавноста ќе биде навремено информирана за исходот од оваа истрага која е во полн ек. Дали станува збор за приватна расправија или за уште еден чин во војната на клановите допрва ќе се утврдува.

Свет

Американските воени сили нападнаа венецуелски танкер: Обвиненија за пиратство на Карибите

Отвореното море стана сцена на меѓународна драма откако американските сили извршија заплена на огромен танкер под санкции, што предизвика жестока дипломатска бура и најави за жалба пред меѓународните институции од страна на Венецуела.

Во акција која изгледаше како сценарио од холивудски блокбастер, американски воени хеликоптери со вооружени командоси се спуштија со јажиња на палубата на бродот, што беше потврдено со снимки објавени од американските служби. Десет маринци, десет припадници на Крајбрежната стража и специјални единици полетаа од воениот брод „Џералд Форд“ распореден во Карибите за да ја извршат мисијата.

Реакцијата од Каракас беше бурна. Министерот за внатрешни работи, Диосдадо Кабељо, не ја штедеше острината, нарекувајќи ги САД „убијци, крадци, пирати“.

„Џек Спероу таму е херој, но овие типови се вистински криминалци на отворено море,“ саркастично порача Кабељо, повикувајќи се на филмот „Пиратите од Карибите“.

Претседателот Николас Мадуро додаде: „Ова е меѓународно пиратство. Венецуела никогаш нема да стане нафтена колонија.“

Венецуелската влада соопшти дека ќе ја брани својата сувереност, природните ресурси и националното достоинство „со апсолутна решителност“.

Од друга страна, претседателот Доналд Трамп со доза на триумф ја потврди акцијата, истакнувајќи дека станува збор за „многу голем танкер, најголем досега“ запленет од САД.

На прашањето што ќе се случи со запленетата нафта, Трамп беше директен: „Мислам дека ќе ја задржиме.“

Јавната обвинителка Пем Бонди ја опиша операцијата како заедничка акција на ФБИ, Министерството за одбрана, Министерството за внатрешна безбедност и Крајбрежната стража, објаснувајќи дека бродот превезувал санкционирана нафта од Венецуела и Иран.

Компанијата „Вангард“ го идентификуваше бродот како „Скипер“, кој според нивните податоци, долго време ја лажирал својата позиција. Танкерот е под американски санкции уште од 2022 година поради наводна вмешаност во нелегален шверц на нафта за Хезболах и Исламската револуционерна гарда.

Локацијата на заплената не е откриена, но овој инцидент е прв од ваков вид за венецуелска нафта од воведувањето на санкциите против Каракас во 2019 година.