Додека европските лидери се собраа во Брисел во обид да покажат непоколеблива поддршка за Украина, Eлон Маск упати нова провокација кон украинскиот претседател Володимир Зеленски.

„Украина мора да одржи избори. Зеленски убедливо ќе ги изгуби“, напиша Маск на својата платформа Х.

Оваа провокација доаѓа по извештајот на Политико, кој објави дека блиски соработници на Доналд Трамп организирале тајни состаноци со политички опоненти на Зеленски, испитувајќи дали Украина може да организира брзи претседателски избори.

Сепак, анкетите покажуваат сосема различна слика од тврдењата на Маск. Најновите истражувања на јавното мислење укажуваат дека Зеленски убедливо би победил ако изборите се одржат сега.

34,2% од Украинците би гласале за сегашниот претседател, додека најблискиот противкандидат, поранешниот шеф на Генералштабот на Украинската армија и сегашен амбасадор во Велика Британија, Валери Залужни, има само 17,9% поддршка.

Поранешниот претседател и опозициски лидер со кого луѓето на Трамп се сретнале, Петро Порошенко, има само 8,2% поддршка. Поголема поддршка немаат ниту останатите опозиционери, како Јулија Тимошенко со 5,3% и поранешниот сопартиец на Зеленски, Дмитро Разумков, со 5%.

Администрацијата на американскиот претседател Доналд Трамп планира да го отповика привремениот правен статус на околу 240.000 Украинци што побегнале од конфликтот со Русија, рекол висок функционер на администрацијата на Трамп и три извори запознаени со ова прашање, што потенцијално ќе ги забрза депортациите.

Мерката се очекува да стапи во сила веќе во април, што претставува остар пресврт од политиката на добредојде за Украинците за време на администрацијата на претседателот Џо Бајден, вели Ројтерс.

Планираното укинување на заштитата за Украинците беше во тек пред Трамп јавно да се судри со украинскиот претседател Володимир Зеленски минатата недела. Овој потег е дел од пошироката стратегија на администрацијата на Трамп за одземање на правниот статус на повеќе од 1,8 милиони мигранти на кои им беше доделен привремен хуманитарен статус во САД за време на администрацијата на Бајден, велат изворите.

Портпаролката на американското Министерство за домашна безбедност, Триша Меклахлин, рече дека засега нема официјални изјави на оваа тема. Белата куќа и украинската амбасада не одговориле на барањата за коментар.

Белата куќа истакна дека повторното одобрување на помошта за Украина ќе зависи од обновената доверба.

„Американскиот претседател Доналд Трамп ќе размисли за продолжување на воената помош за Украина доколку се постигне договор за мировни преговори и ако се преземат чекори за обновување на довербата“, изјави денеска советникот за национална безбедност, Мајк Волц.

Трамп ја прекина помошта за Украина во понеделникот, а во вторникот изјави дека добил писмо од украинскиот претседател Володимир Зеленски, во кое тој изразува подготвеност за преговори.

Волц оцени дека писмото е „добар и позитивен прв чекор“.

Пред некое време, Зеленски го посети Вашингтон и влезе во расправија со Трамп, кој го обвини украинскиот претседател дека не сака мир. Војната трае веќе повеќе од три години.