Балкан

Ден на жалост во БиХ, продолжува потрагата по телата на жртвите

Вторник е ден на жалост во Босна и Херцеговина додека спасувачките тимови ја продолжуваат потрагата по исчезнатите во поплавите и свлечиштата што минатата седмица го погодија северниот дел на Херцеговина и централна Босна.

Поради противењето на српските министри во Советот на министри на БиХ да се прогласи ден на жалост на државно ниво, вчера донесоа посебни одлуки од властите на двата ентитета и областа Брчко.

Потрагата по исчезнатите во поплавите и одроните продолжи во вторникот во најтешко погоденото село Доња Јабланица и Бутуровиќ Поље во општина Коњиќ.

Спасувачките тимови, меѓу кои и оние од Хрватска, Словенија, Србија и Црна Гора, досега пронајдоа безживотни тела на 21 лице на овие места и во Фојница во централна Босна.

Целата тешка механизација во моментов е фокусирана на чистење на главните и локални патишта. Тие ја пробиваат тињата на патиштата, а во исто време се врши поправка на водоводната, електричната и телефонската мрежа.

Во Херцеговина и натаму најтешка е состојбата на трасата кон Острошац и Бутуровиќ поле, а затворен е и патот до Долјани и Совиќи и се работи на санирање на свлечиштето. Главниот пат што ги поврзува Сараево и Мостар се уште е отворен само за возила за итни случаи.

Метеоролошките служби во Босна и Херцеговина предупредија дека подрачјето на северниот дел на Херцеговина и централна Босна може повторно да биде зафатено од обилни врнежи во текот на ноќта и во среда, поради што се стравува од нови поплави и лизгање на земјиштето.

Тие особено се плашат од ова во Доња Јабланица, село од кое повеќето е срамнето со земја при пад од карпа од див каменолом лоциран на ридот над селото. Овој „камен порој“ беше активиран од ненормални врнежи од дури 320 литри на метар во еден ден, што е просечна количина на врнежи за четири месеци.

Владата на Херцеговско-неретванската жупанија соопшти дека каменоломот воопшто немал дозвола за работа. Компанијата Сани д.о.о. Јабланица, која беше формално заведена како сопственик, никогаш не доби концесија за вадење камен.

Надлежната инспекција во неколку наврати им забрануваше да работат, па дури им изрекуваше и парична казна, но жителите на Доња Јабланица тврдат дека таму вадењето камен се одвива со години.

Балкан

Рама поддржува ограничување на правото на вето за новите членки на ЕУ

Албанскиот премиер Еди Рама оцени дека предложената идеја на Европската Унија за ограничување на правото на вето на новите членки на почетокот од нивното членство е „добра“. Предлогот има за цел да ги смири скептичните главни градови кон проширувањето на Унијата.

„Мислам дека е добра идеја“, изјави Рама за „Политико“ пред самитот ЕУ-Западен Балкан. Тој додаде дека несогласувањата во ЕУ се неизбежни, но дека пристапот на Албанија ќе се разликува од оној на Унгарија кога станува збор за блокирање на политиката на Унијата.

Рама потенцираше дека новите членки треба отворено да ги искажуваат своите ставови, но на крајот да се придржуваат кон колективните одлуки. Албанија се смета за еден од фаворитите за полноправно членство, со цел да стане членка на ЕУ до 2030 година.

Балкан

ЕУ ја укинува блокадата кон Косово: 205 милиони евра помош наскоро достапни

Европската Унија одлучи да ги укине сите санкции против Косово до крајот на јануари 2026 година, што ќе овозможи на земјата да добие 205 милиони евра помош на почетокот на новата година. Одлуката следи по мирната транзиција на локалната власт во северните општини со мнозинство Срби.

Санкциите, кои досега предизвикаа штета од над 613 милиони евра, се однесуваа на клучни сектори како животната средина, енергетиката, дигитализацијата и културата.

Претседателката на Косово, Вјоса Османи, преку социјалните мрежи изрази благодарност до лидерите на ЕУ и сите партнери на Косово за признавањето на посветеноста на земјата во овие процеси.

Балкан

Масовни дојави за бомби во училишта низ БиХ, учениците евакуирани

Утрово повеќе основни и средни училишта во Тузланскиот кантон во Босна и Херцеговина добија дојави за бомби, што доведе до прекин на наставата и итна евакуација на учениците и персоналот. Полициските екипи се на терен и преземаат мерки за проверка на заканите. Според неофицијални информации, пријавите главно биле испраќани преку електронски адреси.

Владата на Тузланскиот кантон и Министерството за образование и наука соопштија дека сите активности се спроведуваат во согласност со законските и безбедносните протоколи. „Училишните администрации и наставниот кадар дејствуваат одговорно, а безбедноста на учениците, наставниците и другите вработени е апсолутен приоритет“, велат од Владата. Учениците беа безбедно евакуирани и испратени во своите домови.

Покрај Тузла, дојави за бомби беа пријавени и во училишта во Република Српска, вклучувајќи градови како Бања Лука, Приједор, Прњавор, Лакташи, Требиње и Добој. Полицијата веднаш започна контрасаботажен преглед и обезбедување на објектите.