Во фаза на доказна постапка денеска во Основниот суд Тетово повеќе од пет часа траеше главната расправа во судскиот процес за обвинетите Флорин Бесими и Артан Етеми како и правното лице ЈЗУ Клиничка болница за кривично дело „тешки дела против општата сигурност“, во врска со пожарот во модуларната болница во која животите ги загубија 14 лица.

Пред Судот искази дадоа и беа сослушани вешти лица кои во текот на истрагата изработиле вештачења.

Прво овластениот судски вештак по електротехника Ирфан Шаќири пред Судот образложи дека по наредба на Јавно Обвинителство извршил вешт наод за можните индиции за појава на пожар во објектот на модуларната болница за првото судење и останува на фактите изнесени во тој извештај.

При поставените прашања од Обвинителството тој рече дека целокупната постапка за доведување на електрична енергија од трафостаница до модифицираниот објект наречен модуларна болница е направен од две неквалификувани лица, вработени во Клиничка болница.

– Во комуникација со нив во врска со определување на тип на проводник тие не понудија документ. Рекоа дека се направени пресметки врз основа на разговор со повозрасни електричари кои им кажале каков кабел да користат од трафостаница за да има струја во објектот, рече Шаќири.

На прашање на одбраната, дали се согласува со прашањето дека инсталацијата е изведена во спротивно од стандардите, вештото лица одговори со „да“.

Рубин Бошковски од Министерството за внатрешени работи кој изврши форензичко испитување истакна дека при вештиот наод утврдиле настанување на механичко оштетување на продолжителниот кабел поради нагмечувања или превиткување, на кој бил приклучен дефибрилатор.

– Високата температура довела до согорување на изолацијата од кабелот и создавање на пламен, посочи Бошковски.

На прашање дали при увидот биле забележани противпожарни апарати, Бошковски рече дека не биле евидентирани во самата болница.

Сведочеше и професорката Анита Грозданова од Технолошко-металуршкиот факултет која ги испитувала материјалите од кои е составена модуларната болница.

– Материјалите за изработка на префабрикуваниот контејнер ги задоволуваат барањата според спецификацијата на Министерството за здравство и истите се анализирани според процедури за соодветни својства за што гарантирам, рече професорката Анита Грозданова.

Од Технолошко-металуршкиот факултет, сведочеше и Свето Цветковски, кој ги испитувал металите кои се користени при изведба на привремените објекти познати како модуларни болници. И тој потврди дека металните материјали се според спецификацијата наложена од Министерството за здравство.

Универзитетските професори Влатко Стоилков и Владимир Димчев од Факултетот за електротехника и информациски технологии при Универзитетот „Свети Кирил и Методиј“ во Скопје, изработиле вешт наод и мислење во писмена форма за тоа дали модуларните болница биле изградени според проектната задача согласно барањата на договорниот орган.

– Според препораките на Светска Банка во Македонија имало четири типски објекти, а во Тетово бил изграден типски објект со ознака ЦЕ (латинско C). Во просториите на овие објекти, на еден кревет имало по една приклучница за електрична енергија (штекер) за еден и еден приклучок за кислород, рече Стоилков.

За професорот Владимир Димчев немаше други прашања, а тој рече дека останува на ставовите дадени во писмениот вешт наод и мислење.

По сослушувањето на вештите лица одбраната побара да се сослушаат и вештите лица од Германија кои имаат изработен извештај. Судијата Реџеп Муса истакна дека според насоките на повисокиот Апелациски суд предлогот на одбраната се одбива.

– Постојат доволно докази за околности на настанот, посочи судијата.

Судијата ја прекина главната расправа поради истекување на работното време и ја закажа за 8 април во 9 часот и 30 минути кога се предвидува да се читаат писмените докази од одбраната. Закажани беа и уште два термини на 22 и на 28 април исто така во 9 часот и 30 минути.

Заклучно со денешниот ден, во рамките на апелот на Црвениот крст за помош на настраданите од пожарот во Кочани, собрани се 112.595.482 денари.

До сега, Црвениот крст изврши прва исплата на средствата на семејствата на загинатите и на повредените лица кои се лекуваат како во земјата, така и во странство.

Денес беше извршена и втората исплата, која ќе биде насочена за поддршка на семејствата настрадани во трагичната несреќа во Кочани. Вкупно, од овие два трансфери, исплатени се 60.850.000 денари од досега собраните средства, информираат од Црвениот крст.

Дополнително, од Црвениот крст истакнуваат дека во соработка со надлежните институции во државата, како и со министерствата и Владата, кои се задолжени за проценка на видовите штети во вакви ситуации, се работи на утврдување на начин на кој ќе се продолжи со распределбата на собраните средства. Целта е да се обезбеди навремена и вистинска поддршка за лекување и за справување со последиците од катастрофата.

-Црвениот крст, заедно со нашите партнери, продолжува со испорака на психосоцијална и друга поддршка на настраданото население. Поради големиот интерес за донирање, апелот за собирање средства продолжува и понатаму, велат од Црвениот крст.

Тие упатуваат голема благодарност до сите кои донирале и придонеле за помош на настраданите.

Вчера попладне наводно се случил трагичен инцидент во Скопје, на улица која според видеото објавено на социјалните медиуми личи на Ферид Бајрам во Бутел 2, на потегот од Чаир кон Железара.

Според информациите кои се достапни од видеото, моторџија прегазил дете. Во моментов нема дополнителни информации за состојбата на детето.

Видеото објавено на социјалните мрежи ја прикажува улицата без пешачки премин, а се забележува и брзото возење на возачите и моторџиите.

Извор: Локално.мк