Управата за финансиска полиција, поднесе кривична пријава до Основното Јавно Обвинителство – Скопје, против три службени лица во Министерството за земјоделство, шумарство и водостопанство.

Првопријавениот во својство на службено лице во Министерството за земјоделство, шумарство и водостопанство согласно Решение несовесно постапувал при вршење на своите овластувања, на начин што во текот на 2021 и 2022 година не изготвил записник за одземање на владението на правниот субјект ДЗС Илинден АД Скопје иако на 07.10.2021 година уредно му била доставена Изјава за раскинување на договорот за закуп на правниот субјект ДЗС Илинден АД Скопје бр. 39-7689/1 од 28.09.2021 година, спротивно на член 37 од Законот за земјоделско земјиште, дополнително првопријавениот несовесно постапувал во вршењето на своите овластувања и должности и како службено лице во Подрачна единица при МЗШВ во период од 16.09.2020 година до 15.04.2022 година на начин што не ја доставил Изјавата за еднострано раскинување до надлежните служби на МЗШВ – Гази Баба за истата да биде евидентирана во ФАРМ системот и правниот субјект ДЗС Илинден АД Скопје да биде избришан од Единствениот регистар на земјоделски стопанства, со што првопријавениот му овозможил на ДЗС Илинден АД Скопје да прибави корист за себе и тоа незаконско владение и плодоуживање на државно земјоделско земјиште, како и незаконско користење на финансиски средства од Агенцијата за финансиска поддршка во земјоделството и рурален развој за период од 2021 до 2024 година во вкупен износ од 15.052.001,00 денари.

Второпријавената во својство на службено лице во Министерството за земјоделство, шумарство и водостопанство во период од 15.04.2022 до 24.08.2022 година, како и во период од 16.09.2020 година до 15.04.2022 година, во својство на службено лице во Министерството за земјоделство, шумарство и водостопанство, ги повредила законските прописи за совесно постапување при вршење на своите овластувања на начин што во текот на 2021 и 2022 година Изјавата за раскинување на договорот за закуп на правниот субјект ДЗС Илинден АД Скопје не ја доставила до надлежните служби на МЗШВ-Гази Баба за истата да биде евидентирана во ФАРМ системот и правниот субјект ДЗС Илинден АД Скопје да биде избришан од Единствениот регистар на земјоделски стопанства, со што второпријавената му овозможила на ДЗС Илинден АД Скопје да прибави корист за себе и тоа незаконско владение и плодоуживање на државно земјоделско земјиште, како и незаконско користење на финансиски средства од Агенцијата за финансиска поддршка во земјоделството и рурален развој за период од 2021 до 2024 година во вкупен износ од 15.052.001,00 денари.

Третопријавениот во својство на функционер во Министерството за земјоделство, шумарство и водостопанство во период од јануари 2022 до ноември 2023 година ги повредил законските прописи за совесно постапување при вршењето на своите овластувања со пропуштање на должен надзор над комисијата за одземање на владение врз основа на престанок на склучени договори за закуп, формирана од страна на Министерот, во однос на одземањето на владение на државното земјоделско земјиште на правното лице ДЗС Илинден спротивно на чл.49 од Законот за организација и работа на органите на државната управа. Оваа одговорност вклучува имплементација и одржување на внатрешни контроли кои се релевантни за процесот на одземање на владение на државно земјоделско земјиште врз основа на донесена Изјава за еднострано раскинување на договорот поради неподмирени обврски за закуп, во согласност со одредбите од релевантната законска и подзаконска регулатива, стратешките документи и воспоставени политики. 

Третопријавениот иако бил задолжен да организира и обезбедува законито и ефикасно вршење на работите и задачите, со пропуштање на должен надзор несовесно постапувал во вршење на своите овластувања, односно не преземал дејствија за утврдување на фактичката состојба во однос на одземање на владението на ДЗС Илинден АД Скопје, со што третопријавениот му овозможил на ДЗС Илинден АД Скопје да прибави корист за себе и тоа незаконско владение и плодоуживање на државно земјоделско земјиште, како и незаконско користење на финансиски средства од Агенцијата за финансиска поддршка во земјоделството и рурален развој за период од 2021 до 2024 година во вкупен износ од 15.052.001,00 денари.

Реален и рационален е оптимизмот дека Македонија ќе ги стартува преговорите со Унијата. И претседателката Сиљановска вели дека го дели ставот на Мицкоски дека се поголем е бројот на држави кои ја разбираат позицијата на Македонија и бараат решение кое нема да биде на штета на нашата држава.

Прашањето добива регионален карактер бидејќи застојот на македонската интеграција според претседателката негативно влијае и врз државите од регионот и врз самата унија.

Вчерашната средба на Мицкоски со францускиот претседател Макрон во Будимпешта е значаен исчекор, смета и вицепремиерот Николовски.

 Макрон во моментов неспорно е лидер на Европа, имајќи предвид дека Владата во Германија е пред пад и дека извесно е дека не подоцна од март 2025 година таму ќе има избори. Тој е политичар којшто има највисока поддршка и најстабилен мандат во рамки на ЕУ од сите големи земји членки и на конференција којашто трае само еден ден, да одвои толку време за да се сретне со премиерот на Македонија, мислам дека многу говори и за личниот авторитет што го има премиерoт Мицкоски и за угледот што го ужива Македонија“, вели Николоски.

По средбата со Макрон, Мицкоски вчера рече дека е уште поголем оптимист за одблокирање на европскиот пат на Македонија, без да се наштети на државните интереси. Средбата ја потврдија и од Елисејската палата во чие соопштение стои дека претседателот Макрон ја потврдил поддршката за европската интеграција на Македонија која мора да ги почитува меѓународните обврски.

Иако на самитот во Будимпешта присутвуваше и бугарскиот претседател, сепак Мицкоски не оствари средба со Радев.

Министерката за енергетика, рударство и минерални суровини, Сања Божиновска, ја истакна значајноста на зајакнувањето на соработката помеѓу Македонија и Естонија во областа на геологијата и рударството, како дел од заложбите за создавање отпорен и одржлив рударски сектор. Во партнерство со Геолошкиот завод на Македонија, Министерството беше домаќин на експертска делегација од Естонија, со цел продлабочување на соработката и размена на знаења и искуства.

„На средбата го потенциравме значењето на усогласувањето на македонскиот рударски сектор со европските стандарди и важноста од одржливи индустриски практики. Ова партнерство ќе придонесе за развој на рударскиот сектор во согласност со нашите еколошки и економски приоритети,“ истакна министерката Божиновска.

На средбата беа разгледани можностите за споделување позитивни практики, подобрување на регулаторните рамки и создавање заеднички проекти во областа на геолошките истражувања, новите технологии и заштитата на животната средина. Директорката на Геолошкиот институт на Естонија, г-ѓа Сирли Сип Кули, ги пофали регулаторните напори и експертизата на македонскиот тим, потврдувајќи ја важноста на професионалноста и посветеноста на тимот на министерката Божиновска.

Со оваа соработка, Северна Македонија и Естонија се стремат да остварат заеднички цели и европски стандарди во секторите на геологијата и рударството, со што се отвораат нови можности за одржлив економски раст и заштита на животната средина во двете држави.