Спорт

Кузмановски со гол од десет метри ни донесе бод во пресметката со Австрија

На почетокот од втората фаза на Светското првенство, македонските ракометари одиграа драматично реми против Австрија со резултат 29-29 (14-13). Натпреварот се одигра во „Арена Вараждин“ пред малкучисна публика, но понуди голема борба и возбудлив финиш.

Нашиот селектор Кирил Лазаров не можеше да смета на Јагуриновски поради болест, а во стартната постава тргнаа Кузмановски, Митев и Велковски во бековската линија, додека крилни напаѓачи беа Атанасијевиќ и Костески, со Лазаревски на позиција кружен напаѓач. Првиот гол за Македонија го постигна Лазаревски, отворајќи го резултатот на натпреварот. Следеше размена на голови, а Митев и Атанасијевиќ донесоа рано водство од 3-1. Кизиќ се истакна со неколку одбрани, меѓу кои и еден пенал, што ѝ помогна на Македонија да задржи предност во првиот дел од полувремето.

Сепак, Австријците постепено се вратија во игра, а со серија голови од Белос и Хутечек првпат поведоа пред крајот на првото полувреме. На пауза се замина со резултат 14-13 во корист на Австрија.

Во вториот дел, Австрија тргна агресивно и поведе со два гола разлика. Сепак, Македонија не се предаде – Кузмановски, Џонов и Велковски донесоа израмнување, а потоа и водство од 18-17. Натпреварот продолжи во неизвесен ритам со размена на голови, а драма се создаде во последните минути.

Во завршницата, на две минути пред крајот, Кузмановски промаши пенал, но на спротивната страна Дамбул го искористи својот обид за да ја врати предноста на Австрија (28-27). Митев израмни со прекрасен гол, а во последниот напад Македонија успеа да постигне израмнувачки гол за конечни 29-29.

Најефикасни кај Македонија беа Марко Митев со шест голови и Пешевски со пет, додека капитенот Кузмановски додаде четири. Кај Австрија, исто така, шест голови постигна Лукаш Хутечек.

Ова реми е важен бод за нашата репрезентација, која продолжува со натпреварите во втората фаза од Светското првенство.

Спорт

Македонија стана полноправна членка на Медитеранската ракометна конфедерација

Македонската ракометна федерација (РФМ) денеска објави дека нашата земја е примена како полноправна членка на Медитеранската ракометна конфедерација. Досега Македонија имаше статус на придружна членка.

Одлуката беше донесена на седмиот конгрес на Медитеранската конфедерација, кој се одржа во рамките на изборниот конгрес на Меѓународната ракометна федерација во Каиро, Египет.

Следната година македонските ракометарки и ракометари ќе имаат активна улога на меѓународната сцена. Пионерките ќе учествуваат на Медитеранскиот шампионат во февруари во Приштина, додека кадетите ќе настапат во април во Словачка. Сениорите ќе се борат за медалите на Медитеранските игри во август во италијанскиот град Таранто.

Спорт

Омерагиќ: Посетата на Мамадов отвора нова фаза за македонскиот фудбал

Во „Куќа на фудбалот“ се одржа средба меѓу раководството на Фудбалската федерација на Македонија и Елкан Мамадов, директор за асоцијации и развој во ФИФА и еден од најблиските соработници на претседателот Џани Инфантино.

Претседателот на ФФМ, Масар Омерагиќ, истакна дека посетата на Мамадов претставува силна потврда за одличната соработка со ФИФА и континуираната поддршка што федерацијата ја добива во реализацијата на стратешките цели, со посебен акцент на инфраструктурата и зајакнувањето на националните селекции.

Омерагиќ најави дека веќе се договара и посета на претседателот на ФИФА, Џани Инфантино, во првата половина на 2026 година, што дополнително ќе ја зацврсти соработката и ќе отвори нови можности за развој на македонскиот фудбал.

Тој нагласи дека ФФМ останува целосно посветена на принципите што се од клучно значење за ФИФА – транспарентност, одговорност и долгорочен развој на фудбалот на сите нивоа во Македонија.

Спорт

ФФМ и Масар Омерагиќ со честитка до Шкендија за европскиот успех

Фудбалската федерација на Македонија и нејзиниот претседател Масар Омерaгиќ упатија честитки до фудбалскиот клуб Шкендија за изборениот пласман во елиминациската фаза од УЕФА Лигата на конференции.

Од ФФМ оценуваат дека остварениот успех е резултат на професионален пристап, изразен тимски дух и јасна амбиција за докажување на меѓународната сцена. Воедно, пласманот на Шкендија се посочува како значаен придонес за промоција на македонскиот клупски фудбал во европските натпреварувања.

„Успехот на Шкендија е потврда за квалитетната работа на клубот и неговото претставување надвор од границите на државата“, се наведува во честитката од Фудбалската федерација.
ФФМ им посака на фудбалерите и на стручниот штаб на Шкендија успешни и квалитетни настапи во продолжението од европската кампања, со надеж дека клубот ќе продолжи достојно да ја претставува Македонија на меѓународната фудбалска сцена.