Македонија

ПЕСТИЦИДИ БИЛЕ НАЈДЕНИ И ВО ПИПЕРКИ, ГРОЗЈЕ, МОРКОВИ… И покрај контролите на рафтовите се протнува небезбедна храна

Од Агенцијата за храна и ветеринарство велат дека се врши добра контрола и дека генерално, граѓаните во земјава јадат безбедна храна.

Во текот на целата 2024 година, Системот за брзо известување за небезбедна храна и храна за животни на ЕУ (RASSF), испратил вкупно 23 нотификации, од кои 13 се однесуваат на небезбедна храна по потекло од Македонија, а останатите се поради увоз на небезбедна храна.

Од тие 23 известувања, 16 се однесуваат на храна од неживотинско потекло, 5 за небезбеден материјал кој дошол во контакт со храната, 1 нотификација се однесува на храна од животинско потекло и 1 на добиточна храна.

– Станува збор за 9 алерт нотификации што значи дека небезбедната храна веќе била пласирана на пазарот, 8 нотификации се однесуваат на одбиена пратка од граница, 3 се информации за проследување и 3 се информации за внимание. Според категоријата на небезбедниот производ доминира категоријата храна од неживотинско потекло, овошје и зеленчук од примарно производство и конзервирана – преработена храна и небезбеден материјал кој доаѓа во контакт со храна од неживотинско потекло. Во однос на видот на засегнатата храна станува збор за небезбеден производ од примарно производство, свежи моркови, пиперки, печурки, зелка, конзервирани производи од примарно потекло, органско какао, млечни чоколадни барови, семки од кајсија, замрзнати лижавчиња, пилешки копани, крвна смеса за прасиња – велат од АХВ.

Во 2024 година за определување присуство на резидуи од пестициди лабораториски се испитани 170 мостри. Добиени се 8 позитивни мостри на одредени резидуи од пестициди за производи како што се бабури, пиперки, грозје, кафеав ориз, моркови и корнишони, земени од скопскиот, кумановскиот и од струмичкиот регион.

Инаку покрај лабораториските тестирања кои се вршат во рамки на инспекциските контроли, обврска за секој оператор со храна е да воспостави план за вршење лабораториски тестирања на производите во поглед на безбедноста и квалитетот, во прв ред за исполнување на микробиолошките критериуми за безбедност на производите, како и на другите општи и посебни услови за безбeдност кои треба задолжително да ги исполнуваат производите.

– При сомнеж за безбедност и квалитет и самите оператори можат да пратат мостри за лабораториско испитување заради докажување дека производот е во согласност со законски дефинираните параметри за безбедност и квалитет и она што е дефинирано во декларацијата – порачуваат од Агенцијата.

По уништувањето на македонската зелка на хрватската граница поради присуство на штетна хемикалија, но и другите случаи од претходно, од Агенцијата за храна и ветеринарство за Плусинфо велат дека храната во земјава е предмет на контрола во рамки на редовните, но и на вонредните контроли, кога се постапува по претставки поднесени од граѓани и од правни лица и по добиени PASSF нотификации (известувања кои АХВ ги добива преку Европскиот систем за известување за небезбедна храна), како и во рамки на контролите по мониторинг програмите за безбедност и квалитет на храната.

– Кога станува збор за храна за луѓето која се увезува во земјава, АХВ врши задолжителна контрола на секоја увозна пратка на граничните премини и има законска обврска да ги информира потрошувачите за небезбедна храна, а тоа го прави преку објави на интернет страната на Агенцијата (https://fva.gov.mk/mk/izvestuvanje-otpovikuvanje-nebezbedni-proizvodi) и преку известувања кои Агенцијата ги праќа до електронските и пишаните медиуми – велат од Агенцијата.

Од Агенцијата велат дека генерално граѓаните во земјава јадат безбедна храна, иако инциденти со храна од домашно производство или од увоз, секогаш се можни.

– Реализираните контроли во 2024 година во внатрешниот промет и при увоз (117.465 контроли), ветуваат дека не само што ќе се достигнат, туку и ќе се надминат лани реализираните 125.909 контроли на операторите со храна во земјава и на пратки кои се увезуваат и транзитираат низ државава. Внатрешниот промет на храна од неживотинско и животинско потекло, од почетокот на 2024 година заклучно со ноември е покриен со реализирани триесеттина илјади контроли кај оператори во рамки на редовните, вонредните и реализирани контролни надзори. Како небезбедни уништени се педесеттина тони храна. За утврдените недоследности издадени се околу 2.000 решенија за нивно отстранување, а изречени се и приближно 300 парични казни – велат од Агенцијата.

Инспекторите за храна на граничните премини, како небезбедни, лани вратиле или уништиле 7 пратки со над 74 тони небезбедна храна од неживотинско потекло.

Што се однесува на контролите на официјалните ветеринари на граничните премини, при увоз на храна од животинско потекло, добиточна храна и увоз на живи животни во 2024 година, 14 од пратките биле небезбедни. Вратени се 9, а уништени се 5 пратки од увоз.

Извор: plusinfo.mk

Македонија

Се што треба да знаете за „Safe City“

Казнувањето на сообраќајните прекршоци преку системот „Безбеден град“ официјално ќе започне на 1 февруари, наместо на првично најавениот датум 1 јануари. Одложувањето е потврдено за ТВ21 од помошник-заменик министерот во МВР, Мухамет Исмаили, кој објасни дека причина за пролонгирањето е потребата од дополнителни технички проверки и усогласување на правните процедури.

„Од 01.02.2026 системот SafeCity целосно ќе биде ставен во функција во Скопје, Куманово и Тетово, како и на Коридорите 10 и 8, додека во другите градови се предвидува да започне во текот на 2026 година“, изјави Исмаили.

Од Министерството за внатрешни работи најавуваат и можност за одредена толеранција кај ограничувањата на брзината. „Треба да ги почитуваме ограничувањата – 50 км/ч за урбани подрачја значи 50 км/ч. Секако дека и ние ќе внимаваме, исто како што прават и сите европски градови каде што имаат свои параметри за толеранција – таква толеранција ќе има и кај нас“, изјави Сашо Топаловски, началник на СВР Скопје.

Системот „Безбеден град“ ќе работи со фиксни камери кои ќе регистрираат пречекорување на брзината, поминување на црвено светло, нерегистрирани возила и други прекршоци. Дополнително, специјализирани полициски возила ќе идентификуваат неправилно паркирање и останати нарушувања на сообраќајните правила.

Целта на новиот систем е до 2030 година да се преполови бројот на сообраќајни несреќи во државата.

Македонија

Витаминка со Стоби Флипс и купувачите донираат 1.000.000 денари за СОС Детско село

Кампањата „Заедно за топол дом, љубов и грижа за секое дете“ што Витаминка ја реализираше преку Стоби Флипс, успешно заврши и резултираше со донација од 1.000.000 денари за СОС Детско село. Средствата ќе бидат искористени за Советувалиште за психолошка поддршка и специјална едукација со рехабилитација на СОС Детско село. Благодарение на поддршката од граѓаните за акцијата со која од секој купен Стоби Флипс се издвојуваше дел, со собраните средства ќе се овозможи континуирана експертска едукација за шеесет деца и млади на возраст од 6 до 18 години кои растат без родителска грижа и се соочуваат со последици од трауматски искуства, емоционални и развојни предизвици, како и различни когнитивни потешкотии.

Средствата ќе бидат насочени кон проектот „Менталното здравје пред сè“, преку кој децата ќе добијат индивидуални сесии со психолози и специјални едукатори, како и терапевтски третмани во сензорна соба за оние кои имаат потреба од дополнителна поддршка во емоционалниот и когнитивниот развој. Овие услуги се од суштинско значење за нивното зајакнување, подобро справување со кризи и градење основа за здрав личен раст.

Од СОС Детско село Македонија истакнуваат дека поддршката е од огромно значење за континуитетот на нивната мисија. „Од срце им благодариме на Витаминка и на сите граѓани кои ја поддржаа кампањата. Витаминка уште еднаш покажа што значи вистинска општествена одговорност и посветеност кон децата. Благодарение на ова партнерство, можеме непречено да продолжиме да обезбедуваме стручна грижа и поддршка за секое дете, со верба во нивната подобра иднина,“ велат од организацијата.

За што поуспешно спроведување на кампањата за Стоби Флипс беше изработена и специјална амбалажа со што купувачите беа информирани за своето учество во донацијата и придонесе за подигнување на јавната свест и обезбедување поголема поддршка за децата без родителска грижа.

Од Витаминка додаваат дека се горди што кампањата успеала да ја мобилизира јавноста и да создаде реална промена. „Нашата цел беше да потсетиме дека секој мал гест на солидарност може да донесе голема разлика. Благодарни сме што потрошувачите ја препознаа важноста на оваа приказна и ни помогнаа заедно да донесеме надеж, грижа и поддршка таму каде што е најпотребно“, истакна Симона Симоновска, одговорна за маркетинг во Витаминка.

Со оваа кампања, Витаминка и Стоби Флипс уште еднаш ја потврдуваат својата посветеност кон најмладите и даваат силен пример за тоа како компаниите, заедно со граѓаните, можат да создадат поподобно, похумано и посреќно општество за секое дете.

Македонија

Рекордна година за Скопје – аеродромот со 3 милиони патници, растот продолжува до 3,2 милиони

Меѓународниот аеродром Скопје денес го дочека својот тримилионити патник во една календарска година. Среќничката, Милена Таскова, беше изненадена на нејзиниот лет Скопје – Бари.

Раководството на аеродромскиот оператор ТАВ Македонија, заедно со вицепремиерот и министер за транспорт, Александар Николоски, приредија емотивно изненадување за госпоѓа Таскова.

Милена Таскова беше облеана во подароци: бесплатни аеродромски услуги од сестринските компании на ТАВ и два бесплатни авионски билета од авиокомпанијата Виз Ер (Wizz Air).

Неџат Курт, генералниот директор на ТАВ Македонија, не ја криеше својата возбуда:

„Го достигнавме тримилионитиот патник во една година! Првпат лета за Бари, и посакав среќа на неа и нејзиното семејство.“

Курт најави дека ова е само почеток. Според оптимистичките прогнози на ТАВ, Скопскиот аеродром до крајот на годината ќе заврши со 3,2 милиони патници, додека аеродромот во Охрид се очекува да достигне 262.000 патници.

Овој успех не само што го потврдува растот на авиосообраќајот во земјата, туку и ја зацврстува позицијата на Скопје како значаен регионален воздушен центар.