Република

Изградбата на булеварскиот влез во Битола добро напредува

БИТОЛА – И во зимските месеци продолжува изградбата на булеварскиот влез на Битола од страната на Прилеп. Ако не паднат големи снегови, до налето ќе биде комплетно изградена левата коловозна лента за влез во Битола и сообраќајот ќе се одвива по новата инфраструктура. Напоредно течат градежните работи за обнова на патот Прилеп – Битола.

Изградбата на улица „8 Септември“ се одвива според предвидената динамика. Се работи на атмосферска канализација, водоводна инсталација, коловозна конструкција, улично осветлување, реконструкција на пропуст над Раштански порој, поставување на сообраќајна опрема, експропријација, велат од општина Битола.

Со градежните работи се почна лани во август, а досега е поставена мешовита канализација во должина од 550 метри, во моментот се гради и потпорен ѕид во должина од 27 метри. Во реконструкцијата е вклучена и водоводна линија која се состои од два цевководи. Изведувач на работите е ГП „Гранит“.

„Во досегашниот период реализирани се околу 20 проценти од вкупниот договор за проектот. До средината на летото, планирано е да се изврши асфалтирање на едната (левата) коловозна лента, при што ќе може да се пренасочи сообраќајот по новоасфалтираната коловозна лента“, објави градоначалникот Тони Коњановски.

Влезот на Битола од страната на Прилеп со децении беше во ужасна состојба, не само коловозот, туку комплетното сообраќајното решение, осветлувањето, дивите депонии покрај патот, сликата беше недостојна за град од 80.000 жители, каков што е Битола.

Проектот за реконструкција на коловоз е во должина од 1,3 километри на потегот од „Лукоил“ до ГУП, односно до самиот влез во градот кај таблата што пишува Битола. Делницата опфаќа не само нов коловоз туку комплетен булеварски влез со ширина од 27,5 метри, ширина на двата коловози од по 7,5 метри, со урбано уредена површина која ќе ги разделува двата коловози со пешачки и велосипедски патеки со зелен појас – дрворед со широчина од по 5.5 метри.

Во меѓувреме се изгради нова улица кај новиот трговски центар „Блис“ кај Дулието во Битола и се реконструира постојната улица што е надополнување на влезот на Битола од страната на Прилеп.

Во исто време се одвиваат градежните работи за изградба на патот Прилеп – Битола, па сега битолчани кои патуваат за Скопје и назад, се движат по стариот пат за Скопје кој минува низ општина Могила, кој е во добра состојба. Минатата недела се договараше и режимот на сообраќај додека траат градежните активности со претставниците на изведувачот на автопатот, компанијата „Бехтел и Енка“. Ќе се работи на трасата од влезот на Прилеп од страна на превојот Плетвар, до северната страна на Битола, кај клучката во близина на селото Крклино.

Извор: nezavisen.mk

Република

Бојкоски: Дополнителни 7 милиони денари поддршка за РК Еурофарм Пелистер

Претседателот на Советот на Општина Битола, Бојан Бојкоски, соопшти дека се обезбедени дополнителни 7.000.000 денари финансиска поддршка за РК Еурофарм Пелистер.

„Битола стои зад шампионот“, објави Бојкоски, нагласувајќи дека средствата се предложени во координација со градоначалникот и советничката група на ВМРО-ДПМНЕ и коалицијата.

Од вкупната сума, 3.000.000 денари се предвидени како награда за освоената шампионска титула во македонската ракометна лига. Според Бојкоски, целта на дополнителната поддршка е зголемување на конкурентноста на клубот, задржување на шампионската титула во Битола и носење радост и спортска гордост за граѓаните.

Република

Коњановски: Преку танц младите испраќаат силна порака против врсничкото и дигиталното насилство

Во спортската сала на СОУ Гимназија „Јосип Броз Тито“ во Битола денеска се одржа меѓуучилишен танцов натпревар „Танц против насилство“, посветен на подигнување на свеста за врсничкото и дигиталното насилство меѓу младите.

Настанот беше организиран со цел промоција на ненасилна комуникација, почит, солидарност и позитивни вредности, при што учениците преку танц, емоција и креативен израз испратија јасна порака дека насилството не смее да биде прифатено.

На настанот учествуваа седум основни училишта од Битола со вкупно 49 ученици, кои преку кореографиите ја пренесоа својата визија за свет без насилство. Поддршката за реализација ја даде Општина Битола, во соработка со Здружението за развој на ромската заедница „Сумнал“, СОУ Гимназија „Јосип Броз Тито“ Битола и образовните институции.

Пред присутните се обрати градоначалникот на Битола, Тони Коњановски, кој истакна дека ваквите иницијативи се исклучително важни за создавање безбедна и здрава средина за најмладите.

„Ова не е само танцов или музички натпревар, туку силна порака дека како заедница сме против насилството, особено меѓуврсничкото и дигиталното насилство кое нè загрижува сите. Радува фактот што училиштата ја прифатија оваа иницијатива и што младите покажаа дека имаат свест и храброст да зборуваат против булингот“, порача Коњановски.

Организаторката и иницијаторка на настанот, Фатма Бајрам Аземовска од здружението „Сумнал“, нагласи дека „Танц против насилство“ е глас на младите кои преку уметноста повикуваат на почит, прифаќање и разбирање.

Во натпреварувачкиот дел учество зедоа ученици од ООУ „Даме Груев“, „Кирил и Методиј“, „Ѓорѓи Сугарев“, „Тодор Ангелевски“, „Елпида Караманди“, „Св. Климент Охридски“ и „Гоце Делчев“.

Жири-комисијата ја додели Гран при наградата на ООУ „Гоце Делчев“, признанието за најсилна порака против насилството на ООУ „Тодор Ангелевски“, а наградата за најкреативна кореографија ја добија учениците од ООУ „Кирил и Методиј“.

Република

Прилеп утре без струја: Планиран прекин од 06:30 до 11:00

Жителите на Прилеп и околните приградски населби утре, 21 декември 2025, ќе останат без електрична енергија во период од четири и пол часа. Од АД МЕПСО информираат дека прекинот ќе трае од 06:30 до 11:00 часот.

Причината за прекинот се планирани зафати за модернизација на електропреносната мрежа на потегот помеѓу Битола и Прилеп. Стручните екипи ќе демонтираат старо проводно јаже од 110 kV далекувод (ТС Битола 1 – ТС Прилеп 1) и ќе монтираат нов проводник.

АД МЕПСО апелира до домаќинствата и стопанските субјекти, особено оние кои работат наутро, да покажат разбирање за прекинот. Напонот се очекува да биде повторно воспоставен точно во 11:00 часот, а зафатиот се оценуваат како клучни за стабилно и сигурно функционирање на електропреносниот систем во иднина.