Македонија

Мицкоски од Минхен: Пристапот кон ЕУ стана подвижна мета, постојат двојни стандарди

Македонија е жртва на билатерален спор што две децении го блокира евроинтегративниот процес, порача премиерот Христијан Мицкоски од панелот посветен на пристапувањето на Балканот во ЕУ кој се одржа во рамки на Минхенската безбедносна конференција. Тој беше говорник заедно со албанскиот премиер Еди Рама и еврокомесарката за проширување Марта Кос. Мицкоски, земјава ја спореди со Хрватска која во исто време ги започна евроинтеграциите, но како што рече Македонија е се уште на исто место поради наметнати билатерални прашања од соседите.

-Ние сме жртва на билатеризација или да бидам уште попрецизен, нашиот пат кон ЕУ е многу комплексен. Затоа што наместо да ја добилижиме Европа на Балканот, ние на некој начин го носиме Балканот во Европа. Има за жал земји членки на ЕУ кои се од Балканот и тие го носат билатералните спорови задно со нив во Брисел наместо да ги донесат бриселските вредности на Балканот.изјави – Христијан Мицкоски – Претседател на Влада.

Еврокомесарката за проширување Марта Кос, пак, ја повтори пораката дека според неа, билатералните спорови го отежнуваат процесот. На прашањето на модераторката на панелот Мајда Руге дали Брисел е подготвен да преговара за уставни измени со одложено дејство, предлог кој го оцени како разумен, Кос одговори дека доколку Скопје и Софија се согласни може да помогне билатералниот спор да се реши надвор од проширувачкиот процес.

-Бугарија и Македонија веќе зборуваат за тоа, ние се понудивме за помош ако е потребно да се олесни. Никогаш не е добро кога се внесуваат билатерални спорови, со се случува повторно и повторно. За тоа зборував претходно, можам да ја разберам фрустрацијата. Секогаш ќе треба да се справуваме со билатерални прашања, мојата визија е доколку е можно ве молам, и ние ќе помогнеме да се реши ова надвор од процесот на проширување.изјави – Марта Кос – Еврокемсар за проширување.

Во врска со идните перспективи на ЕУ и безбедносните предизвици со кои се соочува, Мицкоски рече дека Македонија е комплетно усогласена со надворешната и безбедносната политика на ЕУ. Но упати забелешка молкот на Брисел кога земја членка на Унијата го негира македонискиот идентитет, посочувајќи ја Бухарија.

-Кога Русија навредливо го занемарува и негира украинскиот идентитет, за што претседателот Зеленски зборуваше вчера, и украинскиот јазик итн, сите сме гласни, сите критикуваме, секако се бориме за правата на украинскиот народ и за оваа агресија без преседан која Путин и ја направи на Украина. Но кога парламентот на една земја членка на ЕУ, го занемарува и негира македонскиот идентитет и мојот македонски јазик, тогаш сите се силни. Секој знае дека зборувам за Бугарија,-изјави – Христијан Мицкоски – Претседател на Влада.

Албанскиот премиер Рама кој исто така беше дел од панелот, порача дека очекува ЕУ да ги забрза процесите на интегрирање. Еврокомесарката Кос смета дека во нејзиниот мандат две или три земји до крајот на 2027 може да го затворат преговарачкиот процес посочувајќи ги Црна Гора и Албанија како предводници, веднаш потоа рече ќе се продолжи со Македонија.

Македонија

ВЛЕН: По 24 години конечно закон за правично застепеност

Коалицијата ВЛЕН го поздравува позитивното мислење на Комисијата на Венеција за Законот за правично и соодветно застапување, кој беше претставен од заменик-премиерот Арбен Фетаи, со што се дава зелено светло за процесот што ја затвора 24-годишната чекање.

Овој закон е доказ дека кога постои политичка волја, принципот на правично застапување не останува само на зборови, туку се претвора во закон. Правичното застапување се движи напред, базирано на европски стандарди и принципот на меритократија.

ВЛЕН е решен ова прашање да не остане повеќе предмет на политички игри, туку да добие целосно законско решение, за професионална, функционална и инклузивна јавна администрација за сите заедници.

За 24 години ова прашање се користеше за реторика и политички калкулации, без да се постигне законско решение. Денес, ВЛЕН го затвора овој период, претворајќи го правичното застапување во закон.

Македонија

Седум од десет Македонци против покачување на платите на судиите и обвинителите

Според последното истражување на јавното мислење на порталот МКД.мк, спроведено од агенцијата Маркет Вижн, македонските граѓани се изразито против покачување на платите на судиите и јавните обвинители.

Одговорите покажуваат дека 73,6 отсто од испитаниците сметаат дека судиите и обвинителите не заслужуваат зголемување на нивните месечни примања, додека само 14,8 отсто сметаат дека повисоките плати се оправдани. Најголем дел од граѓаните оценуваат дека покачувањето на платите нема да придонесе за подобрување на состојбата во македонското правосудство.

Истражувањето било спроведено од 25 ноември до 6 декември 2025 година со CAТI метод – телефонско анкетирање со помош на компјутер, на примерок од 1.200 испитаници.

Резултатите ја потврдуваат недовербата на граѓаните кон правосудниот систем и укажуваат на потребата од реформи и зголемена одговорност во судството.

Македонија

Детонации на Криволак: се уништуваат експлозиви запленети пред 15 години

Полициски службеници од Одделот за криминалистичка полиција – Единица за недозволена трговија со оружје, опасни материи и радиоактивен материјал, во координација со Единицата за откривање и демонтирање на експлозивни средства при Одделот за сузбивање на организиран и сериозен криминал, согласно однапред изготвен план, преземаат мерки и активности за уништување на голема количина минско-експлозивни средства.

Минско-експлозивните средства, кои биле запленети пред цели 15 години и складирани во касарната „Ѓорче Петров“, денеска се транспортираат до армискиот полигон „Криволак“ со товарни возила на АРМ. Уништувањето ќе се спроведе во присуство на Комисијата за уништување на оружје, делови и компоненти на оружје, муниција и експлозивен материјал.

Процесот на уништување ќе го реализираат полициски службеници од Единицата за откривање и демонтирање на експлозивни средства и направи, стручни лица од Армијата на Република Северна Македонија и пиротехничари од Дирекцијата за заштита и спасување, преку контролирана детонација.

Фактот што станува збор за прво уништување на ваков тип минско-експлозивни средства по цели 15 години укажува дека безбедносните ризици во минатото не биле третирани со потребната сериозност. Денешната активност претставува јасен сигнал дека со одговорен пристап, зголемена посветеност и професионално раководење, безбедноста на граѓаните конечно се става на ниво кое одамна било неопходно.