Љубезноста кон ChatGPT ги чини милиони – открива Сем Алтман

Извршниот директор на OpenAI, Сем Алтман, со доза хумор откри дека љубезноста на корисниците – како што се зборовите „те молам“ и „благодарам“ – ги чини милиони долари во оперативни трошоци.

На прашање на социјалната мрежа X, каде еден корисник се пошегува прашувајќи колку струја троши компанијата поради „фини“ луѓе кои се пристојни со ChatGPT, Алтман одговори: „Десетици милиони долари добро потрошени – никогаш не знаеш“. Очигледно, некои луѓе решиле да бидат љубезни со вештачката интелигенција – за секој случај, инспирирани од сценарија како оној со HAL во „2001: Одисеја во вселената“.

Иако неговиот одговор е делумно шеговит и веројатно не е целосно точен од финансиски аспект, факт е дека секоја интеракција со ChatGPT – колку и да е едноставна – активира комплексна машинска обработка што бара значајна компјутерска моќ. А со тоа расте и потрошувачката на електрична енергија.

Вештачката интелигенција – енергетски гладна технологија

AI моделите како GPT-4 се потпираат на масивни дата-центри кои, според светски проценки, веќе користат околу 2% од глобалната електрична енергија. Според анализа на Goldman Sachs, еден GPT-4 одговор троши приближно десет пати повеќе енергија отколку обично Google-пребарување.

Но тука не застануваат трошоците. Бидејќи серверите генерираат огромна топлина, нивното ладење бара огромни количини вода. Истражување на Универзитетот во Калифорнија, Риверсајд, покажа дека создавање на само 100 зборови преку GPT-4 троши вода колку три шишиња. Дури и краток одговор како „Нема на што“ бара околу 44 милилитри – или приближно една и пол мала чаша вода.

Иако љубезноста не чини ништо – кога зборуваме за луѓе – во светот на AI, таа има своја цена. Но, како што вели и Алтман – можеби се вредни пари добро потрошени.

Американскиот милијардер Бил Гејтс предвидува дека до 2035 година вештачката интелигенција (AI) ќе ги замени лекарите, професорите и други експерти, отворајќи ја, како што ја нарече, „ерата на бесплатната интелигенција“.

Во блиска иднина, според Гејтс, експертски услуги како медицински совети и индивидуална настава ќе станат широко достапни – и тоа без надомест, особено во помалку развиени региони како Индија и Африка.

AI нема да го трансформира само т.н. сектор на „бели мантили“, туку ќе навлезе и во индустрии како градежништво, логистика, земјоделство и производство. Гејтс смета дека ваквата промена ќе ја преобликува самата дефиниција на работата во современото општество.

Со автоматизација на сè поголем дел од работните задачи, тој предвидува дека класичните полноработни позиции ќе отстапат место на пократки работни недели, порано пензионирање и повеќе слободно време. Ова, вели Гејтс, ќе ги натера општествата повторно да размислат за поимите како што се продуктивност и животна цел.

Иако AI носи потенцијал за ера на изобилство и достапност, Гејтс предупредува и на сериозни предизвици – како што се губење на работни места и растечка социјална нееднаквост. Како можни решенија ги посочува универзалниот основен приход и поправедна распределба на богатството.

Сепак, тој не верува дека AI ќе може целосно да ги замени сите човечки професии. Работите што бараат креативност, емпатија и човечка поврзаност – како психотерапија, уметност и грижа за луѓето – и натаму ќе имаат суштинска улога.

Гејтс нагласува дека иднината на AI мора да се развива со чувство за одговорност, со цел да се избегнат појави како пристрасност, дезинформации и монополска контрола.

На крајот, упатува повик до младите иноватори: да ја насочат вештачката интелигенција кон хумани цели и да соработуваат глобално, за да се обезбеди фер и одржлив напредок.

За прв пат во историјата на еден официјален полумаратон, покрај луѓето трчаа и роботи. Тоа се случи на полумаратонот во кинескиот Јизхуангу, каде на патеката од 21 километар се појавија и 21 роботи.

Роботите беа во различни облици. Имаше некои кои беа високи 120 сантиметри, но и такви кои беа и по 180 сантиметри. Сите роботи беа направени од кинеските компании „DroidUp“ и „Noetix Robotics“.

Некои од роботите носеа и шортцеви за трчање, други беа со женска физиономија. На крајот, најбрз меѓу роботите е Tiangong Ultra кој успеа полумаратонот да го истрча со време од два часа и 40 минути, што е многу послабо време од тоа со кое трчаа луѓето. Победникот на маратонот е атлетичар кој успеа да ја помине делницата од 21 километри са еден час и две минути.

По завршување на трката, кинеските компании кои ги произведуваат роботите беа задоволни од резултатите, иако се уште далеку од резултатите на луѓето кои трчаат.