Република

Битола како градилиште – нови проекти и рекордна финансиска стабилност

Интегрален текст од обраќањето на градоначалникот на општина Битола, Тони Коњановски:

Денес, кога на дневен ред е Завршната сметка на Општина Битола за 2024 година, моето обраќање сакам да го започнам со голема благодарност до граѓаните за нивната трпеливост, затоа што градот навистина е големо градилиште, таква беше состојбата во поголемиот дел од 2024 година, а и на почетокот на 2025.

Знам дека промената на режимот на сообраќај на повеќе улици, некогаш предизвикува нервоза кај возачите, но тоа е единствениот начин, за да можеме да ги подобриме улиците во нашиот град, да инвестираме на локации каде повеќе од 20 години не се интервенирало, да ја промениме подземната инфраструктура, да изградиме нов влез во Битола, да се изгради топловодот и секако да реализирам капитални проекти, како изградбата на новата противпожарна зграда, новата детска градинка во АРМ и други проекти.

Со ваквата динамика, нескромно можам да речам дека визијата со која започнавме да работиме пред 4 години, се реализира и промените во Битола се видливи. Секако дека, невозможно е се да се реализира се одеднаш, но со самото тоа што реализацијата на Буџетот за четвртиот квартал на 2024 е 81,73%, а над 80% сме реализирале и во 2022 и 2023, потврдува дека подготвеноста на проектната документација и посветеното работење на терен, резултира со изведба на конкретни проекти на терен.

Во делот на капиталните расходи, имаме значително зголемен процент на реализација, во споредба со периодот од 2018 до 2021, кога реализацијата била од 38,17% до максимум 64,21%, а во последните 3 години се движи од 71,52% до максимум 77,38% а за 2024 овој процент изнесува 72,75 %.
Пред нас се многу започнати проекти и многу нови кои наскоро ќе започнат, согласно одобрените средства од Владата за 16 нови проекти, од кои склучени се договори за 10 проекти, 1 е во процес на евалуација, 1 пред потпишување на договор, 1 во постапка на јавна набавка и за 3 проекти започната е изведба.

Годината што измина, донесе позитивни вести за уште еден проект за кој се зборува повеќе од 15 години, а за кој според досегашните спроведени постапки очекуваме позитивен исход и брз почеток на реализација. Тоа е проектот за Иградба на пречистителна станица и рехабилитација и надградба на канализационата мрежа во Општина Битола, за што првиот дел од постапката е завршен, а во тек е евалуацијата за избор на надзор над изградбата, со што конечно еден проект со проценета вредност во 2017 од 27,8 милиони евра, конечно ќе ја види светлината на денот и ќе овозможи решавање на еден голем проблем за Битола. Единствениот трошок за досегашните активности, кој го имаше Општина Битола за овој проект, беше сместувањето и патните трошоци за членовите на Комисиите за евалуација, кои како претставници на општината, потребно беше да бидат активно вклучени во постапките. Токму затоа, во тој дел на трошоци имаме и мало зголемување, што е неспоредливо со важноста и вредноста на проектот во кој беа вклучени и за што искрено им сум благодарен за професионалноста и посветеноста.

Општина Битола, во овој момент се наоѓа во добра финансиска кондиција, така што на сметките има 303.246.704 денари, побарувањата на општината по основ на данок на имот за правни лица изнесуваат 59.208.321 денари, а за физички 150.350.301 денари. Исто така, за одобрените проекти, кои ќе бидат финансирани од Владата, општината ќе добие 230.453.784 денари, а ќе добие и дополнителни 707 милиони денари од новиот повик.

Износот на доспеани фактури за општина Битола е 50.021.612 денари, што потврдува дека локалната самоуправа делува организирано и плански, притоа водејќи сметка за динамиката на реализација, квалитетот на извршената работа и исплатата кон изведувачите.

Поготвени сме, да аплицираме и на вториот Јавен повик за државна финансиска помош на општините со средствата од унгарскиот кредит со околу 30-тина проекти, кои транспарентно беа претставени пред јавноста, а преку спроведената анкета добивме повратен одговор и за други проекти за кои битолчани имаат потреба од реализација.

Со асфалтирањето на улицата „Захарија Шумљанска” во должина од 1453 метри, се реализира долгогодишното барање на граѓаните, за обезбедување на соодветен пристап до Светонеделските гробишта.

Накратко сакам да потсетам на она што е завршено во 2024 и се работи на терен во моментот. Од патната инфраструктура, во руралните средини ги завршивме улиците во село Цапари во должина од 1478 метри, во Горно Оризари во должина од 2028 метри реализиравме комплетна инфраструктура на 11 краци и исто толку краци во должина од 2.303 метри во Долно Оризари.

Го завршивме проектот за локалниот пат до с. Магарево во должина од 537метри, а во Цапари ја подобривме патната инфраструктура во должина од 1278 метри.

Со асфалтирање на вториот дел од улицата СТУ 1, општина Битола го финализира проектот за изградба на коловоз на улицата СТУ 1 во АРМ Четврт 1.

И покрај сите проблеми со кои се соочивме при изведбата, ја завршивме реконструкцијата на улиците во населбата Недопирливи.

Продолжуваме со реконструкцијата на улицата „Бурса“, едно долгогодишно барање на стопанствениците од овој дел на градот, со што значително ќе се подобрат условите за нивно непречено секојдневно работење. Реконструкцијата се врши во должина од 2,4 километри.

Се реконструира дел од коловозот на ул.„Индустриска“, на потегот од влезот во населбата Боримечка, до мостот на реката Курделес.

Улицата „Стив Наумов“ се реконструира во должина од 2 километри, а проектот вклучува реконструкција на водоводната, канализационата мрежа и коловозот.

Се работи на комплетна реконструкција на дел од улицата „Нико Фундали“, а продолжуваме и со улица „Солунска“. Работиме на улиците „150“, „170“ и „210“.

Со реализацијата на проектот “Изградба на коловоз, улично осветлување, водоводна и канализациона мрежа на улица кај Дулие – Општина Битола”, се изгради соодветна инфраструктура кај трговскиот комплекс „Блис“, а во моментот се работи на доуредување на просторот кај кружниот тек „Дулие“.

Територјалната противпожарна единица добива нов објект кој е во финална фаза на изградба, планинарскиот дом Копанки, исто така е во напредна фаза, како и новата детска градинка во АРМ, а прифатилиштето за бездомни животни „Хачико“ е ставено во функција.

Работиме на изградба на велосипедските патеки во должина од над 5 километри, изградивме „Памп Трак“ полигон за велосипеди во градскиот парк, ја завршивме Изградбата на најатрактивната рекреативна патека за битолчани, патеката „Тумбе кафе – Смолево“, а го оспособивме и Новиот „Бајк парк Смолево“, како рекреативната зона за сите генерации.
Ги реконструиравме спортските игралишта во ОУ „Елпида Караманди“, а во соработка со ФФМ, го поставивме рефлекторското осветлување на стадионот „Петар Милошевски“, со што го оспособивме за ноќни натпревари, а во соработка со ЈП Комуналец поставивме лед светло за целосно осветлување на теренот на помошното фудбалско игралиште „Павел Шатев“, познато како Ќумурното игралиште во Битола.

Со новите проекти, на 11 локации во Општина Битола, значително ќе се подобри спортската инфраструктура и условите за спортски активности.

Реализиравме инвестиции во повеќе основни и средни училишта, преку проекти и со сопствени средства, а преку проектот ,,Сончеви училишта”, инсталирани се фотоволтаични соларни централи на училиштата: „Елпида Караманди“, „Стив Наумов“, „Коле Канински“, „Св. Кирил и Методиј“, „Александар Турунџев“ с. Кукуречани и ОУ „Крсте Петков Мисирков“ од с. Бистрица. Проектот има бенефит и за животната средина, а ќе придонесе и за заштеда на финансиски средства.
Со активностите од проектот „ЕУ за чист воздух“, градот е оплеменет со над 1000 садници.

Во делот на обезбедувањето на дигитални услуги, ставен е во функција модулот за електронска проверка и плаќање на даночните обврски кон општината, како и ГИС платформата која служи за управување со урбанистичко-планска документација и други просторни инфраструктурни податоци, која ја унапредува ефикасноста и точноста во работата на општината и комуналните претпријатија кои се во нејзина надлежност, ја зајакнува комуникацијата со другите претпријатија, бизнис заедницата и граѓаните, а овозможува и исполнување на законските обврски.
Го дигитализиравме внатрешното работење на општинската администрација преку ДМС систем, кој планираме да го отвориме и за граѓаните да можат своите барања да ги доставуваат во општината електронски, без да доаѓаат во општината.
Изготвен е модул за електронски субвенции и очекувам јавните повици за субвенции кои ќе следуваат да се спроведат комплетно и успешно електронски.
Наскоро, ќе биде промовирана и алатката bitolacitybus, која е изработена од страна на Ротари клубот од Битола, како веб и мобилна апликација, со што граѓаните ќе имаат информација за сите автобуски линии и движењето на автобусите во реално време. Ова е и еден од начините да се стимулира користењето на јавниот превоз.

Отвореноста и транспарентноста на општината ја потврдивме и преку буџетски форуми и форуми во заедницата за процесот на праведна транзиција.

Во интерес на времето, нема да навлезам во деталите од програмите за социјална заштита, еднакви можности, култура, туризам и друго. Извештаите за истите ќе бидат претставени пред вас, како и досега на седницата по усвојувањето на завршната сметка, но Ве уверувам дека и тие се максимално реализирани.

И оваа година, подготвени со проектна документација и обезбедени финансиски средства, продолжуваме со реализација на нови проекти, изградба на патишта, спортски објекти и други инвестиции.

Република

Проданоски: Св. Никола е симбол на сплотеноста и духовноста на Прилеп

Градоначалникот на Прилеп, Дејан Проданоски, упати честитка по повод големиот христијански празник Свети Николај Чудотворец – патрон и заштитник на градот, истакнувајќи дека овој ден има особено значење за сите прилепчани.

Тој нагласи дека Св. Никола во Прилеп не е само верски празник, туку ден на заедништво, солидарност и отворени домови, длабоко вкоренет во духовниот и општествениот живот на градот.

Оваа година, како што посочи Проданоски, се одбележуваат 20 години од одлуката Свети Никола да биде патрон празник на Прилеп, донесена по иницијатива на граѓаните во 2006 година, што претставува силна потврда за почитта кон традицијата и хуманите вредности.

Проданоски упати благодарност до годинашните домаќини на градската слава, компаниите „Матадор“ и „Бимфоод“, за нивниот придонес и достоинствено организирање на чествувањето, како и честитки до компанијата „Рустика“, која го презема кумството за наредната година.

Според него, достоинственото одбележување на јубилејот е доказ дека Прилеп ги чува своите корени и заеднички ја гради иднината како отворен и препознатлив град.

Во името на Локалната самоуправа и во свое лично име, Проданоски им го честиташе празникот на сите прилепчани, со желби Св. Никола да донесе здравје, мир, среќа и бериќет во секој дом.

Република

Коњановски ја најави најбогатата „Зимска приказна“ досега во Битола

Градоначалникот на Општина Битола, Тони Коњановски, денес одржа прес конференција на која ја најави програмата на „Зимска приказна“. Го пренесуваме интегралниот текст од денешната прес конференција:

„Сакам да ја најавам програмата за дочекот на новата година, овде од центарот на Битола, каде минатата година на ова место се лизгавме, а годинава заеднички празнично како во нашите домови ќе гледаме новогодишни филмови на отворено.
А, за приказната да биде уште повозбудлива, на возот „Мечо“ ќе му се придружи и празничниот автобус, по битолски кажано празничната кружна.
Одбројувањето започна и сме на прагот на новата 2026 година.
Ова е период кога ги славиме празниците, си честитаме, си подаваме рака и уште поважно си посакуваме убави моменти.
Градот блесна во нова предновогодишна светлина, како увертира на сега веќе традиционалната „Зимска приказна“ која ја раскажува секој битолчанец, но и секој друг кој бил гостин за време на нејзиното одржување.
И оваа година ќе имаме програма за уживање на сите генерации и се надеваме дека и оваа „Зимска приказна“ ќе биде прераскажувана по убавите новогодишни моменти во следната година.

Главната сцена е на платото на Офицерскиот дом, но програмата е на повеќе локации, плоштадот „Магнолија“, во Пациото на Завод и музеј, Безистенот, Магазата, Инфо центарот на Пелистер, Киното Манаки, Центарот за култура, Близ молот, Порта Џез, Домот за стари лица „Сју Рајдер“, Ски патеката на Копанки, спортската сала „Боро Чурлевски“, „Бук хаус“ , Основното училиште со ресурсен центар „Кочо Рацин“ и секако старата битолска чаршија која во изминатите години се надевам дека успеавме да ја вратиме во нејзиниот сјај, односно празнично да ја оживееме.

И во годинашната програма ги вклучивме и основните училишта од општината, градинките и едукативните центри за странски јазици.
Годинава, бројките ја потврдуваат приказната:

над 200 часа програма низ целиот град
од нив, околу 35 часа детска програма
67 бендови
повеќе од 20 соло изведувачи
5 фолклорни друштва
-2 градинки и 11 училишта како активен дел од програмата

Ова е најголемиот зимски фестивал во Македонија веќе неколку години.
Ова е декемврискиот ритам на Битола.
Во оваа прилика ќе истакнам дел од настаните од програмата.
Програмата започнува утре со Дедо Мраз со фичото, потоа ќе имаме и германски божикен базар, Гром и Супер хикс, кино на отворено, па зимска техно игранка, изложба, Никола Зац со бендот в недела, Етно Илинден, КУД Илинден, француската алијанса, ансамблите за фолклор Плетенка и Гоце Делчев, куќа имам на Пелистер, од понеделник најдоброто од Битолскиот оркестар Дива, Инструментал бенд, Дрим тим, програма на градинките и училиштата од градот, Игор Димовски-Пауза за ракија, француски божикен настан, концерт на Пијан славеј, новогодишна караоке соба, Верица Ристевска, Огнен Здравковски, Паркети, Код 369 ( памперс), Влатко Лозановски, Бојана Скендеровски, оркестарот Маестрал, празнична штафета, музика, танц и мода, Си-До, битолски тамбураши, Бојан Стојков и Димитар Андоновски, натпревар на легендите на РК Пелистер, многу детски новогодишни претстави, Ареа, Александра Јанева, хуманитарен новогодишен базар, Деспина, Конзули, Модус бенд, новогодишен концерт на музичкото училиште, група Бонтон, Фонтана, Ламбе Алабаковски, а на последниот ден од годината на 31 декември, претпладне детска програма, претстави, Тралала, вечерта Борче Наумовски, Кабаре за раѓањето и вечноста, Баркод бенд и пред и во новата година со групата Нокаут, потоа Уникат бенд, Татјана Стефановска и групата Нектар.

Но, со тоа на завршува Зимската приказна туку продолжува со први на први пелистер, дедо мраз на мотор, во следните денови и Боемите, Деспина, Калабалак и на последниот ден на 5 јануари Дона и пријателите.

Продолжувањето на овој концепт, морам да истакнам дека е резултат на добрата соработка со ЈОУ КИЦ и ЈП Паркинзи, но најмногу сакам да им се заблагодарам на соработката на општествено одговорните компании кои и оваа година се наши верни поддржувачи.

Она на што често повикуваат граѓаните, на вклучување и општествена одговорност на приватни фирми, поддршка на јавни настани во интерес на нашиот град од приватниот сектор, на „Зимска приказна“ реално се случува.

Годинава покрај традиционалната соработка и поддршка од нашите верни партнери – приватни компании, на „Зимска приказна“, имаме комплетна поддршка и во делот на обезбедување на опрема за озвучување и осветлување на настаните на оваа манифестација, која е целосна донација од приватен оператор за сите настани на „Зимска приказна“, што значи за овој посебно важен дел во реализацијата на програмата, како организатори нема да имаме апсолутно никаков трошок.

Имајќи ја предвид ваквата заедничка организација и постапките кои се финализираат, по завршувањето на целата програма, јавно и транспарентно ќе ја објавиме и целата финансиска конструкција на манифестацијата.

На крајот ве поканувам сите заедно да уживаме во новогодишните празници, сплотени под новата новогодишна светлина на Битола. Да се забавауваме со музичката програма, да гледаме филмови и да возиме низ Битола со празничниот автобус. Магијата може да започне“, рече градоначалникот на општина Битола, Тони Коњановски, а на прес конференцијата за своето учество зборуваа и директорот на ЈОУ КИЦ, Благојче Божиновски и директорот на ЈППЈЛП Паркинзи, Зоран Михајловски.

„Со воспоставената меѓуинституционална соработка со општината, соработката со приватниот сектор, како и соработката со ЈП „Паркинзи“, ЈОУ КИЦ Битола и оваа година е партнер на Општината во реализација на „Зимска приказна”. Како јавна општинска установа, од наша страна комплетно е ставен на располагање просторот на и пред Офицерски дом, целокупната наша техничка и логистичка поддршка и секако воспоставеното партнерство со сите општествено одговорни компании кои и оваа година сакаат да бидат дел од „Зимска приказна”. Како што спомена и градоначалникот, оваа година особено значајна поддршка за сите нас значи и обезбедената поддршка од приватен субјект за озвучување и осветлување на настаните, со голем квалитет и без финансиски оптоварување на нас како организатори.
Ова е начин на соработка преку кој сите заедно, јавниот и приватниот сектор, ги ставаме на располагање расположливите ресурси со кои се овозможува предновогодишно заживување на градот“ рече директорот на КИЦ, Благојче Божиновски.

„ЈП „Паркинзи“ и оваа година е активен учесник во Програмата на „Зимска приказна” со најголемата атракција за најмладите вовчето „Мечо”, кое со нова енергија и добро препознатлив бренд, интензивно, но со големо задоволство, денес ги завршува последните подготовки за да може од утре да стартува со својата добро позната рута на „Зимска приказна”.
Во изминатите две години, се покажа дека „Мечо”, навистина е омилен кај децата и претставува вистинско надополнување на содржинскиот концепт на „Зимска приказна”, а од друга страна овозможува доволно простор за претставување на општествената одговорност, која пак значи наша поддршка, но и поддршка на нашите хуманитарни заложби како претпријатие. Тоа значи дека и оваа година, продолжуваме со соработка со КИЦ, Општина Битола и приватниот сектор во интерес на создавањето креативно – забавни содржини за битолчани“ истакна директорот на „Паркинзи“, Зоран Михајловски.

Република

Во Битола свечено отворен почесен конзулат на Австрија

Со пригодна свеченост денеска во Битола беше отворен конзулатот на Австрија, а функцијата почесен конзул ќе ја врши битолчанецот Игор Божиновски.

Конзулатот на Австрија се наоѓа на улицата „Виенска“ во Битола.

На свеченоста која се одржа се обрати австрискиот амбасадор Мартин Памер, македонскиот министер за надворешни работи и надворешна трговија Тимчо Муцунски, конзулот Игор Божиновски и градоначалникот на Битола Тони Коњановски.

Градоначалникот Коњановски пред присутните ја истакна важноста на отворањето на уште еден конзулат во Битола, а со тоа и интензивирање на соработката со Австрија.

„Битола од денеска е побогата за уште еден конзулат, сега од пријателската држава Австрија, со што го враќаме епитетот Битола конзулски град“ истакна Коњановски пред присутните гости, дипломатскиот кор, пратеници и други гости.