Република

Коњановски и Гаши: Отворање на пратеничките канцеларии за подобра комуникација со граѓаните

Пратеничките канцеларии во Битола повторно ќе бидат достапни за граѓаните како дел од проектот „Ваш пратеник“. Ова беше најавено денес од претседателот на Собранието, Африм Гаши, кој заедно со пратениците Силвана Анѓелевска, Олга Лозановска, Бисера Костадиновска Стојчевска и Пеце Милевски ги посети просториите на канцелариите.

Градоначалникот на Битола, Тони Коњановски, кој беше домаќин на делегацијата, ја поздрави оваа иницијатива, нагласувајќи ја важноста на непосредниот контакт меѓу граѓаните и пратениците.

„Ова е дополнителна можност за битолчани да ги изнесат своите барања, потреби и идеи. Сега има уште еден простор каде што пратениците ќе можат директно да разговараат со граѓаните и да ги согледаат нивните предлози“, изјави Коњановски.

Претседателот на Собранието, Африм Гаши, потенцираше дека отворањето на овие канцеларии ќе придонесе за подобра комуникација меѓу граѓаните и нивните избраници во парламентот.

„Ги видовме канцелариите – тие се достојни за ваква намена. Се надевам дека ова ќе биде поттик за граѓаните на Битола да ги користат и да остваруваат непосреден контакт со своите пратеници“, изјави Гаши, кој воедно се заблагодари на градоначалникот Коњановски за топлиот пречек.

Посетата заврши со работна средба меѓу Коњановски и Гаши во општина Битола, каде што се разговараше за актуелните состојби и зајакнување на соработката меѓу локалната и централната власт.

Република

Костадиноски ги повикува дечињата на новогодишна бајка во Јегуновце

Општина Јегуновце ја најави традиционалната новогодишна програма за најмладите жители, која ќе се одржи оваа недела со почеток во 12:00 часот на плоштадот пред општинската зграда.

Градоначалникот Димитар Костадиноски истакна дека културно-забавната програма е наменета за дечињата, кои најмногу ја очекуваат магијата на новогодишните празници. На настанот ќе се појави и „Дедо Мраз“, кој ќе ги изненади најмладите со пригодни подароци.

„Дојдете да ги почувствуваме заедно првите празнични мигови, исполнети со радост и среќа за дечињата“, рече Костадиновски, повикувајќи ги граѓаните да учествуваат во заедничката празнична атмосфера.

Република

Зимска магија во Малешевијата: Првоот снег во Пехчево

Пехчево и поширокиот регион на Малешевијата утрово се разбудија под снежна покривка, откако најавениот снежен бран ги донесе првите поголеми зимски врнежи во источниот дел од земјава. Снегот создаде вистинска зимска атмосфера, а жителите имаат можност да уживаат во зимската идила.

Според метеоролошката прогноза, денешниот ден ќе биде променливо облачен, со повремени локални врнежи од дожд, претежно во претпладневните часови во источните делови. На планините и на повисоките места врнежите ќе бидат во форма на снег.

Попладне се очекува постепен престанок на врнежите на целата територија, а ќе дува слаб до умерен ветер од северен правец, што ќе придонесе за почувствително заладување.

Република

Тоневски: Заедничка визија за развој на Пониква како силна туристичка дестинација

Во Инфо-центарот на Пониква денеска се одржа работен состанок меѓу градоначалниците на општините Кочани и Пробиштип, Владко Грозданов и Тони Тоневски, посветен на унапредување на туристичкиот развој и поефикасно искористување на потенцијалите на оваа планинска дестинација.

На состанокот беше ставен акцент на богатите природни ресурси на Пониква, кои претставуваат цврста основа за развој на зимски и планински туризам. Посебно внимание беше посветено на можностите за развој на ски-туризмот, како важен сегмент за зголемување на бројот на посетители во зимскиот период и за продолжување на туристичката сезона во текот на целата година.

Целта на средбата беше унапредување на меѓуопштинската соработка преку координиран и одржлив пристап во решавањето на предизвиците поврзани со развојот на Пониква. Градоначалниците нагласија дека заедничкото делување ќе овозможи подобро планирање на инвестициите, подобрување на инфраструктурата и пристапноста, како и реализација на значајни капитални проекти.

Во таа насока, беше истакната и заедничката подготвеност за координиран настап пред домашни и меѓународни фондови, со цел обезбедување финансиска поддршка за проекти што ќе придонесат за целосно валоризирање на природните потенцијали на Пониква и нејзино позиционирање како препознатлива туристичка дестинација во регионот.