Израелските власти побараа од претседателот на Република Српска, Милорад Додик, да ја напушти конференцијата за антисемитизам во Ерусалим, откако беше распишана меѓународна потерница против него, известуваат израелските медиуми.

Според написот во израелскиот весник „Израел Хајом“, кој го пренесоа сараевските медиуми, властите на Израел му ставиле до знаење на Додик дека не е добредојден на настанот, што го принудило да го напушти местото на одржување на конференцијата.

Додик потврдил за „Џерусалим пост“ дека ја напуштил конференцијата и во разговор за „Н1 Сараево“ рекол: „Дојдов во Израел за да зборувам против антисемитизмот. Наместо тоа, се чувствував како натрапник“.

Партијата Македонска алијанса за европска интеграција (МАЕИ) реагира на одлуката на македонските власти која го ограничи правото на влез во Македонија за Македонците од Мала Преспа со албански лични документи, преку граничниот премин Стење – Горица, кај Ресен.

„Од вчера, граничната полиција не дозволува влез на Македонци од Мала Преспа, кои редовно патуваат во Македонија за сезонски работа во Ресен и Преспа и навечер се враќаат дома во Мала Преспа. Овие лица, кои поседуваат албански лични карти, се соочуваат со забрана за влез поради податоци во системот дека престојувале повеќе од три месеци во Македонија, иако нивното патување е секојдневно“, се наведува во реакцијата на партијата.

МАЕИ исто така посочува дека денес македонските власти ја известиле и албанската страна да не дозволува преминување на овие лица кон Македонија.

„Ова е првпат да се случи ваков проблем, што сериозно ги загрозува егзистенцијата на овие луѓе. Апелираме до македонските власти да најдат итно решение за оваа ситуација и да обезбедат непречено движење на овие Македонци, бидејќи сезонската работа во пограничниот регион е нивен единствен извор на приходи за егзистенција на семејствата“, додаваат од партијата.

Тие исто така информираат дека за овој проблем веќе разговарале и со претставници на македонската амбасада во Тирана.

Трагедијата која се случи во дискотеката “Пулс” во Кочани, каде што загинаа 59 лица, а околу 200 се повредени и се лекуваат во земјата, регионот и странство, ја потресе цела Македонија и Балканот.

Српската пејачка Марија Микиќ ја изрази својата длабока потресеност по оваа трагедија, во која за жал загинаа многу млади животи, а многу семејства останаа во жалост.

Марија, која претходно настапувала во дискотеката која изгоре, сподели спомен од своето искуство во едно гостување, раскажувајќи како изгледал “Пулс”.

„Видовме дека животот е само момент… Гласот ми застана додека зборувам за ова… Во некои весници се појави веста дека и јас настапувам, па мајка ми беше испаничена и ме бараше да праша каде сум била таа кобна ноќ. Не знаеа како се вика дискотеката“, раскажа пејачката.

Таа додаде дека пред една година имала настап во „Пулс“ и сподели искрен впечаток: „Ќе бидам потполно искрена… Кога дојдовме пред клубот, мислевме дека сме ја згрешиле адресата. Кога ќе влезеш внатре, изгледа како вселенски брод. Огромна спротивност на тоа што го видовме надвор. Публиката беше прекрасна, енергијата беше фантастична, што не очекував од едно мало место како Кочани. Но, навистина се наежив целосно.“

Пејачката изрази и длабоко сочувство: „Сè уште не можам да испроцесирам што се случило. Не сакав ни да гледам на Инстаграм, жално… Изразувам најдлабоко и искрено сочувство до Македонија“, изјави таа.

Таа откри дека имала закажан настап во Македонија за април, но настапот бил откажан: „Не знам како ќе застанам на бина и како ќе им се обратам на луѓето“, заклучи Марија во емисијата „Интригантно“.

Трагедијата во дискотеката однесе 59 животи, меѓу кои и малолетници, а по пожарот беше прогласена седумдневна жалост.