Зеленски: Русија се обидува да ги истисне САД од мировните преговори за да го демонстрира своето лидерство

Русија настојува да ја маргинализира улогата на САД во мировните преговори со Украина за да се претстави како доминантна сила, изјави денес украинскиот претседател Володимир Зеленски.

На прес-конференција во Киев, Зеленски оцени дека Кремљ свесно се обидува да го наметне својот наратив, но дека Украинската страна е подготвена на конкретни и храбри чекори. Тој истакна дека Москва не е подготвена за она што Киев веќе е спремен да го направи.

„Кога ни упатуваат одредени забелешки за време на разговорите, јасно се гледа нивната намера – да ја потиснат Америка од преговарачката маса и да го истакнат своето лидерство. Тоа навистина се случува“, изјави Зеленски, пренесува украинската новинска агенција Ukrinform.

Претседателот додаде дека Украина не се плаши од Русија и дека отворено и јасно одговара на сите прашања што доаѓаат од руската страна.

„Нашата позиција е јасна – сметаме дека Америка е вистинскиот лидер во овој процес. Ние сакаме САД да останат активни учесници, сакаме да продолжат со притисокот врз Русија. Само така може да дојдеме до праведен и траен мир“, рече Зеленски.

Овие изјави доаѓаат во момент кога меѓународната заедница повторно се обидува да го забрза мировниот процес, додека Русија сè почесто испраќа сигнали за нов формат на преговори – без Вашингтон на масата.

Европската комисија разгледува забрана за нови договори за руски фосилни горива

Европската комисија (ЕК) разгледува можност за законска забрана за компаниите од Европската унија да склучуваат нови договори за снабдување со руски фосилни горива, изјави висок претставник на ЕУ за Ројтерс.

Анонимниот извор од ЕК посочи дека истовремено се разгледуваат и правни механизми кои би им овозможиле на фирмите од земјите-членки да ги раскинат постојните договори за набавка на руски гас, без да се соочат со финансиски казни или пенали.

Оваа иницијатива доаѓа во услови кога дел од земјите-членки се спротивставуваат на идејата за воведување целосни санкции врз рускиот гас. Како алтернатива, Комисијата се насочува кон други правни и економски инструменти за забрзување на процесот на енергетска диверзификација и намалување на зависноста од руските енергенси.

ЕК планира до 6 мај да ја претстави својата „мапа на патот“, во која ќе бидат наведени можните опции за оваа стратегија. Според истиот извор, се разгледува и можноста за воведување трговски мерки кои би им забраниле на европските компании да склучуваат нови договори со руски добавувачи на гориво.

Дополнително, Комисијата анализира правна рамка која би дозволила компаниите да се повикаат на клаузула за „виша сила“ (force majeure), со што би можеле да излезат од постојните договори без да платат казни.

По објавувањето на мапата на патот, ЕК планира консултации со земјите-членки и со засегнатите компании. Доколку Комисијата одлучи да продолжи со некој од предложените правни инструменти, ќе поднесе законски предлог кој ќе треба да биде одобрен од Европскиот парламент и од квалификувано мнозинство на земјите-членки, во зависност од видот на мерката.

Германија се подготвува за потенцијална воена криза: Армијата бара логистичка поддршка од приватниот сектор

Германската армија се обрати до повеќе големи компании со барање за логистичка поддршка во случај на потреба од брзо распоредување на војници и опрема на источната граница на НАТО, објави весникот Handelsblatt.

Со оглед на централната позиција во Европа, Германија игра клучна улога како логистички центар. Земјата се има обврзано дека ќе придонесе со 35.000 војници и над 200 авиони и бродови во рок од 30 дена во случај на поголем конфликт, како дел од новиот модел на НАТО, насочен кон справување со растечките закани, особено од Русија.

Според Handelsblatt, армиското барање вклучуваше поддршка за транспорт на војници, муниција и опрема, во сценарио на евентуален напад од Русија. Во дискусиите е и идејата школа за летање на Луфтханза да обезбедува основна обука за пилоти на борбени авиони.

Меѓу компаниите што се дел од разговорите се одбранбениот гигант Рајнметал, авио-компанијата Луфтханза и државниот железнички оператор Дојче Бан.

Германските воени сили сѐ повеќе се потпираат на услуги од комерцијалниот транспорт во кризни подрачја. Фокусот на одбраната во последните години е вратен кон домашната безбедност, особено по руската инвазија врз Украина во февруари 2022 година, што предизвика сериозна загриженост за европската безбедност.

Историска пресвртница и нов модел на регрутација

Неколку дена по почетокот на војната во Украина, германскиот канцелар Олаф Шолц ја најави „Цајтенвенде“ – историска пресвртница што доведе до формирање на фонд од 100 милијарди евра за модернизација на армијата.

Новата коалициска влада, предводена од Фридрих Мерц, објави план за доброволна воена служба со цел регрутација на над 100.000 нови војници во најкраток можен рок. Сите млади што ќе наполнат 18 години ќе добијат прашалник за проценка на нивната способност за воена служба, а погодните кандидати ќе добијат повик за доброволно пријавување.

Прашалникот ќе биде достапен и за младите жени што ќе сакаат да учествуваат.

„Потребни ни се 100.000 нови војници, и тоа веднаш“, изјави неодамна генерал Карстен Бројер, шеф на Бундесверот. Тој нагласи дека Германија има цел да изгради армија од над 460.000 луѓе, вклучувајќи резервисти и ветерани.

Во моментов, Бундесвер брои само околу 182.000 активни припадници. Минатата година повеќе војници ја напуштиле армијата отколку што се пријавиле, а речиси третина од новите регрути не ја завршиле основната обука.

Враќање на воената култура?

Иако Германија ја укина задолжителната воена служба во 2011 година, обидите да се рекламира армијата честопати наидуваат на отпор во јавноста. Министерот за одбрана Борис Писториус, за кого се очекува да остане на функцијата и во новата влада, го поддржува новиот модел како прагматичен компромис.

Но, одбранбените аналитичари предупредуваат дека доколку доброволната служба не привлече доволно млади, можно е повторно воведување на задолжителна регрутација.

Кристијан Рихтер од Институтот за одбранбени и стратешки студии во Хамбург вели дека неуспехот во регрутацијата би ја загрозил не само германската безбедност, туку и стабилноста на НАТО. Тој укажува дека сегашниот план подразбира дека доброволноста е само почетен чекор, со потенцијал за промени доколку се покаже неефикасен.

Аналитичарите велат дека Германија се обидува да воведе модел сличен на „тотална одбрана“ како во Шведска, кој интегрира воени и цивилни структури. Но, предизвиците остануваат сериозни – од лошата поврзаност на базите, до слабата присутност на армијата во секојдневниот живот на младите.

Професорот Карло Масала од Универзитетот на Бундесверот во Минхен предупредува: „Ако Берлин не успее да го обнови воениот капацитет до 2029 година – кога германската разузнавачка служба проценува дека Русија би можела да биде подготвена за потенцијален конфликт со НАТО – ќе биде предоцна.“