Македонија

Македонските генијалци со тројна победа во роботика на Крит

Македонски успех на Олимпијада за роботски спортови – освоени првото, второто и третото место!

Со огромна гордост можам да споделам дека македонски ученици од СТЕМ Академијата се враќаат со злато, сребро и бронза од глобалната Олимпијада за натпревар во роботски спортови, која се одржува на грчкиот остров Крит. Нашите тимови се натпреваруваа во категоријата „петобој арена“, каде самонаведувачки робот треба да изврши низа задачи во рок од четири минути – и беа апсолутно најдобри!

Марко Ангелов, Стефан Марковски, Павел Попоски, Андреј Крстев, Јаков Петков, Анастасија Дудеска и Неда Бошковска – ученици на возраст од 13 до 18 години – се натпреваруваа поделени во тимовите Space Walkers, Space Walkers Jr и Space Walkers Girls, под менторство на двајца едукатори-тренери. Сите три тима се враќаат со медали, освојувајќи ги првите три места во својата категорија!

Пред натпреварот, учениците изјавија дека „петобој арена“ е најпредизвикувачката дисциплина, со оглед на тоа што од роботот се бара брзина, прецизност и самостојно носење одлуки – а тие покажаа дека знаат како да се справат со сето тоа.

Оваа интернационална Олимпијада, која трае до 14 април, е едно од најголемите случувања во светот на образовната роботика – учествуваат повеќе од 1.800 тимови од 50 земји.

Минатиот викенд, дел од овие ученици веќе покажаа дека се сериозни играчи и на Медитеранскиот СТЕМ натпревар во Атина, од каде што се вратија со дури пет награди. Таму, деца на возраст од осум до 12 години, поделени во пет различни тима, се натпреваруваа во две категории, решавајќи задачи поврзани со преживување на Марс – и тоа преку роботика со лего коцки.

Овие млади генијалци навистина ни покажуваат дека иднината на науката и технологијата во Македонија е во сигурни раце. 👏

Македонија

Македонските деца сè порано пробуваат цигари и алкохол: Првата цигара на 9 години, алкохол на 13

Резултатите од најновото истражување ЕСПАД 2024, презентирано од Институтот за јавно здравје, покажуваат загрижувачки тренд кај македонските ученици – дел од децата ја запалуваат првата цигара уште на деветгодишна возраст, додека првиот контакт со алкохол најчесто се случува околу 13 години.

Истражувањето било спроведено во 96 средни училишта со повеќе од 2.800 ученици и укажува и на значителен пораст на употребата на електронски цигари. Повеќе од една четвртина од учениците пробале е-цигари, а секој десетти ги користел во изминатиот месец.

Алкохолот останува најраспространета психоактивна супстанца меѓу адолесцентите, при што момчињата почесто пријавуваат рана употреба, интоксикација и тешко епизодно пиење. Речиси третина од учениците првпат консумирале алкохол на 13 години или помлади.

Иако помал обем се регистрира и употреба на седативи без рецепт, канабис и коцкање, овие појави се особено присутни кај машката популација. Надлежните институции предупредуваат дека овие трендови бараат засилени и современи превентивни мерки.

Од Министерството за образование и наука информираат дека училиштата веќе спроведуваат програми за превенција на злоупотреба на психоактивни супстанци, а од оваа учебна година е воведен и изборен предмет за здравствена писменост. Институтот за јавно здравје нагласува дека резултатите од ЕСПАД треба да послужат како основа за подобрување на политиките и заштита на здравјето на младите.

Македонија

АХВ засилено ги контролира детските новогодишни пакетчиња: дел од нив повлечени поради неточни декларации

Во пресрет на новогодишните празници, Агенцијата за храна и ветеринарство (АХВ) спроведе 262 вонредни инспекциски надзори за да ја провери безбедноста на детските новогодишни пакетчиња. Контролите беа извршени во магацини за пакување, маркетите и продавниците кои ги пласираат овие производи.

Поради несовпаѓање на роковите на збирната декларација со поединечните рокови на производите и непотполни декларации, инспекциските служби издадоа 4 решенија за повлекување на пакетчиња од промет. Дополнително, двајца оператори со храна добија наредби за ставање на комплетни збирни декларации на пакетчињата.

Од спроведените 262 инспекциски надзори, не се изречени парични казни и не е поништена ниту една храна како небезбедна. Во споредба со ланската сезона, кога беа утврдени сериозни неправилности како погрешни ознаки, истечен рок на употреба и промени во својствата на производите, годинава се забележани само минимални недоследности кај операторите.

АХВ најавува дека контролните активности ќе продолжат и во наредниот период, особено пред и по новогодишните празници, со цел да се осигура безбедноста на детските пакетчиња.

Македонија

Итни мерки против аерозагадувањето активирани и во Скопје

По Кичево и Струмица, од денеска итните мерки за справување со аерозагадувањето се активираат и во Скопје, откако мерните станици регистрираа надминување на дозволените концентрации на штетни честички во повеќе скопски општини. Зголемената магла дополнително ја влошува состојбата, а високи нивоа на загаденост се забележани и во други градови низ државата.

Министерството за животна средина и просторно планирање ги активираше протоколите за заштита на јавното здравје, со посебен фокус на заштита на најранливите категории граѓани.

Согласно владините мерки, работодавците имаат обврска да ги ослободат од работни обврски бремените жени, лицата постари од 60 години, лицата со хронична астма, како и лицата кои прележале миокарден инфаркт или мозочен удар, без разлика на возраста.

Лекарите, особено пулмолозите, апелираат граѓаните да го ограничат престојот на отворено на минимум, доколку нема итна потреба. Според нив, најкритични се раните утрински и доцните вечерни часови, кога концентрациите на загадувачки честички се највисоки. Доколку е неопходно движење, се препорачува користење на јавен превоз наместо сопствени возила.

Надлежните институции ги повикуваат граѓаните редовно да ги следат препораките и официјалните соопштенија сè додека трае епизодата на загаден воздух.