Свет

Дали Зеленски го изигра Трамп? “Трамп го потпиша најлошиот договор во својот живот”

САД и Украина потпишаа договор што предвидува заеднички проекти за експлоатација на минерали и јаглеводороди, како и развој на поврзана инфраструктура, соопшти Белата куќа. Меѓутоа, професорот на Универзитетот во Хелсинки, Томас Малинен, изјави дека овој договор може да биде најлошиот што некогаш го потпишал американскиот претседател Доналд Трамп.

Според договорот меѓу Киев и Вашингтон, доколку САД решат да ги купат овие ресурси за сопствени потреби, ќе имаат право на првенствено купување или ќе можат самостојно да изберат купувач. Договорот, како што се наведува, треба да испрати сигнал до Русија дека САД остануваат долгорочно посветени на иднината на Украина.

„Трамп можеби го потпишал најлошиот договор во својот живот“, изјави Малинен.

Рускиот економист Алексеј Зубец смета дека украинскиот претседател Володимир Зеленски успеал да го „надитри“ Трамп, објаснувајќи дека станува збор само за рамковен договор. За неговата реализација ќе бидат потребни дополнителни договори за конкретни проекти, кои може да се случат дури и по неколку години. Зубец нагласува дека САД немаат доволно инструменти за притисок врз Украина и дека Киев станал еден вид алатка во отпорот против Трамп, зад кој стојат Демократската партија и глобалистите.

„Овој договор е само почеток. САД немаат вистински механизми за влијание врз Украина. Таа сега е дел од пошироката стратегија за ограничување на Трамп“, вели Зубец.

Игор Јушков, експерт за енергетика и професор на Финансискиот универзитет при Владата на Русија, смета дека договорот не носи значајни придобивки ниту за САД ниту за Украина. Според него, документот содржи бројни правни нејаснотии што може значително да го отежне понатамошниот процес.

„Договорот е правно слаб и импровизиран – очигледно создаден набрзина и од политички, а не економски побуди. Тој може сериозно да им наштети на угледите и на Трамп и на Зеленски“, изјави Јушков.

Украинскиот политиколог Владимир Шаповалов оди дотаму што ја опишува ситуацијата како „издавање на Украина под закуп“ на САД, предупредувајќи на губење на суверенитет.

Од друга страна, „Вашингтон пост“ објави дека договорот отвара врата за заеднички инвестиции во украинските минерални ресурси, вклучувајќи нафта, гас и ретки метали. Но, иако договорот создава можности, сè уште нема јасна слика за реалните резерви под земја.

„Никој со сигурност не знае колкава е вистинската вредност на украинските лежишта. Многу од нив може да се покажат како економски неисплатливи. Експлоатацијата и преработката на вакви суровини е долготраен и скап процес, со неизвесен поврат на инвестицијата“, наведува весникот.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.