Свет

„Њујорк тајмс“: Украина добива нова американска помош – Ракетен систем со огромна моќ

Украина ќе добие нова американска помош, а ракетниот систем „Патриот“ што се наоѓа во Израел ќе биде испратен во таа земја, изјавија за „Њујорк тајмс“ четворица неименувани американски функционери.

Во исто време, западните сојузници преговараат за испраќање на друг таков систем во Украина од Германија или Грција.

Изворите на весникот не сакаа да прецизираат дали одлуката за префрлање на системот „Патриот“ во Украина е донесена пред доаѓањето на претседателот Доналд Трамп во Белата куќа, односно за време на администрацијата на Џозеф Бајден.

Портпаролот на Советот за национална безбедност на Белата куќа, Џејмс Хјуит, изјави дека телото не дава детали за распоредувањето на одбранбените системи.

„Претседателот Трамп беше јасен – сака војната во Украина да заврши и убиствата да престанат“, рече тој.

Министерството за одбрана објави дека продолжува да испраќа опрема во Украина во рамките на претходно одобрените пакети.

Испораката на системот „Патриот“, која претходно не беше најавена, доаѓа во време кога Русија ги засилува нападите врз Украина, пишува „Њујорк тајмс“.

Додека Русија ги интензивира своите напади, најновите изјави на Трамп за војната укажуваат на омекнување на неговата позиција во корист на Украина, проценува весникот.
Украинскиот претседател Володимир Зеленски постојано бара повеќе системи „Патриот“ од почетокот на војната, наведувајќи дека тие се клучни за одбраната на земјата.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.