Спорт

Анчелоти си заминува, Чаби Алонсо нов тренер на Реал Мадрид

Карло Анчелоти е на излезна врата од Реал Мадрид и дефинитивно ќе го напушти клубот по завршувањето на тековната сезона 2024/25. Иако „кралевите“ сè уште се во трка за титулата во Ла Лига, без оглед на исходот – дон Карло си заминува од „Бернабеу“.

Според шпанска Марка, која важи за добро информирана кога станува збор за Реал, Анчелоти и клубот постигнале договор за разделба. Наследникот веќе е познат – Чаби Алонсо. Поранешниот играч на Реал доаѓа од Баер Леверкузен, каде што оваа сезона освои сè – Бундеслигата, Купот и Суперкупот на Германија.

Алонсо веќе дал зелено светло за тригодишен договор, кој ќе стапи на сила по завршувањето на Светското клупско првенство. Во тој период, Реал би требало да го предводи Сантијаго Солари.

Што се однесува до засилувањата – Чаби ќе работи според стратегијата на клубот, но ќе има простор и за свои предлози. Не се очекува драстична реконструкција на тимот, туку повеќе ќе се извлекува максимум од ѕвезди како Винисиус, Белингам и новопристигнатиот Мбапе.

Покрај тоа, на „Бернабеу“ се очекува да пристигне и Трент Александер-Арнолд. Алонсо, пак, бара уште две засилувања: еден централен дефанзивец и свежина во средниот ред – позиции кои клубот веќе работи да ги пополни.

Спорт

Лоши вести за македонскиот ракомет

Европската ракометна федерација (ЕФХ) го одреди новиот формат за Лигата на шампионите, а македонскиот ракометен шампион нема директно учество во најквалитетното натпреварување туку тоа ќе може да го оствари со барање за вајлд-карта.

Извршниот комитет го потврди системот, а рангирањето на федерациите е според резултатите од сезоните 2022/23, 2023/24 и 2024/25. На првите десет места се рангирани следните федерации: Германија, Шпанија, Франција, Данска, Полска, Унгарија, Романија, Португалија, Хрватска и Норвешка, а тоа значи дека овие држави имаат една загарантирано место во Лигата на шампионите. Овие федерации можат да побараат и по две вајлд карти, а ЕХФ ќе додели осум „специјални покани“.

Во натпреварувањето од следната сезона ќе бидат 24 екипи, поделени во шест групи по четири, а дванаесет од нив ќе се пласираат во главната рунда. Другите 12 екипи ќе продолжат во 1/16 финалето од Европската лига.

Спорт

По натпреварот – во полиција: Манасков приведен по напад врз тренерот на Охрид

Суперлигашкото дерби меѓу Пелистер и Охрид заврши со победа за домашниот тим (29-25), но вистинската драма се случи по последниот судиски свиреж, кога спортската сала „Билјанини Извори“ се претвори во арена на неспортски инциденти.

Шокантни сцени го обележаа традиционалното поздравување меѓу играчите. Ракометарот на Пелистер, Дејан Манасков, (33) – член на битолскиот тим, физички го нападна Крсте Андоновски, еден од помошниците во стручниот штаб на Охрид, предводен од Борис Ројевиќ.

СВР Охрид веднаш реагираше. Портпаролот Стефан Димоски потврди:

„На 14.12.2025 година во 20.20 часот, во СВР Охрид приведен е Д.М. (33) ракометен играч од Скопје, член на ракометен клуб од Битола. Тој, по завршување на ракометен натпревар […] при меѓусебното поздравување на играчите, физички го нападнал К.А. помошен тренер на домашниот-охридскиот ракометен клуб. По целосно расчистување на настанот, против напаѓачот ќе биде поднесена соодветна пријава.“

Хаосот не запре во салата. Според извештаите, ракометарите на Пелистер, во налет на бес, целосно ја демолирале соблекувалната на гостинскиот тим.

Атмосферата дополнително се вжешти на улиците на Охрид, каде навивачката група на Пелистер, „Чкембари“, била вклучена во физички пресметки, напаѓајќи локални охриѓани во самиот центар на градот.

Овој инцидент фрла мрачна сенка врз спортскиот дух и бара итна реакција од ракометната федерација. Се очекуваат жестоки казни за неспортското однесување, како на теренот, така и надвор од него.

Спорт

Омерагиќ: Конструктивен состанок за избор на нов селектор на македонската А репрезентација

Како Комисија за избор на нов селектор на македонската А репрезентација, денеска имавме конструктивен состанок, изјави Масар Омерагиќ, претседател на Фудбалската федерација на Македонија (ФФМ).

На состанокот беа разменети размислувања за профилот на македонски тренер кој ќе внесе стабилност, јасна концепција и континуитет во работата со најдобрата селекција.

Предлогот за нов селектор ќе биде доставен до Управниот одбор на ФФМ најдоцна до 25 декември.