Економија

Мицкоски: Одговорниот и принципиелниот тим во Министерството за финансии носат резултати

Премиерот Христијан Мицкоски на Самитот 2025, во организација на „Македонија 2025“, ја оцени работата на досегашната влада и ги претстави главните предизвици со кои се соочува новиот кабинет. Во своето обраќање, тој нагласи дека за успешна реализација на реформите е потребно суштинско менување на работењето, а не само на јавната перцепција.

Одговарајќи на прашањето што го блокира напредокот, премиерот истакна дека политиката најчесто се темели на впечатоци, а не на суштина. „За жал политиката најмногу се темели на перцепција, многу малку на суштина, иако суштината на долг рок ја гради перцепцијата“, нагласи Мицкоски.
Во продолжение, тој го пофали тимот во Министерството за финансии за воспоставената „принципиелна дисциплина“ и правилно фокусирање на расходите, што, според него, ја доведува државата во сегашните стабилни економски параметри: „Посебно сум инспириран и воодушевен од работата на тимот внатре во рамките на министерството за финансии коешто воспостави принципиелна дисциплина и правилно фокусирање и трошење на средствата во буџетот, инаку не не би биле во овие параметри во кои денес се наоѓаме, ако сето ова за кое претходно зборувавме не функционира во еден систем“.
Заклучувајќи, премиерот нагласи дека само дисциплинирано и континуирано однесување може да ја промени перцепцијата на јавноста, која „не секогаш располага со точни информации и често носи одлуки врз основа на чувства“. „Ние кои ги имаме информациите, мораме дисциплинарно да се однесуваме за да можеме на долг рок да ја промениме перцепцијата“, дополни тој.

Самитот „Macedonia 2025“ е годишна конференција организирана од невладината и независната организација Macedonia2025, која што собира бизнис лидери, претприемачи, инвеститори и креатори на јавни политики од регионот и светот. Оваа година Самитот се одржува на 12 и 13 мај 2025 во хотел Skopje Marriott, каде што учесниците ќе имаат можност да присуствуваат на клучни говори, панели за економски развој, дигитална трансформација и иновации, како и на бројни нетворкинг сесии за размена на искуства и воспоставување деловни партнерства. Целта на настанот е да ги мобилизира стручњаците и носителите на одлуки кон зајакнување на економската клима во Македонија и да поттикне долгорочно одржлив развој.

Економија

Историски удар за германската автомобилска индустрија: Волксваген ја затвора фабриката во Дрезден

Германската автомобилска индустрија се соочува со сериозни предизвици откако Волксваген најави дека ќе ја запре производството во својата фабрика во Дрезден. Ова е прво затворање на фабрика во Германија во 88-годишната историја на компанијата, што означува историски момент за индустријата која долго време беше мотор на германската економија.

Причините за затворањето се поврзуваат со структурните промени во автомобилската индустрија, особено транзицијата кон електрични возила и потребата за намалување на трошоците. Од Волксваген соопштуваат дека ќе преземат мерки за поддршка на вработените, вклучително и понуди за пренасочување кон други објекти и програми за обука.

Експертите предупредуваат дека ова затворање може да има пошироки последици врз германската економија и добавувачите во автомобилскиот сектор, особено во регионот околу Дрезден. Автомобилската индустрија во Германија, која долго време беше симбол на технолошка извонредност и економска стабилност, сега се соочува со потреба од брзи адаптации за да остане конкурентна на глобалниот пазар.

Економија

Од полноќ нови цени на горивата

Регулаторната комисија за енергетика, водни услуги и услуги за управување со комунален отпад (РКЕ) донесе Одлука со која се врши намалување на малопродажните цени на нафтените деривати во просек за 2,09% во однос на одлуката од 12.12.2025 година. Поевтинуваат горивата од полноќ.

Малопродажните цени на бензините ЕУРОСУПЕР БС-95 и ЕУРОСУПЕР БС-98 како и на ЕУРОДИЗЕЛ (Д-Е V) се намалуваат. Поевтинуваат горивата за 2,00 ден/лит.

Малопродажната цена на Екстра лесното масло за домаќинство на (ЕЛ-1) се намалува за 1,00 ден/лит.

Малопродажната цена на Мазутот М-1 НС се намалува за 0,248 ден/кг и сега ќе изнесува 32,635 ден/кг.

Од 16.12.2025 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 73,00 (денари/литар)
Моторен бензин ЕУРОСУПЕР БС – 98 75,00 (денари/литар)
Дизел гориво ЕУРОДИЗЕЛ БС (Д-Е V) 66,50 (денари/литар)
Масло за горење Екстра лесно 1 (ЕЛ-1) 65,50 (денари/литар)
Мазут М-1 НС 32,635 (денари/килограм)

Економија

Скопје добива авиолинии до Прага и Келн

Од Меѓународниот аеродром Скопје вечер во 19:25 ќе биде обновена линијата на Виз ер до Келн со четири лета неделно – секој понеделник, среда, петок и недела.

Оваа авиолинија е порака дека Македонија ги отвора вратите кон Европа и ја зацврстува поврзаноста со еден од најдинамичните региони, рече министерката за енергетика, рударство и минерални суровини Сања Божиновска на прес-конференција на скопскиот аеродром.

Таа нагласи дека секоја нова дестинација што им ја отвораме на граѓаните е нова можност – за подобра економска соработка, повеќе туристи, побрз развој на бизнисот и нови партнерства.

Тоа е и можност за поголема видливост на Македонија и посилно вклучување во европските економски и технолошки текови, додаде Божиновска, истакнувајќи дека на нејзина иницијатива повторно се воспоставува авиолинијата Скопје – Прага, која беше во функција од 2005 до 2012 година.

Неџат Курт, генерален директор на Виз ер, нагласи дека отворањето на рутата создава нови можности за патниците и поврзување на двата града, како и економска соработка, туризам, културни разменувања и развој на деловни врски.

Среќен сум што директната линија ќе ја направи Прага подостапна за македонските граѓани и компании и ќе им овозможи на чешките туристи и инвеститори полесно да ја откријат Македонија, рече Курт.

Андраш Радо, директор за комуникации во Виз ер, соопшти дека цената на билетот за летот Скопје – Прага во еден правец за јануари е 21 евро.

Посветени сме да имаме ниски цени и не се предвидуваат корекции, додаде Радо.

Според Курт, следната година се очекува раст од 20 проценти на авиосообраќајот од македонските аеродроми, со над 3,5 милиони патници.