Скопје

Ѓорѓиевски: Фолклорот ја чува душата на Македонија, а фестивалот “Цветови” ги спојува срцата на луѓето

Градоначалникот на општина Кисела Вода, Орце Ѓорѓиевски, присуствуваше на Меѓународниот детски фестивал “Цветови”, кој го одржа на празникот Свети Еремија. Во својот говор, Ѓорѓиевски нагласи дека фолклорот е не само богатство, туку и душа на Македонија и Македонците, преку која се негуваат традициите и се зачувува наследството.

„Преку фолклорот ги продолжуваме нашите обичаи, го чуваме нашето наследство и го споделуваме со светот. Секој настап, секоја песна и носија се сведочат за нашата македонска приказна“, изјави Ѓорѓиевски. Тој истакна дека културниот и духовен белег на општината е манастирот, каде што се одржува фестивалот, и ја нагласи важноста на религијата како основа на хуманоста и човечноста.

Градоначалникот исто така упати благодарност до локалната заедница која со љубов и посветеност го одржува манастирот, како и до организаторите на фестивалот, ансамблот „Никола Јонков Вапцаров“. Според него, фестивалот е симбол на пријателство и спој на традицијата и иднината, со пораки за единство и мир.

Ѓорѓиевски посочи дека Општина Кисела Вода ја поддржала и иницијативата за поставување на Крстот во близина на манастирот, што го симболизираат надежта, силата и вербата.

„Да живее Македонија!“, заврши својот текст Ѓорѓиевски, со апел за зачувување на традициите и културното наследство за идните генерации.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.