Економија

Колкава е пензијата во Германија по 45 години работен стаж?

Според најновите официјални пресметки, лице кое во Германија работело 45 години со полно работно време и примало просечна плата, може да очекува старосна пензија од нешто над 1.600 евра месечно – пресметано во нето износ. Сепак, ваквите случаи се реткост, а во пракса мнозинството пензионери добиваат значително пониски износи. Разликите се особено изразени меѓу пензиите на мажите и жените.

Од 1 јули 2025 година, вредноста на еден пензиски поен во германскиот пензиски систем ќе изнесува 40,79 евра. Тоа значи дека вработен кој секоја година добивал по еден целосен пензиски поен, по 45 години ќе оствари месечна бруто пензија од 1.835,55 евра. По одбитоците за здравствено осигурување и осигурување за долгорочна нега, остануваат околу 1.621 евро нето. Во некои случаи, на овие пензии дополнително се пресметува и данок, во зависност од вкупните приходи на пензионерот.

Проценките покажуваат дека за достоинствен живот во староста, потребни се меѓу 1.464 и 2.100 евра месечно, зависно од регионот и трошоците за живот. Со тоа, „стандардната“ германска пензија едвај ја покрива долната граница на овие потреби.

Иако износот на „целосната“ пензија често се истакнува во јавноста, реалните исплати се значително пониски. Според податоците на Германскиот пензиски фонд за 2023 година, просечната пензија за мажите изнесувала 1.348 евра, додека жените добивале само 908 евра месечно. Во споредба со стандардната пензија која тогаш изнесувала 1.692 евра бруто, просечниот маж добивал околу 340 евра помалку, а жените дури 784 евра помалку.

Причините за овој јаз се бројни – жените почесто земаат паузи од работата поради грижа за деца, работат со скратено работно време или се соочуваат со подолги периоди на невработеност. Дополнително, и ниските пензии може да подлежат на оданочување, што уште повеќе го намалува реалниот износ што пензионерите го имаат на располагање секој месец.

Како последица на овие фактори, се проценува дека речиси секој седми пензионер во Германија живее под границата на сиромаштија. Според официјалната статистика, околу 17% од повозрасната популација немаат доволно приходи за пристоен живот, и покрај децении плаќање придонеси во пензискиот систем.

Економија

Најбарани професии во ЕУ – продажба, маркетинг и производство

Според податоците на Евростат за минатата година, најголема незадоволена побарувачка за работна сила во Европската унија имало во професиите поврзани со продажба, маркетинг и производство. Ова укажува на можни тешкотии за работодавачите при регрутирање на персонал во овие сектори.

Според експерименталната статистика, составена делумно преку податоци од онлајн огласи за работа, највисоки стапки на слободни работни места биле забележани кај работници во производство и помошни канцелариски работници, со стапка од 7,3% секое. Следуваат други работници во продажба со 6,1% и уметнички, културни и кулинарски соработници со 6%.

Дополнително, околу 5,8% од непополнетите позиции се однесувале на работници во транспорт и магацини, 5,7% на менаџери за малопродажба и големопродажба, 5,4% на агенти за бизнис и услуги, 5,2% на оператори на постројки и машини и 5% на инженерски професионалци, со исклучок на електротехничките профили.

Евростат истакнува дека иако здравствените работници и наставниците, како и други занимања во јавниот сектор, исто така може да се соочат со тешкотии при регрутирање, тие поретко се рекламираат онлајн, па затоа во податоците се рангирани пониско. Од друга страна, ИТ професиите може да бидат претставени со поголема застапеност во онлајн огласите за работа.

Економија

Хрватска ги менува правилата за странски работници – еве колку дозволи има за Македонците

Хрватска воведува нови услови за вработување на странски државјани со цел подобра контрола, намалување на нелојалната конкуренција и спречување на нелегалните практики. Измените на Законот за странци воведуваат построги здравствени критериуми и барање за познавање на хрватскиот јазик, информира ХРТ.

Граѓанин на трета земја, како Македонија, за прва дозвола за привремен престој ќе мора да приложи потврда за здравствена состојба и статус на вакцинација, кои не смеат да бидат постари од 90 дена. Исто така, познавањето на хрватскиот јазик се смета за основа за интеграција на странските работници, а државниот секретар Иван Видиш посочи дека и покрај кофинансираното учење јазици од Европскиот социјален фонд, интересот кај работниците е слаб.

Хрватска годинава издаде над 11.000 работни дозволи за граѓани од Македонија. Премиерот Андреј Пленковиќ истакна дека во последните две години се создадени 100.000 нови работни места, а бројот на невработени паднал на 81.000, што го покажува ефектот од активната политика за вработување.

Министерот за труд Марин Пилетиќ додаде дека во земјата моментално има околу 140.000 странски работници, а измените на законот ќе го намалат бројот на нови дозволи, додека ќе се зголеми значењето на оние кои веќе се наоѓаат во Хрватска.

Претседателот на GSV, Иван Мишетиќ, посочи дека во наредните пет години ќе бидат потребни над 100.000 работници од странство поради планираниот раст и пензионирањата, бидејќи домашниот пазар не може да го задоволи овој раст.

Економија

Од вечерва нова цена на дизелот

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши намалување на малопродажните цени на нафтените деривати во просек за 0,60% во однос на одлуката од 18.12.2025 година.

Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 1,631%, кај дизелот за 4,633%, кај екстра лесното масло за 3,987% и кај мазутот зголемувањето е за 0,223%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,1645%.

Од 20.12.2025 година од 00:01 часот максималните цени на нафтените деривати ќе изнесуваат:

– Моторен бензин ЕУРОСУПЕР БС – 95 71,00 (денари/литар);
– Моторен бензин ЕУРОСУПЕР БС – 98 73,00 (денари/литар);
– Дизел гориво ЕУРОДИЗЕЛ БС (Д-Е V) 64,50 (денари/литар);
– Масло за горење Екстра лесно 1 (ЕЛ-1) 65,50 (денари/литар);
– Мазут М-1 НС 32,635 (денари/килограм).

Малопродажната цена на ЕУРОДИЗЕЛ (Д-Е V) се намалува за 2,00 ден/лит. Малопродажните цени на бензините ЕУРОСУПЕР БС-95 и ЕУРОСУПЕР БС-98, како и на Екстра лесното масло за домаќинство на (ЕЛ-1) и на Мазутот М-1 НС не се менуваат.