Обвинителот наведе дека од осумте лица, тројца остануваат во притвор, тројца се задржани под електронски надзор, а двајца се ослободени, пренесе Ројтерс.

Осум лица се обвинети за корупција, перење пари и учество во криминална организација по истрагата за сомнеж за поткуп во Европскиот парламент (ЕП), наводно во интерес на кинеската компанија Хуавеј, соопшти денеска белгискиот јавен обвинител.

Обвинителот наведе дека од осумте лица, тројца остануваат во притвор, тројца се задржани под електронски надзор, а двајца се ослободени, пренесе Ројтерс.

ЕП објави дека добило барање од белгиските власти да помогне во истрагата и дека наскоро ќе одговори.

Белгиските обвинители на 13 март објавија дека уапсиле неколку лица под сомнение дека примале мито во ЕП, наводно во корист на кинеската компанија Хуавеј.

Белгиските истражители извршија рација на 21 локација во Белгија и Португалија на 13 март, а оттогаш судијата нареди да се запечатат канцелариите на двајца помошници европратеници.

Обвинителите рекоа дека корупцијата се одвивала „многу дискретно“ од 2021 година под маската на комерцијално лобирање и вклучувала плаќања или подароци, како што се храна и патни трошоци.

Обвинителите рекоа дека поткупот бил во корист на Хуавеј.

Компанијата рече дека сериозно ги сфаќа наводите и има политика на нулта толеранција за корупција и други незаконски постапки.

Американскиот технолошки милијардер Илон Маск изјави денес дека се надева дека во иднина ќе постои целосно слободна трговија помеѓу Соединетите Американски Држави и Европа.

Маск, советник на претседателот Доналд Трамп, кој работи на намалување на трошоците на американската влада, зборуваше преку видео-линк на конгресот на италијанската десничарска партија Лига, одржан во Фиренца, пренесе Ројтерс.

„На крајот, се надевам дека ќе се договори дека и Европа и Соединетите Американски Држави би требало, по мое мислење, да преминат на нулта царинска ситуација, ефективно создавајќи зона на слободна трговија помеѓу Европа и Северна Америка“, истакна Маск.

Според плановите на Трамп, објавени во средата, Италија, која има голем трговски суфицит со САД, ќе биде подложена на општа царина од 20 отсто, заедно со другите земји од Европската унија.

Маск, кој повеќепати изразил поддршка за десничарските партии низ Европа, исто така изјави дека се надева дека ќе постои поголема слобода на движење помеѓу Европа и САД.

„Ако луѓето сакаат да работат во Европа или сакаат да работат во Северна Америка, по мое мислење, треба да им се дозволи тоа“, рече Маск и додаде дека тоа дефинитивно би било негов совет за претседателот на САД, Доналд Трамп.

Шпанската полиција денеска соопшти дека запленила еден тон кокаин откако разбила банда поврзана со криминалната група „Хелс Енџелс“ (Анѓели на пеколот), која криумчарела наркотици преку пристаништето во Валенсија, на истокот на Шпанија.

Шпанија е една од главните европски влезни точки за кокаин од Латинска Америка, пренесува шпанскиот портал Infobae.com.

Операцијата, која ја предводел Европол, резултирала со апсење на 20 лица, од кои половина се задржани во притвор, стои во соопштението на полицијата.

Во соопштението се додава дека две лица биле уапсени во Белгија, едно во Франција, а останатите во Шпанија. Некои од уапсените биле поврзани со огранокот на бандата „Хелс Енджелс“ во Белгија и претежно биле вклучени во процесот на контрола и преземање на пратки со дрога, соопштува шпанската полиција.

Бандата наводно криумчарела кокаин скриен во контејнери кои од Латинска Америка пристигнувале во пристаништето Валенсија, а до дрогата доаѓале користејќи таканаречени „луѓе пајаци“ кои се качувале на контејнерите, ги обивале користејќи клешта или рачни пили и го извлекувале кокаинот.