Илјадници католици присуствуваа на молитвата за папата Франциско на плоштадот Свети Петар во Ватикан во знак на почит на поглаварот на Римокатоличката црква кој почина во понеделникот.

Голем број новинари се собраа во близина на плоштадот, кампуваа да ги следат случувањата околу погребот на папата.

Папата Франциско (88) почина во понеделникот рано наутро од последици на мозочен удар и срцева слабост.

Последното збогување ќе се одржи во сабота на 26 април, по миса што ќе започне во 10 часот по локално време. Ковчегот ќе биде пренесен во базиликата Света Марија Велика во Рим каде ќе биде погребан папата.

Папата е роден во Буенос Аирес на 17 декември 1936 година од родители италијански имигранти. Студирал во Аргентина, а подоцна и во Германија.

Во текот на повеќе од една деценија од неговото папство, папата Франциско се обиде да ја реформира бирократијата на Ватикан, да се справи со корупцијата и да одговори на некои од најитните предизвици на Црквата.

Иако беше пофален за неговата понизност и посветеност на социјалната правда, неговото раководство, исто така, наиде на жестоко противење од конзервативците во и надвор од Црквата.

Илон Маск го намалува политичкиот ангажман поради падот на профитот на Tesla

Извршниот директор на Tesla, Илон Маск, најави дека ќе ја намали својата улога во администрацијата на американскиот претседател Доналд Трамп, конкретно во рамки на иницијативата за реформирање на државната управа, позната како „Одделение за ефикасност на владата“ (DOGE). Одлуката доаѓа откако компанијата забележа сериозен пад на приходите и профитот во првиот квартал од 2025 година.

Според извештајот на BBC, приходите на Tesla во автомобилската индустрија се намалиле за 20%, додека добивката опаднала за повеќе од 70% во споредба со истиот период минатата година.

Компанијата ги предупреди инвеститорите дека негативниот тренд може да продолжи, посочувајќи дека „променетиот политички сентимент“ би можел да има дополнително негативно влијание врз побарувачката за нејзините производи.

Маск призна дека неговото политичко ангажирање, вклучително и улогата во администрацијата на Трамп, ја одвлекло неговата посветеност од управувањето со Tesla, што, како што рече, делумно придонело за слабеењето на перформансите на компанијата.

Во минатото, Маск инвестираше над четвртина милијарда долари во кампањата за реизбор на Трамп и беше еден од лидерите на иницијативата за намалување на федералните трошоци и бројот на вработени во јавниот сектор.

„Мојот ангажман во DOGE иницијативата ќе биде значително намален од следниот месец“, изјави Маск, додавајќи дека ќе се занимава со државни прашања само еднаш до двапати неделно, „се додека тоа има смисла и се додека претседателот го посакува тоа“.

Tesla во првиот квартал оствари приход од 19,3 милијарди долари, што е пад од 9% во однос на истиот период лани, и значително под очекувањата на аналитичарите.

Компанијата се обиде да ја поттикне продажбата преку намалување на цените на возилата, но дополнителен притисок создадоа и царините воведени од администрацијата на Трамп кон Кина.

Tesla предупреди дека „променливата трговска политика“ може дополнително да ги зголеми трошоците и да предизвика нарушувања во синџирот на снабдување.

Акциите на Tesla изгубиле приближно 37% од својата вредност од почетокот на годинава.

Аналитичарите предупредуваат дека, и покрај технолошките иновации, Tesla се соочува со се поголема конкуренција и сериозни предизвици во глобалните синџири на снабдување.

Трамп: САД се во добра позиција во трговските односи со Кина

Американскиот претседател Доналд Трамп изјави дека САД се наоѓаат во „добра позиција“ во односите со Кина и дека моменталната ситуација претставува преодна фаза во текот на трговскиот и царинскиот конфликт кој настана откако Вашингтон воведе царини на увозот на кинеска стока.

„Ако Кина не прифати трговски договор, САД ќе ги постават своите услови“, истакна Трамп, според агенцијата Ројтерс.

Тој додаде дека царините на увоз од Кина нема да достигнат стапка од 145 проценти.

„Тие нема да бидат нула, но исто така нема ни да се приближат до 145 проценти“, изјави Трамп, додавајќи дека сè уште очекува договор со Кина, иако не понуди конкретни детали или насоки за тоа кога би започнале преговорите меѓу двете земји.

Си Џинпинг: Трговските војни им штетат на сите држави

Кинескиот претседател Си Џинпинг, во изјава дадена за време на официјалната посета на претседателот на Азербејџан, Илхам Алиев, во Пекинг, истакна дека трговските и царинските војни го поткопуваат „правото и легитимните интереси на сите земји“.

Според него, тие носат штета на мултилатералниот трговски систем и имаат негативно влијание врз глобалниот економски поредок.

Како што пренесуваат кинеските државни медиуми, Си нагласил дека Кина е подготвена да соработува со Азербејџан во заштитата на меѓународниот систем со централна улога на Обединетите нации, како и во зачувување на правниот поредок во меѓународните односи.

Целта на оваа соработка, според Си, е заштита на легитимните права и интереси на двете држави, како и одбрана на меѓународната правда и еднаквост.