Скопје

Ѓорѓиевски: Расадник добива нова градинка за 120 деца

Во населбата Расадник започна изградбата на нова, современа детска градинка со капацитет за 120 деца, од кои две занимални ќе бидат наменети за јасли. Објектот ќе се простира на површина од 800 квадратни метри и претставува дел од поширокиот план за целосно затворање на листите на чекање за прием во градинки во општина Кисела Вода.

Градоначалникот Орце Ѓорѓиевски изјави дека проектот се реализира со одлична динамика и е резултат на заложбата секое дете да добие сигурно и модерно место за згрижување. Тој потсети дека при преземањето на функцијата, повеќе од 400 деца биле на листите на чекање, но со изградбата на оваа, како и на градинките во 11 Октомври и Потстаница, ќе се овозможи прием за сите деца од општината, како и за деца од соседните општини.

„Ова не е само инвестиција во инфраструктура, туку инвестиција во иднината. Обезбедуваме топол, безбеден и модерен простор за секое дете, а истовремено го олеснуваме секојдневието на родителите“, изјави Ѓорѓиевски.

Тој упати благодарност до Владата на Република Македонија, премиерот Христијан Мицкоски, Министерството за труд и социјална политика и сите институции и лица вклучени во реализацијата на проектот.

ВИДЕО

Скопје

Густа магла предизвика застој на скопскиот аеродром

Густата магла во скопската котлина денеска предизвика пореметување во авиосообраќајот на Меѓународниот аеродром Скопје, при што неколку летови доцнат, а еден е откажан. Временските услови влијаат на слетувањата и полетувањата, информираат од аеродромот.

Најголемо доцнење е регистрирано кај летот на „Пегасус“ од Истанбул (Сабиха Гокчен), кој наместо во 09:55 ќе слета во 11:25 часот. Летот на „Виз Ер“ од Дортмунд ќе пристигне со половина час доцнење, додека летот на „АЏет“ од Истанбул, предвиден за пладне, е откажан. Летовите од Нирнберг, Фридрихсхафен и Виена засега се реализираат според распоредот.

Доцнења има и кај заминувањата. Летот на „Виз Ер“ за Париз (Бове), предвиден за 12:25, ќе полета во 13:00, а летот на „Туркиш Ерлајнс“ за Истанбул е одложен за 1 час и 20 минути, со полетување во 14:20. Аеродромот ги советува патниците редовно да ја следат официјалната веб-страница за најнови информации.

Скопје

Меџити: Образованието на мајчин јазик е темел на еднаквост и соживот

Денеска беше одбележан Денот на турското образование, во организација на Основното училиште Тефејјуз, институција со долга традиција во образованието на мајчин јазик. Настанот беше посветен на значењето на турското образование во Северна Македонија, неговата улога во зачувувањето на културниот идентитет, како и на континуираниот придонес на турската заедница во образовниот и општествениот живот.

Градоначалникот на Чаир, Изет Меџити истакна дека ваквите настани ја потврдуваат вредноста на образованието на мајчин јазик како клучен елемент за почит, еднаквост и соживот во мултиетничкото општество. Тој нагласи дека институционалната поддршка за образованието на мајчин јазик останува јасна и недвосмислена заложба.

Според Меџити, почитувањето и унапредувањето на образованието на мајчин јазик за сите заедници претставува основа за еднаквост, општествена кохезија и градење инклузивно општество во кое секој граѓанин има еднакви можности.

Скопје

Активирани алармантни мерки во Скопје – газдите треба да ги ослободат од работа следниве категории на лица

Министерството за животна средина и просторно планирање информира дека според податоците од Државниот автоматски мониторинг систем за квалитет на амбиенталниот воздух и добиената временска прогноза од Управата за хидрометеоролошки работи, прагот на алармирање на суспендирани честички со големина до 10 микрометри (надминување на вредноста од 150 mg /m3 во текот на два последователни денови) е надминат на мерните места во Скопје – Центар, Гази Баба, Карпош, Лисиче и Ректорат.

Прагот на алармирање е дефиниран во Уредбата за изменување и дополнување на Уредбата за гранични вредности за нивоа и видови на загадувачки супстанции во амбиенталниот воздух и прагови на алармирање, рокови за постигнување на граничните вредности, маргини на толеранција за гранична вредност, целни вредности и долгорочни цели (Службен весник на Република Македонија бр. 183 од 14.12.2017 година).

Во табелата се прикажани среднодневните концентрации на PM10 на мернoто место и деновите каде има појава на надминување на праг на алармирање.

Согласно настанатата состојба за мерните места во Скопје – Центар, Гази Баба, Карпош, Лисиче и Ректорат важат следните мерки:

Да се интензивираат вонредните инспекциски надзори на инсталациите со А-Интегрирана еколошка дозвола

Да се интензивираат вонредните инспекциски надзори на терен за контрола на инсталациите со Б-Интегрирани еколошки дозволи и Елаборати

Инсталациите со континуиран мониторинг да овозможат јавен пристап на измерените податоци

Да се интензивираат вонредните контроли на техничката исправност на возилата, особено оние со дизел горива и нерегистрирани возила

Да се интензивираат вонредните контроли на градилиштата

Забрана на горење на отворено

Се препорачува на сите правни субјекти (работодавци) да ги ослободат од работни обврски бремените жени, лицата постари од 60 години, како и лицата со хронична астма, прележан миокарден инфаркт или мозочен удар, без разлика на возраста, со препорака на матичен лекар

Се препорачува на сите правни субјекти (работодавци) да го реорганизираат работното време и лицата кои работат на отворено да работат од 11.00 до 17.00 часот

Се препорачува да не се организираат спортски натпревари и други културни манифестации на отворено.