Свет

Зеленски од Лондон: Русија, Иран и Северна Кореја се „коалиција на убијци“

Украинскиот претседател Володимир Зеленски за време на денешната посета на Лондон ја обвини Русија, Иран и Северна Кореја дека формираат „коалиција на убијци“ која систематски го тероризира украинскиот народ.

Зеленски се сретна со новиот британски премиер Кир Стармер, со кого потпишаа договор за заедничко производство на воена опрема – прв ваков договор меѓу Украина и Обединетото Кралство. Двајцата лидери се сретнаа во градината на Даунинг стрит, каде што разговараа и со украински војници кои се обучуваат во Велика Британија.

„Ова е огромен чекор напред во зајакнувањето на нашата поддршка за Украина,“ изјави Стармер, не прецизирајќи ги деталите од договорот. Зеленски, пак, оцени дека иницијативата ќе придонесе за зајакнување на одбранбената индустрија на двете земји.

Посетата се случи само неколку часа по нов масовен руски напад врз Киев, во кој беа користени 352 дрона – половина од нив ирански „Шахед“ – како и балистички ракети од севернокорејско производство. Загинаа најмалку 10 лица, а повеќе станбени згради беа тешко оштетени.

„Нашите противвоздушни сили успеаја да пресретнат многу дронови и ракети – но не и сите,“ изјави Зеленски. На социјалните мрежи тој порача дека соседите на Русија, Иран и Северна Кореја треба сериозно да се запрашаат дали можат да се заштитат од „оваа коалиција на убијци“.

За време на престојот, украинскиот лидер се сретна и со кралот Чарлс III во Виндзорската палата – нивна трета средба годинава. Зеленски се состана и со претседателите на двата дома на британскиот парламент, изразувајќи благодарност за континуираната британска поддршка во војната против руската агресија.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.