Свет

“Кога ќе се изгориш на млеко, ќе дуваш и на јогурт”: Путин овој пат бил исклучително внимателен на еден детаљ во разговорот со Макрон

Портпаролот на рускиот претседател, Дмитриј Песков, се осврна на деталите од неодамнешниот разговор меѓу Владимир Путин и францускиот претседател Емануел Макрон, истакнувајќи дека поради искуствата од минатото, рускиот лидер морал да биде воздржан во комуникацијата.

Песков посочи дека се мисли на разговорот кој Путин и Макрон го водеа пред повеќе од две години, а кој на крајот беше објавен во медиумите.

На прашањето дали овојпат биле преземени дополнителни безбедносни мерки, Песков одговори дека такви мерки немало, но нагласи дека Путин морал да биде повнимателен и повозддржан во изразувањето на своите ставови во споредба со претходно.

„Не, немаше дополнителни мерки. Меѓутоа, земајќи ја предвид хипотетичката можност и заканата разговорот да стане јавен, човек мора да биде воздржан во објаснувањето на својот став и ставовите на некои свои колеги“, изјави Песков.

Претходниот разговор и објавувањето на неговиот транскрипт Песков го опиша како болно и непријатно искуство.

„Такво тажно искуство на кршење на доверливоста на разговорите, за жал, постои. Сепак, засега ништо дополнително не е објавено“, додаде тој.

Тој се осврна и на претходната изјава на Путин, кој нагласи дека од сега натаму Кремљ ќе биде свесен дека на Запад овие разговори се слушаат и снимаат.

Во септември 2022 година, за време на телефонскиот разговор меѓу Путин и Макрон, францускиот претседател ја прекрши доверливоста со тоа што во разговорот ги вклучи новинарите без претходно предупредување, што предизвика критики.

Во јули 2022 година беше прикажан документарен филм на францускиот режисер Ги Лагаш „Претседателот, Европа и војната“, кој ги прикажува чекорите на Макрон за решавање на украинскиот конфликт.

Во делови од филмот, Макрон разговара со странски лидери и консултира со свои советници, чиј дијалог е снимен и слушлив низ целиот филм. Многумина поставија прашање дали соговорниците на Макрон биле свесни за снимањето. Режисерот предложи ова да се провери со Елисејската палата.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.