Потпретседателот на САД, Џеј Ди Венс, изјави дека за Европа не е корисно да биде „безбедносен вазал“ на Соединетите Американски Држави, повикувајќи на посамостојно зајакнување на нејзината одбрана. Во интервју за медиумот UnHerd, тој нагласи дека не сака Европа слепо да ги следи насоките од Вашингтон.

„Не сакам Европејците да прават сè што им кажуваат Американците. Не мислам дека тоа е во нивен интерес, а уште помалку во нашиот“, изјави Венс, додавајќи дека континентот мора да покаже поголема самостојност во градењето на сопствени безбедносни капацитети.

Според него, најголем дел од европските држави немаат доволно силна војска за да обезбедат сопствена одбрана, со исклучоци како Велика Британија, Франција и Полска. Тој поттикна европските земји да вложат повеќе во модернизација на своите армии.

Критики за миграциите и лидерството во Европа

Американскиот потпретседател повторно ја критикуваше политиката на европските лидери во врска со миграцијата и интеграцијата, оценувајќи дека тие не ги слушаат своите граѓани.

„Европските народи сè уште повикуваат на пореална економска и миграциска политика, а лидерите продолжуваат да им го нудат токму спротивното од она за што изгледа дека се гласало“, рече Венс.

И покрај критиките, тој истакна дека ја „сака Европа“, иако веќе ги искажал своите несогласувања со европските лидери и на Минхенската безбедносна конференција и при посетата на Гренланд.

Реплика за изјавите на Зеленски

Венс се осврна и на неодамнешната изјава на украинскиот претседател Володимир Зеленски, кој обвини дека администрацијата на Доналд Трамп, наводно, „симпатизира со Русија“. Според Венс, овие тврдења се „апсурдни“ и „непродуктивни“.

„Тоа сигурно не води кон решение. Мислам дека ваквите коментари не придонесуваат за разбирање, туку само за дополнително недоразбирање“, истакна тој.

Изјавите на Венс доаѓаат во време на сè поголеми трансатлантски несогласувања околу финансирањето на одбраната, односите со Русија, како и прашањата поврзани со миграцијата и безбедноста.

Зеленски: Руски наративи доминираат во САД, Вeнс индиректно ја оправдува агресијата на Путин

Украинскиот претседател Володимир Зеленски го обвини потпретседателот на САД, Џеј Ди Венс, дека „на некој начин ја оправдува“ руската инвазија врз Украина – што претставува најостра критика упатена до висок американски политичар од страна на Зеленски, по нивната бурна средба во Овалната соба во февруари.

Во интервју за американската емисија 60 минути, Зеленски изрази загриженост дека дел од американската администрација паднала под влијание на руската пропаганда и прифаќаат „изменета реалност“ во која не е јасно кој ја започнал војната, пренесува Politico.

„За жал, верувам дека руските наративи стануваат доминантни во САД“, изјави Зеленски, според преводот објавен од CBS News.

„Ова говори за огромното влијание што руската информативна политика го има врз Америка, врз американската политика и врз самите американски политичари“, додаде украинскиот претседател.

Тој посебно го издвоил потпретседателот Венс, обвинувајќи го дека „на некој начин ги оправдува постапките на Путин“.

„Се обидов да објаснам: Не може да се бара некаква средина. Постои агресор и постои жртва. Русија е агресорот, ние сме жртвите“, нагласи Зеленски, повикувајќи се на нивниот тензичен разговор во Белата куќа пред неколку месеци.

Овие изјави доаѓаат во период на зголемени тензии околу американската поддршка за Украина и во време кога украинското раководство апелира за јасна позиција од страна на своите западни партнери.

Парламентот на Малдиви усвои забрана за влез на израелски туристи во знак на солидарност со Палестинците

Парламентот на Малдиви денеска го одобри предлог-законот со кој се забранува влез на израелски државјани во земјата, како чин на солидарност со народот во Појасот Газа кој, како што се наведува во соопштението, се наоѓа „во окови на војната меѓу Израел и палестинското движење Хамас“.

Законот веднаш беше потпишан од страна на претседателот на Малдиви, Мохамед Муизу, јавува францускиот Фигаро.

„Малдиви уште еднаш ја потврдуваат својата непоколеблива солидарност со палестинската кауза. Оваа ратификација ја одразува јасната позиција на владата во однос на постојаните злосторства и геноцидни дејства што Израел ги врши врз палестинскиот народ“, се вели во соопштението од кабинетот на претседателот.

Забраната, која доби поддршка и од владејачката партија и од опозицијата, веднаш стапи во сила, соопшти портпаролот на претседателот.

Според официјалните податоци, Малдиви во февруари оваа година угостиле околу 214.000 странски туристи, од кои само 59 биле израелски државјани.

Претходната забрана за израелски туристи беше укината на почетокот на 1990-тите, а односите меѓу двете земји накратко беа обновени во 2010 година. Сепак, минатата година Министерството за надворешни работи на Израел веќе ги советуваше своите граѓани да ги избегнуваат патувањата на Малдивите поради зголемениот политички ризик.