Украинските трупи ги зголемиле нападите на енергетската инфраструктура во Курската и Белгородската област, соопшти денес руското Министерство за одбрана.

„Без оглед на изјавите на украинскиот претседател Володимир Зеленски за наводно прекинување на намерата за уништување на руските енергетски објекти, кои ги спроведува киевскиот режим, вооружените сили на Украина само го зголемиле бројот на нападите врз енергетската инфраструктура во Курската и Белгородската област на Руската Федерација“, се наведува во соопштението на министерството, пренесува РИА Новости.

Како што се истакнува, во петокот во Белгородската област, вооружените сили на Украина со дронови нападнале објект на компанијата „Белгороденерго“, трансформаторска станица и трансформатор, што резултирало со исклучување на целата трансформаторска станица.

„Овие напади довеле до оштетување на енергетската инфраструктура и прекини на електрична енергија за илјадници цивили“, нагласува Министерството за одбрана.

Минатата недела, претседателот Владимир Путин разговарал телефоноски со својот американски колега Доналд Трамп. Меѓу другото, рускиот лидер позитивно одговорил на идејата страните во конфликтот да се воздржат од напади на објектите на енергетската инфраструктура 30 дена и им дал на војската соодветни упатства.

Потоа, Зеленски изјавил дека Украина ќе го поддржи предлогот за прекин на нападите врз енергетската инфраструктура.

Но, само неколку часа по разговорот на лидерите на Русија и Соединетите Држави, Киев со три дрона ја нападнал станица „Кавказска“ во Краснодарската област.

Овој напад бил прв во серијата напади на енергетската инфраструктура што ги извршиле украинските вооружени сили за време на прекинот на огнот, потсетува руската агенција.

Украина ќе побара измени и дополнувања на договорот со САД за ретки минерали, со цел да се обезбедат поголеми американски инвестиции, пренесува „Блумберг“, повикувајќи се на извор запознаен со ситуацијата.

„Украина ќе побара измена на новиот сеопфатен економски договор што го предложи претседателот Доналд Трамп, вклучувајќи ветување за зголемување на американските инвестиции“, се наведува во извештајот.

Во исто време се истакнува дека Киев сака да се отстрани клаузулата која предвидува дека мора да ја врати во целост воената и економската помош како дел од договорот.

Противењето на потпишувањето договор за ресурсите со Соединетите Држави ќе стави крај на режимот на Владимир Зеленски, изјавија од другата страна, на својот Телеграм канал, пратеникот на Врховната рада, Александар Дубински, кој се наоѓа во притвор под сомнение за предавство.

„Главното прашање на кое треба да се одговори, кога се смета преостанатиот период на Зеленски, е колку време САД му дале да го потпише договорот за минерали?“, прашува Дубински.

Според зборовите на политичарот, односите помеѓу Украина и Соединетите Држави ќе бидат релативно мирни додека не треба да се потпише договорот.

„Откако Зеленски ќе одбие да го потпише договорот со САД, Вашингтон ќе го смета неговиот режим за неспособен за преговори“, истакнува тој.

Да потсетиме, конфликтот помеѓу Трамп и Зеленски се случи на 28 февруари, кога украинскиот претседател требаше да потпише договор за заеднички развој на украинските минерални ресурси.

Американскиот лидер побара Зеленски да се согласи на прекин на огнот и да престане со критикувањето на рускиот претседател Владимир Путин.

Американскиот потпретседател, Џеј Ди Венс, го нарече Зеленски неблагодарен агитатор, откако тој започна да ги оправдува своите постапки, обвинувајќи ја Русија и дури заканувајќи се со последици од конфликтот за САД, иако ги дели океанот.

Како резултат на тоа, украинската делегација била замолена да ја напушти Белата куќа, а договорот не бил потпишан.

По разговорите на 11 март, во официјалното соопштение објавено на веб-страницата на Зеленски, се наведува дека САД и Украина се договориле да потпишат сеопфатен договор за развој на украинските минерални ресурси.

Манекенката Марија Ковалчук е во тешка состојба во болница во Дубаи.

Марија Ковалчук, украинска ѕвезда на OnlyFans, се наоѓа во болница во тешка состојба откако била пронајдена со тешки повреди во Дубаи.

Според информациите, на нејзиното тело се забележани бројни фрактури на раце, нозе, ‘рбет, како и модрици на лицето, а сега се шпекулира за сведоци кои биле присутни на целиот инцидент.

Марија била пронајдена во Дубаи со скршен ‘рбет на 12-ти март, а лекарите сè уште се борат за нејзиниот живот. Во моментот кога ја пронашле, не можела да комуницира, а сега едвај ги поместува усните, но се уште не може да зборува. Затоа, полицијата сè уште не успеала да открие што точно се случило.

Истрагата за нејзиниот случај донела неколку потенцијални верзии на настаните. Првичните информации сугерирале дека Марија исчезнала откако отишла на забава со двајца мажи.

Нејзината мајка изјавила дека не се јавила и дека го пропуштила летот за Тајланд следниот ден.

Првично, нејзината фамилија, особено мајка ѝ Ана, беше гласна во тврдењето дека ќерката им била заробена и мачена, но во меѓувреме, нејзината фамилија се повлекла и за тоа имаат добар повод.

Неколку дена подоцна следувал шокантен пресврт кога се огласила полицијата која соопштила дека девојката најверојатно паднала од недовршена зграда.

Локалната полиција за весникот Khaleej Times изјавила:

“Можеме да потврдиме дека инцидентот се случил на 12-ти март. Сведоците на местото на настанот веднаш ги повикале итните служби, а повредената била пренесена во болница, каде што и понатаму прима медицинска нега и се опоравува.”

Полицијата моментално ја истражува можноста за обид за самоубиство. Според официјалните податоци, таа била видена во близина на градилиштето во многу вознемирена состојба. Сведоците изјавиле дека била хистерична, викала и делувала нервозно.

Според официјалната верзија на властите, таа се искачила на недовршена зграда и паднала од голема висина.

Сепак, полицијата ги демантираше тврдења дека била пронајдена покрај патот, каде што наводно ја оставиле непознати напаѓачи.

За сега останува нејасно дали се работи за несреќен случај, обид за самоубиство или нешто многу потемно.

Клучните сведоци би можеле наскоро да дадат дополнителни информации кои би можеле да го осветлат тоа што всушност се случило со Марија Ковалчук таа ноќ во Дубаи.