Делови на Босна и Херцеговина се погодени од поплави по обилните врнежи во последните неколку дена. Додека реките Врбас и Врбанија во Бањалуци денес се повлекуваат, ситуацијата во Приједор се влошува, пишува порталот Независне.

Најтешко се погодени северните и северозападните делови на земјата, каде што некои градови веќе прогласија состојба на природна катастрофа и воведоа вонредни мерки за одбрана од поплави. Покрај Приједор, ситуацијата е алармантна и во Сански Мост и околните населби.

Приједор веќе прогласи вонредна состојба, а од градот пристигнуваат снимки на потопени стамбени и деловни објекти, како и возила.

Тешка е состојбата и во приједорската населба Гомјеница, каде што куќите се под вода, а водената стихија меѓу нив носи сè пред себе. Водата стигнала до крововите на помошните објекти, а по дворовите пливаат автомобили, од кои се гледаат само крововите, пишува Витез.

На Фејсбук профилот на БХ метeo објавен е снимка која покажува потопени автомобили и куќи.

Градоначалникот на Приједор, Слободан Јавор, изјави денес дека може слободно да се констатира дека се работи за едни од најголемите поплави во историјата на градот, дека најкритичната ситуација е во Гомјеници и Тукови, дека се загрозени и останатите месни заедници во горниот тек на реката Гомјеница, но дека најважно е што нема жртви и што луѓето не се загрозени.

Ситуацијата дополнително се отежнува со прогнозата за нови врнежи кои би можеле дополнително да ја влошат ситуацијата во овој дел на БиХ, пишува порталот Витез инфо.

Најмалку 1.644 загинати и повеќе од 3.400 повредени во земјотресот во Мјанмар.

Додека билансот на загинати и повредени расте, хуманитарните операции во Мјанмар се соочуваат со сериозни потешкотии поради оштетувањата на патиштата и инфраструктурата, соопшти денеска Канцеларијата на ОН за координација на хуманитарни прашања.

Земјотресот со јачина од 7,7 степени според Рихтеровата скала, кој го погоди Мјанмар вчера и предизвика смрт на 1.644 лица, ги оштети основните инфраструктурни објекти, вклучувајќи ги и клучните мостови и патишта. Ова значително го отежнува пристапот до подрачјата што најмногу имаат потреба од хуманитарна помош.

Особено тешко погодениот автопат Јангон-Нејпидо-Мандалај има сериозни оштетувања, како пукнатини и деформации на асфалтната површина, што доведе до прекин на сообраќајот, а автобусите престанаа да сообраќаат, се истакнува во соопштението на Канцеларијата на ОН.

Американскиот претседател Доналд Трамп испрати остро предупредување до Иран, нагласувајќи дека „работите ќе тргнат на лошо“ доколку не биде постигнат нов нуклеарен договор. Неговата изјава доаѓа еден ден откако Техеран потврди дека одговорил на писмото на Трамп, во кое тој повикува на преговори.

„Претпочитам да постигнеме договор со Иран. Но, ако тоа не се случи, работите ќе станат непријатни за Иран“, изјави Трамп, оставајќи простор за дипломатско, но и за можеби поагресивно сценарио.

Иранскиот заменик-министер за надворешни работи, Абас Арагчи, потврди дека Техеран одговорил на писмото, но не ја обелодени неговата содржина.

„Писмото на Трамп содржеше како закани, така и апели за дипломатија. Нашиот став останува јасен – нема директни преговори со САД под закани и максимален притисок. Но, индиректни контакти, како и досега, се можни“, изјави Арагчи.

Иран веќе неколку години значително ја унапредува својата нуклеарна програма, а според извештаите на Меѓународната агенција за атомска енергија (МААЕ), моментално поседува резерви од 60% збогатен ураниум – доволни за производство на шест нуклеарни бомби доколку тој ураниум се збогати до 90%.

Додека САД бараат нов договор, Иран предупредува дека секој воен напад ќе има последици. Претседателот на иранскиот Парламент, Мохамад Багер Калибаф, јасно порача дека „доколку САД преземат воена акција против Иран, нивните сојузници во регионот и воените бази ќе станат небезбедни“.

Останува да се види дали предупредувањата на Трамп се дел од стратегија за враќање на Иран на преговарачка маса или најавуваат нова ескалација на конфликтот на Блискиот Исток.